കൊവിഡ് രൂക്ഷമാകുന്നു... എറണാകുളം ജില്ലാ ആരോഗ്യവകുപ്പ് ഉദ്യോഗസ്ഥരുമായി അടിയന്തിര യോഗം ചേര്ന്ന് കെ.കെ ഷൈലജ
കൊറോണ രോഗികളുടെ എണ്ണം ക്രമാതീതമായി വര്ദ്ധിക്കുന്ന സാഹചര്യത്തില് ജില്ലാ ആരോഗ്യവകുപ്പ് ഉദ്യോഗസ്ഥരുടെ അടിയന്തിര യോഗം വിളിച്ച് ചേര്ത്ത് ആരോഗ്യമന്ത്രി കെ. കെ ഷൈലജ. ഞായറാഴ്ച ജില്ലയില് 2835 പേര്ക്ക് കൊറോണ സ്ഥിരീകരിച്ചിരുന്നു. ഇതിന്റെ പശ്ചാത്തലത്തിലാണ് അടിയന്തിര യോഗം ചേര്ന്നത്. ജില്ലയില് പ്രതിരോധ പ്രവര്ത്തനങ്ങള് ഊര്ജ്ജിതമാക്കാന് മന്ത്രി നിര്ദേശം നല്കി.
ആലുവ ജില്ലാ ആശുപത്രിയില് കൊറോണ ചികിത്സയ്ക്ക് 100 ഐ.സി.യു. കിടക്കകള് അടുത്തയാഴ്ച പൂര്ണസജ്ജമാക്കും. ഫോര്ട്ട് കൊച്ചി താലൂക്കാശുപത്രി പൂര്ണമായും കൊറോണ ആശുപത്രിയാക്കി മാറ്റും. കൊറോണ രോഗികള് വര്ധിക്കുന്ന സാഹചര്യത്തില് കളമശേരി മെഡിക്കല് കോളേജിനെ പൂര്ണമായും കൊറോണ ആശുപത്രിയാക്കി മാറ്റാനും യോഗത്തില് തീരുമാനിച്ചു.
ജനറല് ആശുപത്രിയിലെ സൂപ്പര് സ്പെഷ്യാലിറ്റി ബ്ലോക്ക് ഒരാഴ്ച കൊണ്ട് ചികിത്സയ്ക്കായി സജ്ജമാക്കും. സര്ക്കാര് മേഖലയില് 1000 ഓക്സിജന് കിടക്കകള് തയ്യാറാക്കും. ഇതോടൊപ്പം ഓക്സിജന്റെ ലഭ്യതയും ഉറപ്പ് വരുത്തും. ആശുപത്രികളില് ആവശ്യമായ സ്റ്റാഫിനെ നിയമിക്കാനും നിര്ദേശം നല്കി. സ്വകാര്യ ആശുപത്രികളിലെ 10 ശതമാനം കിടക്കകള് കൊറോണ ചികിത്സയ്ക്കായി മാറ്റി വയ്ക്കും.
തദ്ദേശസ്വയംഭരണ സ്ഥാപനങ്ങളുടെ സഹകരണത്തോടെ 5 ദിവസം കൊണ്ട് ഡൊമിസെയില് കെയര് സെന്ററുകളും (ഡിസിസി) സിഎഫ്എല്ടിസികളും സജ്ജമാക്കും. ഇതിനായി ആരോഗ്യ മന്ത്രിയുടേയും തദ്ദേശ സ്വയംഭരണ വകുപ്പ് മന്ത്രിയുടേയും നേതൃത്വത്തില് തിങ്കളാഴ്ച ജില്ലാതല യോഗം കൂടുമെന്നും യോഗത്തിന് ശേഷം പുറത്തിറക്കിയ പത്രക്കുറിപ്പില് പറയുന്നു.
ആരോഗ്യ വകുപ്പ് പ്രിന്സിപ്പല് സെക്രട്ടറി ഡോ. രാജന് എന് ഖോബ്രഗഡെ, എന്.എച്ച്.എം. സ്റ്റേറ്റ് മിഷന് ഡയറക്ടര് ഡോ. രത്തന് ഖേല്ഖര്, ആരോഗ്യ വകുപ്പ് ഡയറക്ടര് ഡോ. ആര്.എല്. സരിത, ആരോഗ്യ വിദ്യാഭ്യാസ ഡയറക്ടര് ഡോ. എ. റംലാബീവി, കെ.എം.എസ്.സി.എല്. ജനറല് മാനേജര് ഡോ. ദിലീപ്, ഡി.എം.ഒ. ഡോ. കുട്ടപ്പന്, ഡി.പി.എം. ഡോ. മാത്യൂസ് നമ്ബേലി എന്നിവര് യോഗത്തില് പങ്കെടുത്തു.
https://www.facebook.com/Malayalivartha