ചെലപ്പോ ശരിയാകും ചെലപ്പോ ശരിയാവൂല, ശരിയായില്ലെങ്കിലും ഞങ്ങള്‍ക്ക് കുഴപ്പമില്ല എന്ന് പറഞ്ഞതു പോലെയാണ് ഇന്ത്യന്‍ ക്രിക്കറ്റ് ടീം. തുടര്‍ച്ചയായ പഴികള്‍ക്കും വിമര്‍ശനങ്ങള്‍ക്കും ശേഷം ടീം ഇന്ത്യ ലോകോത്തര വിജയം നേടിയിരിക്കുകയാണ്. ബ്രിസ്‌ബേനിലെ ആ 22 വാരയിലൂടെ ഇന്ത്യന്‍ ക്രിക്കറ്റ് ടീം ലോക നെറുകയില്‍ അക്ഷരാര്‍ത്ഥത്തില്‍ ഐതിഹാസികത കുറിക്കുകയായിരുന്നു ഇന്നലെ.

ആസ്‌ട്രേലിയക്കെതിരായ നാലാം ടെസ്റ്റിലെ മൂന്ന് വിക്കറ്റ് വിജയവുമായാണ് നാലുമത്സരപരമ്പര 21ന് അജിങ്ക്യ രഹാനെയും സംഘവും സ്വന്തമാക്കിയത്. തോല്‍വി മാത്രം രുചിച്ചിരുന്ന ബ്രിസ്‌ബേനിലെ ഗാബ ഗ്രൗണ്ടില്‍ വിജയത്തിടമ്പെടുത്തപ്പോള്‍ ഇന്ത്യന്‍ ക്രിക്കറ്റിനത് ഇരട്ടിമധുരവുമായി.

നായകന്‍ വിരാട് കൊഹ്‌ലിയും പരിക്കേറ്റ മുന്‍നിരക്കാരുമില്ലാതെ ഇറങ്ങിയിട്ടും വിശ്വോത്തര താരങ്ങള്‍ അണിനിരന്ന ആസ്‌ട്രേലിയയെ അവരുടെ മണ്ണില്‍ മുട്ടുകുത്തിക്കാന്‍ കഴിഞ്ഞതും ഈ ചരിത്രനേട്ടത്തിന്റെ മാറ്റുകൂട്ടുന്നു. വിജയം വിദൂരമായിരുന്ന ഗാബയില്‍ 328 റണ്‍സിന്റെ ലക്ഷ്യം രണ്ടാം ഇന്നിംഗ്‌സില്‍ ഏഴ് വിക്കറ്റ് നഷ്ടത്തില്‍ നേടിയെടുത്താണ് ഇന്ത്യ ചരിത്രത്തിലെ ഏറ്റവും മികച്ച ടെസ്റ്റ് നേട്ടങ്ങളിലൊന്ന് സ്വന്തം പേരിലാക്കിയത്. വിക്കറ്റ് നഷ്ടം കൂടാതെ നാലുറണ്‍സുമായി അവസാന ദിനം ക്രീസിലേക്കെത്തിയ ഇന്ത്യ ശുഭ്മാന്‍ ഗില്‍ (91), റിഷഭ് പന്ത് (89 നോട്ടൗട്ട്), ചേതേശ്വര്‍ പുജാര (56), അജിങ്ക്യ രഹാനെ (24),വാഷിംഗ്ടണ്‍ സുന്ദര്‍ (22) എന്നിവരുടെ പോരാട്ടമികവിലാണ് കളിതീരാന്‍ മൂന്നോവര്‍കൂടി ശേഷിക്കേ വിജയം കണ്ടത്.

തുടര്‍ച്ചയായ മൂന്നാം ബോര്‍ഡര്‍ ഗാവസ്‌കര്‍ ട്രോഫിയും ഇന്ത്യയ്ക്ക്, ഗാബയില്‍ ഇന്ത്യയുടെ ആദ്യ വിജയം, 1988നു ശേഷം ആസ്‌ട്രേലിയ ഇവിടെ തോല്‍ക്കുന്നത് ആദ്യം, ആസ്‌ട്രേലിയന്‍ മണ്ണിലെ തുടര്‍ച്ചയായ ഇന്ത്യയുടെ ടെസ്റ്റ് പരമ്പര വിജയം, ഐ.സി.സി ടെസ്റ്റ് റാങ്കിംഗിലും ലോക ടെസ്റ്റ് ചാമ്പ്യന്‍ഷിപ്പിലും ഇന്ത്യ ഒന്നാമത് എന്നിങ്ങനെ 5 നാഴികക്കല്ലുകളാണ് സംഭവിച്ചത്.

