നിര്‍മ്മാണത്തിലിരിക്കുന്ന മാലിന്യ ടാങ്കില്‍ കുടുങ്ങിയ രണ്ട് തൊഴിലാളികളില്‍ ഒരാള്‍ ശ്വാസം മുട്ടിമരിച്ചു. കോഴിക്കോട് മുട്ടോളിയിലാണ് സംഭവം. ടാങ്കില്‍ കുടുങ്ങിയ മറ്റൊരാളെ രക്ഷപ്പെടുത്തി ആശുപത്രിയില്‍ എത്തിച്ചു. ഇയാളുടെ നില ഗുരുതരമാണെന്നാണ് വിവരം. എട്ടടി വീതം നീളവും വ്യാസവുമുള്ള ടാങ്കിലാണ് തൊഴിലാളികള്‍ കുടുങ്ങിയത്. രണ്ടടി മാത്രം വ്യാസമുള്ള ദ്വാരത്തിലൂടെയാണ് ടാങ്കിലേക്ക് ഇറങ്ങേണ്ടത്.

ടാങ്കിനുള്ളിലുണ്ടായിരുന്ന നിര്‍മ്മാണവസ്തുക്കള്‍ എടുക്കാനായി അകത്തേക്കിറങ്ങിയപ്പോള്‍ തൊഴിലാളിക്ക് ശ്വാസം കിട്ടാതെവരികയായിരുന്നു. ഇതുകണ്ട് തൊഴിലാളിയെ രക്ഷിക്കാനായി തൊട്ടടുത്തുള്ള സ്വകാര്യ സ്ഥാപനത്തില്‍ ജോലിചെയ്യുന്ന വിശ്വനാഥനും ടാങ്കിനുള്ളിലേക്ക് ഇറങ്ങുകയായിരുന്നു. തുടര്‍ന്ന് രണ്ട് പേരും അപകടത്തില്‍പ്പെടുകയായിരുന്നു. അരമണിക്കൂറിന് ശേഷമാണ് ഇവരെ ടാങ്കില്‍നിന്ന് പുറത്തെടുത്തത്. ഉടന്‍ ആശുപത്രിയിലെത്തിച്ചെങ്കിലും നിര്‍മ്മാണത്തൊഴിലാളിക്ക് ജീവന്‍ നഷ്ട്ടപ്പെടുകയായിരുന്നു.