മന്ത്രിവാഹനങ്ങളിലെ കൂളിങ് പേപ്പറും കര്ട്ടനുകളും നീക്കംചെയ്യണമെന്നാവശ്യപ്പെട്ട് ട്രാന്സ്പോര്ട്ട് കമ്മിഷണര് ടൂറിസം വകുപ്പിന് കത്ത് നല്കി...കേന്ദ്രമോട്ടോര്വാഹന നിയമപ്രകാരം വാഹനങ്ങളുടെ ചില്ലുകളിലെ കാഴ്ചമറയ്ക്കാന് പാടില്ല, സ്റ്റിക്കര്, കര്ട്ടന് എന്നിവ നിയമവിരുദ്ധം
മന്ത്രിവാഹനങ്ങളിലെ കൂളിങ് പേപ്പറും കര്ട്ടനുകളും നീക്കംചെയ്യണമെന്നാവശ്യപ്പെട്ട് ട്രാന്സ്പോര്ട്ട് കമ്മിഷണര് ടൂറിസം വകുപ്പിന് കത്ത് നല്കി. മന്ത്രിമാരും വി.ഐ.പി.കളും ഉപയോഗിക്കുന്ന വാഹനങ്ങളെല്ലാം ടൂറിസംവകുപ്പിന്റെതാണ്. വാഹന ഉടമ എന്ന നിലയില് വാഹനങ്ങളിലെ നിയമവിരുദ്ധ ക്രമീകരണങ്ങള് ഒഴിവാക്കേണ്ട ബാധ്യത ടൂറിസം വകുപ്പിനുണ്ട്. മന്ത്രിവാഹനമാണെങ്കിലും പിഴ അടയ്ക്കേണ്ടിവരുക ടൂറിസം വകുപ്പാണ്. ഇത് സൂചിപ്പിച്ചാണ് കത്ത് .
സര്ക്കാര്വാഹനങ്ങളിലെ കൂളിങ് പേപ്പറും കര്ട്ടനുകളും നീക്കംചെയ്യാന് അഡീഷണല് ചീഫ് സെക്രട്ടറി ഉത്തരവിറക്കിയിരുന്നു. ഇതിന്റെ അടിസ്ഥാനത്തിലാണ് ട്രാന്സ്പോര്ട്ട് കമ്മിഷണര് ഓപ്പറേഷന് സ്ക്രീന് എന്ന പേരില് പ്രത്യേക പരിശോധന നടത്താന് നിര്ദേശിച്ചത്.
തിങ്കളാഴ്ച നിയമസഭാ സമ്മേളനത്തിന് എത്തിയ മന്ത്രിമാരുടെയും എല്.എല്.എ.മാരുടെയും വാഹനങ്ങളില് കൂളിങ് പേപ്പറും കര്ട്ടനുകളും ഉണ്ടായിരുന്നു. ഇത് ജനപ്രതിനിധികളും മന്ത്രിമാരും നിയമം ലംഘിക്കുന്നത് ആക്ഷേപത്തിന് ഇടയാക്കിയിരുന്നു.
വകുപ്പ് സെക്രട്ടറിമാരും കളക്ടര്മാരും അടക്കമുള്ള ഉന്നത ഉദ്യോഗസ്ഥരുടെ വാഹനങ്ങളിലും കര്ട്ടനുകളുണ്ട്. പോലീസ് വാഹനങ്ങളിലെ കര്ട്ടന് നീക്കംചെയ്യാന് പോലീസ് മേധാവി കഴിഞ്ഞയാഴ്ച ഉത്തരവിട്ടിരുന്നു.
കേന്ദ്രമോട്ടോര്വാഹന നിയമപ്രകാരം വാഹനങ്ങളുടെ ചില്ലുകളിലെ കാഴ്ചമറയ്ക്കാന് പാടില്ല. സ്റ്റിക്കര്, കര്ട്ടന് എന്നിവ നിയമവിരുദ്ധമാണ്. 2012-ല് സുപ്രീംകോടതിയാണ് സ്റ്റിക്കര് ഉപയോഗം നിരോധിച്ചത്. 2019-ല് കേരള ഹൈക്കോടതി കര്ട്ടന് ഉപയോഗവും തടഞ്ഞു. കോടതി വിധി പാലിക്കാത്തതിനുള്ള ശിക്ഷകൂടി ചേര്ത്ത് 1250 രൂപയാണ് പിഴ.
ഗ്ലാസുകളിലെ കൂളിങ് പേപ്പര്, കര്ട്ടന്, ബോണറ്റില് കൊടി കെട്ടാന് സ്ഥാപിക്കുന്ന കമ്പി, മുന്നിലും പിന്നിലുമുള്ള ക്രാഷ് ഗാര്ഡുകള്, പുറത്തേക്ക് തള്ളിനില്ക്കുന്ന ചവിട്ടുപടികള് എന്നിവയെല്ലാം നിരോധിച്ചവയാണ്
അനുവദനീയം
വാഹന നിര്മാതാവ് നല്കുന്ന ടിന്റഡ് ഗ്ലാസുകള്. * പിന്നിലെ ഗ്ലാസിന് 70 ശതമാനവും വശങ്ങളിലെ ഗ്ലാസുകള്ക്ക് 50 ശതമാനവും സുതാര്യത.
വാഹനം വാങ്ങിയശേഷമുള്ള മാറ്റങ്ങള് നിയമവിരുദ്ധമാണ്.
ഇസഡ്, ഇസഡ് പ്ലസ് കാറ്റഗറിയുള്ള വി.വി.ഐ.പി.കള്ക്കും, വി.ഐ.പി.കള്ക്കും കര്ട്ടന് ഉപയോഗിക്കാം. സംസ്ഥാനത്ത് മുഖ്യമന്ത്രി മാത്രമാണ് ഈ വിഭാഗത്തിലുള്ളത്.
https://www.facebook.com/Malayalivartha