ഇന്ത്യ വിജയത്തിലേക്ക് കുതിച്ചത് 6 വഴികളിലൂടെയാണ്. സമനിലയ്ക്ക് ശ്രമിക്കാമായിരുന്നിട്ടും വിജയതൃഷ്ണയോടെ പൊരുതിയ റിഷഭ് പന്തിന്റെ ബാറ്റിംഗ്, ഓപ്പണിംഗില്‍ ശുഭ്മാന്‍ ഗില്‍ നല്‍കിയ മികച്ച തുടക്കം, ആസ്‌ട്രേലിയന്‍ ബൗളര്‍മാരുടെ ക്രൂരമായ ബൗണ്‍സര്‍ ആക്രമണം നേരിട്ട് ചേതേശ്വര്‍ പുജാര പിടിച്ചുനിന്നത്, ആസ്‌ട്രേലിയയുടെ ഒന്നാം ഇന്നിംഗ്‌സ് ലീഡ് 33 റണ്‍സില്‍ ഒതുക്കിയ വാഷിംഗ്ടണ്‍ സുന്ദറിന്റെയും ശാര്‍ദൂല്‍ താക്കൂറിന്റെയും ഏഴാം വിക്കറ്റ് കൂട്ടുകെട്ട്, അഡ്‌ലെയ്ഡില്‍ 36 റണ്‍സിന് ആള്‍ഔട്ടാകേണ്ടി വന്നിടത്തുനിന്ന് മെല്‍ബണിലെയും ഗാബയിലെയും വിജയത്തിലേക്കും സിഡ്‌നിയിലെ സമനിലയിലേക്കും കൈപിടിച്ച അജിങ്ക്യ രഹാനെയുടെ നായകമികവ്, തുറന്നുകിട്ടിയ അവസരങ്ങള്‍ പരമാവധി പ്രയോജനപ്പെടുത്തിയ സിറാജ്, നടരാജന്‍, ശാര്‍ദ്ദൂല്‍, വാഷിംഗ്ടണ്‍ സുന്ദര്‍ തുടങ്ങിവരുടെ പ്രകടനം എന്നിവയായിരുന്നു ആ 6 വിജയ വഴികള്‍.

പരമ്പര നേട്ടത്തിനുള്ള പാരിതോഷികമായി ടീമിന് ബി.സി.സി.ഐ അഞ്ചുകോടി രൂപ പ്രഖ്യാപിച്ചു.

ബാറ്റ്‌സ്മാനെന്ന നിലയിലെ റിഷഭ് പന്തിന്റെ അതിശയകരമായ പ്രകടനമാണ് പരമ്പര വിജയത്തിലെ നിര്‍ണായകഘടകമായത്. സിഡ്‌നിയില്‍ ഒരു ദിനത്തിലേറെ പൊരുതിനിന്ന് സമനില നേടാന്‍ വഴിയൊരുക്കിയത് പന്തിന്റെ 97 റണ്‍സായിരുന്നു. സിഡ്‌നിയില്‍ നേടാനാകാതിരുന്ന വിജയം പന്ത് ബ്രിസ്‌ബേനില്‍ നേടിയെടുത്തു. അവസാന ടെസ്റ്റിലെ മാന്‍ ഒഫ് ദ മാച്ച് പുരസ്‌കാരം നേടിയതും പന്താണ്. പരമ്പരയില്‍ മൂന്ന് മത്സരം മാത്രം കളിച്ച പന്താണ് റണ്‍വേട്ടയില്‍ മുന്നിലുള്ള ഇന്ത്യന്‍ താരം. ടെസ്റ്റിന്റെ ശൈലിയിലേക്ക് തന്റെ ബാറ്റിംഗ് മാറ്റാതെ തന്റെ ശൈലിയിലേക്ക് ടെസ്റ്റിനെ മാറ്റിയെടുക്കുകയാണ് റിഷഭ് പന്ത് ചെയ്തത്. അതോടെ വിജയം ഇന്ത്യയുടെ ഭാഗത്തായി.