ബിജെപി നേതാവ് എ.പി. അബ്ദുല്ലക്കുട്ടി ഡല്‍ഹിയിലേക്കുള്ള വിമാനയാത്രയ്ക്കിടെ കണ്ടത് ദൃശ്യത്തിന്റെ വ്യാജപതിപ്പെന്നുള്ള വിമര്‍ശനം പല കോണില്‍ നിന്നും ഉയര്‍ന്നതോടെ താന്‍ കണ്ടത് യഥാര്‍ഥ പതിപ്പെന്ന് വിശദമാക്കി അബ്ദുല്ലക്കുട്ടി.

ദൃശ്യം 2 കണ്ടശേഷം ബിജെപി ദേശീയ വൈസ് പ്രസിഡന്റ് എ.പി അബ്ദുല്ലക്കുട്ടി സമൂഹമാധ്യമത്തില്‍ പോസ്റ്റ് ചെയ്ത കുറിപ്പിന്റെ കമന്റ് ബോക്‌സിലാണ് വ്യാജ പതിപ്പെന്നുള്ള ആരോപണം ഉയര്‍ത്തി ഒരുവിഭാഗം രംഗത്തുവന്നത്,

അബ്ദുല്ലക്കുട്ടിയുടെ പോസ്റ്റ് ഇങ്ങനെയായിരുന്നു.

'ജിത്തു ജോസഫ്, നിങ്ങളുടെ ദൃശ്യം 2 കണ്ടു. ഫ്‌ലൈറ്റില്‍ ദില്ലി യാത്രക്കിടയില്‍ മൊബൈല്‍ ഫോണില്‍ ആണ് സിനിമ കണ്ടത്. ബിജെപി ദേശീയ ഭാരവാഹികളുടെ യോഗത്തിന് പോകുകയായിരുന്നു.

സിനിമ സംവിധായകന്റെ കലയാണ്...ഇതായിരുന്നു ഞങ്ങളുടെയൊക്കെ ധാരണ. കഥാകാരനും സംവിധായകനും ഒരാളാകുമ്പോള്‍ അത് ഒരു ഒന്നൊന്നര സിനിമയായിരിക്കും... അതാണ് ജോര്‍ജ് കുട്ടിയെന്ന കുടുംബ സ്‌നേഹിയെ (മോഹല്‍ ലാലിനെ) നായകനാക്കിയുളള ഈ അത്യുഗ്രന്‍ സിനിമ. വര്‍ത്തമാന മലയാള സിനിമയ്ക്ക് ഒരു വരദാനമാണ് ജിത്തു.'

ഡല്‍ഹിയിലേക്കുള്ള വിമാനയാത്രയ്ക്കിടെ എങ്ങനെ സിനിമ കണ്ടു? വിമാനത്തില്‍ എവിടെയാണ് റേഞ്ച്? ടെലിഗ്രാമില്‍ കിട്ടിയ വ്യാജ പതിപ്പ് ഡൗണ്‍ലോഡ് ചെയ്തു കണ്ടതല്ലേ? വിമാനത്തില്‍ കയറുമ്പോള്‍ മൊബൈല്‍ ഫ്‌ലൈറ്റ് മോഡിലല്ലേ? രണ്ടര മണിക്കൂറുള്ള സിനിമ ഓടിച്ചിട്ടു കണ്ടതാണോ തുടങ്ങി ഒട്ടേറെ ചോദ്യങ്ങളാണ് വിമര്‍ശകര്‍ ഉയര്‍ത്തിയത്. കളിയാക്കിക്കൊണ്ടുള്ള ട്രോളുകളും വന്നു ഒട്ടേറെ. ചിലര്‍ മോശം ഭാഷയില്‍ അധിക്ഷേപിക്കുകയും ചെയ്തു.

അതേസമയം വിമര്‍ശകരുടെ ആരോപണങ്ങളെ എല്ലാം പൊളിച്ചുകൊണ്ട് താന്‍ കണ്ട രീതി വിശദീകരിക്കുകയാണ് എപി അബ്ദുള്ളക്കുട്ടി ആമസോണ്‍ പ്രൈമില്‍ വിഡിയോ ഡൗണ്‍ലോഡ് ചെയ്ത ശേഷം പിന്നീട് കാണാനുള്ള സൗകര്യമുണ്ടെന്നും ഫ്‌ലൈറ്റ് മോഡിലും കാണാമെന്നും വിശദമാക്കിയാണ് അബ്ദുല്ലക്കുട്ടി വിമര്‍ശകരുടെ വായടപ്പിച്ചത്.

ഇതിന്റെ പേരിലുള്ള തെറിവിളി പഠനാര്‍ഹമായ ചര്‍ച്ചയാക്കി മാറ്റിയതിന് പോരാളികള്‍ക്ക് നന്ദി പറയുന്നുമുണ്ട് അദ്ദേഹം. കോഴിക്കോട്  ഡല്‍ഹി വിമാന യാത്രയ്ക്കുള്ള സമയം ദൃശ്യം 2 കാണാന്‍ ധാരാളമാണെന്നും അബ്ദുല്ലക്കുട്ടിയെ അനുകൂലിക്കുന്നവര്‍ ടൈം ചാര്‍ട്ട് ഉള്‍പ്പെടെ പോസ്റ്റ് ചെയ്ത് വ്യക്തമാക്കുകയും ചെയ്തു.