സ്വര്‍ണക്കടത്ത് കേസ് അവസാനം ഡോളര്‍ക്കടത്തിലേക്ക് കടന്നിരിക്കുകയാണ്. തെരഞ്ഞെടുപ്പ് അടുത്ത വേളയില്‍ പഴയ കേസും മൊഴിയും പൊടിതട്ടിയെടുത്തിരിക്കുകയാണ് കസ്റ്റംസ്. കേന്ദ്ര തെരഞ്ഞെടുപ്പ് കമ്മീഷന് മുഖ്യമന്ത്രി നല്‍കിയ പരാതി തള്ളിയതോടെ വീണ്ടും അന്വേഷണം ശക്തമാകുകയാണ് കസ്റ്റംസ്.

ഇതോടെ ഡോളര്‍ കടത്തുമായി ബന്ധപ്പെട്ട് സ്വപ്ന നല്‍കിയ മൊഴികളുടെ അടിസ്ഥാനത്തില്‍ സംസ്ഥാന രാഷ്ട്രീയത്തിലെ ഉന്നതരെ ചോദ്യം ചെയ്യാന്‍ കസ്റ്റംസ് പ്രിവന്റീവ് വിഭാഗം തയാറെടുക്കുകയാണ്. കഴിഞ്ഞദിവസം ഹൈക്കോടതിയില്‍ സമര്‍പ്പിച്ച പത്രികയില്‍ പരാമര്‍ശിക്കപ്പെട്ടവരെ ചോദ്യം ചെയ്യണമെന്ന നിലപാടിലാണു കസ്റ്റംസ്. ഉന്നതര്‍ക്കെതിരെ കസ്റ്റംസ് നിയമം 108ാം വകുപ്പു പ്രകാരവും ക്രിമിനല്‍ നടപടിച്ചട്ടം 168 പ്രകാരവും സമാനമായ മൊഴികള്‍ സ്വപ്ന നല്‍കിയ സാഹചര്യത്തിലാണിത്.

മുഖ്യമന്ത്രി, സ്പീക്കര്‍, 3 മന്ത്രിമാര്‍ എന്നിവര്‍ക്കു ഡോളര്‍ കടത്തില്‍ ബന്ധമുണ്ടെന്നാണു പത്രികയില്‍ പറഞ്ഞത്. ഇവര്‍ക്കു പുറമെ, 2 മന്ത്രിപുത്രന്മാരെയും ചോദ്യം ചെയ്യും.ഡോളര്‍ കടത്ത്, സ്വര്‍ണക്കടത്ത് കേസുകള്‍ അന്വേഷിക്കുന്ന ഉദ്യോഗസ്ഥര്‍ ഒരുമിച്ചാകും ചോദ്യം ചെയ്യല്‍.

കസ്റ്റംസ് കഴിഞ്ഞദിവസം ഹൈക്കോടതിയില്‍ നല്‍കിയ പത്രികയിലെ വെളിപ്പെടുത്തലുകള്‍ വിവാദം സൃഷ്ടിച്ചുവെങ്കിലും ഉന്നതരിടപെട്ടുവെന്നു പറയുന്ന ഡോളര്‍ കടത്തില്‍ ഇതുവരെ ഒക്കറന്‍സ് റിപ്പോര്‍ട്ട് പോലും കോടതിയില്‍ കസ്റ്റംസ് സമര്‍പ്പിച്ചിട്ടില്ല. യുഎഇ കോണ്‍സുലേറ്റിലെ മുന്‍ ഫിനാന്‍സ് വിഭാഗം തലവന്‍ ഖാലിദ് അലി ഷൗക്രി വിദേശത്തേക്ക് 1.90 ലക്ഷം യുഎസ് ഡോളര്‍ കടത്തിയെന്ന കേസിന്റെ ഒക്കറന്‍സ് റിപ്പോര്‍ട്ടിലാകട്ടെ ഇവരിലാരെയും പരാമര്‍ശിച്ചിട്ടുമില്ല.

