കൊവിഡ് രൂക്ഷമായ സാഹചര്യത്തില്‍ സര്‍വ്വകലാശാലാ പരീക്ഷകള്‍ നടത്തുന്നത് പുനഃപരിശോധിക്കണമെന്ന് ശശി തരൂര്‍ എം.പി.യും പൊതുപരീക്ഷകള്‍ നടത്തുന്നത് പുനരാലോചിക്കണമെന്ന് പ്രതിപക്ഷ നേതാവ് രമേശ് ചെന്നിത്തലയും ആവശ്യപ്പെട്ടിരുന്നു.

അതിനു പിന്നാലെ, നേരിട്ടുള്ള പരീക്ഷകള്‍ (ഓഫ് ലൈന്‍ ) മാറ്റിവയ്ക്കുന്നത് പരിഗണിക്കാന്‍ വൈസ് ചാന്‍സലര്‍മാര്‍ക്ക് ഗവര്‍ണര്‍ നിര്‍ദ്ദേശം നല്‍കി. തുടര്‍ന്ന് പരീക്ഷകള്‍ മാറ്റിയതായി സര്‍വ്വകലാശാലകളും അറിയിച്ചു.

പരീക്ഷകള്‍ മാറ്റണമെന്ന് രക്ഷാകര്‍ത്താക്കളും വിദ്യാര്‍ത്ഥി പ്രതിനിധികളും അഭ്യര്‍ത്ഥിച്ചിരുന്നു. പല പരീക്ഷാകേന്ദ്രങ്ങളും കണ്ടെയിന്‍മെന്റ് സോണുകളിലാണ്. കണ്ണൂര്‍,കോഴിക്കോട്, കേരള, മലയാളം,സംസ്‌കൃതം,രാജീവ് ഗാന്ധി ആരോഗ്യസര്‍വ്വകലാശാല, സാങ്കേതിക സര്‍വ്വകലാശാലകള്‍ പരീക്ഷകള്‍ മാറ്റിവച്ചു.

പുതിയ തീയതി പിന്നീട് അറിയിക്കും. കേരള സര്‍വ്വകലാശാല മേയ് പത്തു മുതല്‍ പരീക്ഷകള്‍ പുനരാരംഭിക്കുമെന്ന് അറിയിച്ചിട്ടുണ്ട്. കെ.ടി.യു. മൂന്നാം സെമസ്റ്റര്‍ പരീക്ഷ 15ന് തുടങ്ങിയിരുന്നു.




ഒന്നാം സെമസ്റ്റര്‍ 19ന് തുടങ്ങാനിരുന്നതാണ്. കാലിക്കറ്റ്,കേരള യൂണി. പരീക്ഷകള്‍ 19നാണ് തുടങ്ങാനിരുന്നത്.സി.ബി.എസ്.സി, ഐ.സി.എസ്.സി ഉള്‍പ്പെടെ ദേശീയ പരീക്ഷകളെല്ലാം മാറ്റിവച്ചിരിക്കുകയാണ്.

ദേശീയ മത്സര പരീക്ഷകളും മാറ്റി.അതേസമയം, എസ്.എസ്.എല്‍.സി, പ്‌ളസ് ടു.പരീക്ഷകള്‍ മാറ്റമില്ലാതെ തുടരുമെന്ന് പൊതുവിദ്യാഭ്യാസ ഡയറക്ടര്‍ ജീവന്‍ ബാബു അറിയിച്ചു.




എസ്. എസ്.എല്‍.സിക്ക് ഇന്ന് കണക്ക് പരീക്ഷയാണ്. പ്‌ളസ്ടുവിന് ഇന്ന് പരീക്ഷയില്ല. എസ്.എസ്.എല്‍.സി.ക്ക് അഞ്ച് വിഷയങ്ങളിലും പ്‌ളസ് ടുവിന് നാല് വിഷയങ്ങളിലുമാണ് പരീക്ഷ നടക്കാനുള്ളത്. പ്‌ളസ് ടു 26നും എസ്.എസ്.എല്‍.സി.29നും പരീക്ഷകള്‍ പൂര്‍ത്തിയാകും.

കൊവിഡ് കരുതലുകള്‍ പാലിച്ചും കെ.എസ്. ആര്‍.ടി.സി.യുടെ സഹായത്തോടെ യാത്രാസൗകര്യം ഒരുക്കിയും ആണ് എസ്. എസ്.എല്‍.സി. പരീക്ഷ നടത്തുന്നത്. സ്‌കൂള്‍ ബസുകളിലും സാമൂഹ്യ അകലം പാലിച്ച് വിദ്യാര്‍ത്ഥികളെ എത്തിക്കുന്നുണ്ട്.