റാന്നിയിലെ നിയമസഭാ സീറ്റ് കേരളാ കോൺഗ്രസിലെ ജോസ് വിഭാഗത്തിന് നൽകിയതിനെ ചൊല്ലി സിപിഎമ്മിൽ കടുത്ത അമർഷം. മുതിർന്ന നേതാക്കൾക്ക് പുറമെ പ്രാദേശിക സിപിഎം നേതൃത്വത്തിലും എതിർപ്പ്.

ഈ തീരുമാനത്തെ മണ്ഡലം കമ്മിറ്റി യോഗത്തിൽ പങ്കെടുത്ത മുഴുവൻ ആളുകളും എതിർത്തു. 45 പേർ പങ്കെടുത്ത യോഗത്തിൽ 19 പേരും ജില്ലാ സെക്രെട്ടറിമാരാണ്‌. എന്നാൽ ഇതിനെതിരെ എതിർപ്പ് പ്രകടിപ്പിച്ചവരെ അനുനയിപ്പിക്കാനുള്ള നീക്കവും ജില്ലാനേതൃത്വം നടത്തിവരുന്നുണ്ട്.

ഓരോ ലോക്കൽ കമ്മിറ്റികളിലും ജില്ലാ സെക്രട്ടറിയേറ്റ് അംഗങ്ങൾ പങ്കെടുത്ത് കാര്യങ്ങൾ വിശദീകരിക്കാനാണ് പാർട്ടിയുടെ നീക്കം.ഇതനുസരിച്ച് ജില്ലാ സെക്രട്ടറിയേറ്റ് അംഗങ്ങൾക്ക് ലോക്കൽ കമ്മിറ്റികൾ വീതിച്ചു നൽകിയിട്ടുണ്ട്. ഇവർ ഓരോ ലോക്കൽ കമ്മിറ്റികളിലും സീറ്റ് നൽകിയതിന് പിന്നിലെ കാര്യങ്ങൾ വിശദീകരിക്കണമെന്നാണ് പാർട്ടിയുടെ തീരുമാനം.

റാന്നിയിൽ കേരളാ കോൺഗ്രസ്സ് [എം] ജോസ് വിഭാഗത്തിന് ജില്ലാ നേതൃത്വത്തിന്റെ അഭിപ്രായം മറികടന്നാണ് സീറ്റ് നൽകുവാൻ തീരുമാനമായത്.ഇതോടെയാണ് പത്തനംത്തിട്ട ജില്ലാ സെക്രട്ടറിയേറ്റിൽ പൊട്ടിത്തെറിയുണ്ടായത്.എന്നാൽ സംസ്ഥാന സമിതി തീരുമാനത്തെ ജില്ലാ സെക്രട്ടറിയേറ്റ് അംഗങ്ങൾ എതിർത്തെങ്കിലും അതിനെ മറികടന്നാണ് സീറ്റ് കേരളം കോൺഗ്രസിന് തന്നെ നൽകിയത്.