ഡോളര്‍ കടത്തില്‍, സ്വപ്നയുടെ മൊഴി തന്നെയാണു പ്രധാന തെളിവെന്നു കസ്റ്റംസ് വ്യക്തമാക്കുന്നു. ഉന്നതരുടെ ഡോളര്‍ വിദേശത്തേക്കു കടത്തിയെന്നു മൊഴി നല്‍കിയെങ്കിലും ഇത് എന്തിനു വേണ്ടിയാണു കടത്തിയതെന്ന് ഇപ്പോഴും വ്യക്തമല്ല. വിദേശത്തേക്കു കടത്തിയതിനാല്‍, മറ്റു രേഖാമൂലമായ തെളിവുകള്‍ ലഭിക്കാനുള്ള സാധ്യതയും കുറവാണ്. മുന്‍ കോണ്‍സല്‍ ജനറല്‍ അടക്കം യുഎഇ കോണ്‍സുലേറ്റിലെ 3 പ്രധാന ഉദ്യോഗസ്ഥരുടെ മൊഴി നിര്‍ണായകമാവുന്നത് ഇവിടെയാണ്. ഡിജിറ്റല്‍ തെളിവുകളിലും വരും ദിവസങ്ങളില്‍ നടക്കുന്ന ചോദ്യം ചെയ്യലുകളില്‍ ലഭിക്കുന്ന മൊഴികളിലും കസ്റ്റംസ് പ്രതീക്ഷയര്‍പ്പിക്കുന്നു.

അതേസമയം കിഫ്ബി വിഷയത്തില്‍ എന്‍ഫോഴ്‌സ്‌മെന്റ് ഡയറക്ടറേറ്റ് (ഇഡി) നടത്തുന്ന അന്വേഷണം പെരുമാറ്റച്ചട്ടങ്ങളുടെ ലംഘനമാണെന്നു ചൂണ്ടിക്കാട്ടി മുഖ്യമന്ത്രി പിണറായി വിജയന്‍ അയച്ച കത്ത് മുഖ്യ തെരഞ്ഞെടുപ്പ് കമ്മിഷണര്‍ സുനില്‍ അറോറ തള്ളി. 2020 മാര്‍ച്ച് മുതല്‍ കേന്ദ്ര ഏജന്‍സി നടത്തുന്ന അന്വേഷണമാണെന്നും വിഷയത്തില്‍ ഇടപെടാന്‍ കഴിയില്ലെന്നും അറോറ മറുപടിയില്‍ പറഞ്ഞു.

കേന്ദ്രമന്ത്രി നിര്‍മല സീതാരാമനെതിരെ ഗുരുതര ആരോപണങ്ങള്‍ ഉന്നയിച്ചാണു മുഖ്യമന്ത്രിയുടെ കത്ത്. ബിജെപിയുടെ വിജയ യാത്രയില്‍ പങ്കെടുത്ത നിര്‍മല സീതാരാമന്‍ അന്നു നടത്തിയ പരാമര്‍ശവും അദ്ദേഹം ചൂണ്ടിക്കാട്ടി. തെരഞ്ഞെടുപ്പ് കമ്മിഷന്റെ ഈ മറുപടി കേന്ദ്ര അന്വേഷണ സംഘങ്ങള്‍ക്ക് ഊര്‍ജം നല്‍കുകയാണ്.

സ്വര്‍ണ, ഡോളര്‍ കടത്തു കേസില്‍ മുഖ്യമന്ത്രി പിണറായി വിജയനോട് എണ്ണിയെണ്ണി ചോദ്യങ്ങളുമായി കേന്ദ്ര ആഭ്യന്തര മന്ത്രി അമിത് ഷായും ഇന്നലെ രംഗത്തെത്തി. കേരളത്തില്‍ നടന്ന പല അഴിമതികളുടെയും തെളിവു തന്റെ കയ്യിലുണ്ടെന്നും അതെല്ലാം ഉന്നയിച്ചു മുഖ്യമന്ത്രിയെ ഇപ്പോള്‍ ആശയക്കുഴപ്പത്തിലാക്കുന്നില്ലെന്നും സംസ്ഥാന സര്‍ക്കാരിനെതിരെ അദ്ദേഹം ആഞ്ഞടിച്ചു.

കേന്ദ്ര ഏജന്‍സികള്‍ രാഷ്ട്രീയം കളിക്കുന്നു എന്ന് ആരോപിക്കുന്ന കേരള മുഖ്യമന്ത്രി തന്റെ ഈ ചോദ്യങ്ങള്‍ക്ക് ഉത്തരം പറയണമെന്ന് ആവശ്യപ്പെട്ടു കൊണ്ടാണ് അമിത് ഷാ അവ ഒന്നൊന്നായി ഉന്നയിച്ചത്. ഇതോടെ രാഷ്ട്രീയമായി മറുപടി പറയേണ്ട ബാധ്യത പാര്‍ട്ടിക്കായി.