ഉറ്റ കൂട്ടുകാരന്റെ വിയോഗം താങ്ങാനാവാതെ....വീശിയ കത്തിയില്‍ നിന്ന് അഭിമന്യുവിനെ രക്ഷിക്കാന്‍ ശ്രമിച്ചെങ്കിലും അതിനാവാതെ അവന്‍ മരണത്തിനു കീഴടങ്ങിയതറിഞ്ഞ് വിങ്ങിപ്പൊട്ടുകയാണ് ഉറ്റകൂട്ടുകാരന്‍ കാശിനാഥ്.

വിഷുപ്പിറ്റേന്നുള്ള എസ്.എസ്.എല്‍.സി. പരീക്ഷ ഒരുമിച്ചെഴുതേണ്ടവരായിരുന്നു ഇരുവരും. എന്നാല്‍, വ്യാഴാഴ്ച ഫിസിക്‌സ് പരീക്ഷ എഴുതാന്‍ കിച്ചു(അഭിമന്യു) ഇല്ലായിരുന്നു. അവന്‍ അപ്പോള്‍ ചേതനയറ്റ് ആലപ്പുഴ മെഡിക്കല്‍ കോളേജ് ആശുപത്രിയിലെ മോര്‍ച്ചറിയിലായിരുന്നു. വള്ളികുന്നം അമൃത എച്ച്.എസ്.എസിലെ പരീക്ഷാഹാളില്‍ അവന്റെ ഇരിപ്പിടം ഒഴിഞ്ഞുകിടക്കുന്നതു കണ്ട് കാശിനാഥിന് സങ്കടം അടക്കാനായില്ല.

കൂട്ടുകാരന്റെ ജീവന്‍ രക്ഷിക്കാന്‍ ശ്രമിക്കുന്നതിനിടെ കാശിനാഥിന്റെ ഇടതുകൈപ്പത്തിക്ക് സാരമായി മുറിവേറ്റു. ആ പരിക്കുമായാണ് പരീക്ഷ എഴുതിയത്.

പടയണിവെട്ടം മങ്ങാട്ട് ജയപ്രകാശി(കണ്ണന്‍)ന്റെയും സില്‍ജയുടെയും മകനാണ് കാശിനാഥ്. അഭിമന്യുവും കാശിനാഥും അഞ്ചാംക്‌ളാസ് മുതല്‍ ഒന്നിച്ചാണ് പഠിക്കുന്നത്. ആത്മസുഹൃത്തുക്കളുമായിരുന്നു.

ഉത്സവപ്പറമ്പില്‍ അഭിമന്യുവിനുനേരേ കത്തി ഉയര്‍ന്നപ്പോള്‍ രക്ഷിക്കാനായി അവനെ വലിച്ചുമാറ്റുന്നതിനിടെയാണ് കാശിനാഥിന്റെ കൈയില്‍ മുറിവേറ്റത്. വിഷുവിന് പുതുവസ്ത്രങ്ങളെടുക്കാന്‍ അഭിമന്യുവും കാശിനാഥും ഒന്നിച്ചാണ് താമരക്കുളത്തെ വസ്ത്രശാലയില്‍ പോയത്.

ഷര്‍ട്ടും പാന്റുമെല്ലാം വാങ്ങി. ഉച്ചയ്ക്ക് വീണ്ടും കാശിനാഥിനെ അന്വേഷിച്ച് അഭിമന്യു വീട്ടുപടിക്കലെത്തിയിരുന്നെന്ന് കാശിനാഥിന്റെ അമ്മ ക്ഷീരകര്‍ഷകയായ സില്‍ജ കണ്ണീരോടെ പറഞ്ഞു. വൈകീട്ട് ഉത്സവം കാണാനും ഇരുവരും ഒന്നിച്ചാണ് പോയത്. പരീക്ഷ എഴുതിയതിനുശേഷം കാശിനാഥിനെ വെട്ടിക്കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചു.

കൂട്ടുകാരനെക്കണ്ട് 15 മിനിറ്റിനകം തിരികെ വരാമെന്നുപറഞ്ഞാണ് തന്റെ മുന്നില്‍നിന്ന് അഭിമന്യു പോയതെന്ന് അച്ഛന്‍ അമ്പിളികുമാര്‍. അമ്പലത്തില്‍നിന്ന് വരുന്നവഴിക്കാണ് അവനെ കണ്ടത്. വീട്ടിലെത്തി കുറച്ചുകഴിഞ്ഞ് വിളിച്ചപ്പോള്‍ ഉടന്‍ വരാമെന്നായിരുന്നു മറുപടി. പിന്നീട് അറിഞ്ഞത് മരണവാര്‍ത്തയായിരുന്നു.