സത്യപ്രതിജ്ഞാ ചടങ്ങ് വെര്ച്വല് പ്ലാറ്റ്ഫോമില് മതി; നിര്ദ്ദേശവുമായി ഐഎംഎ; തിരഞ്ഞെടുപ്പ് കാലത്ത് കാട്ടിയ വീഴ്ച വീണ്ടും ആവര്ത്തിക്കരുത്; നിലപാട് വ്യക്തമാക്കാതെ മുഖ്യമന്ത്രി
രണ്ടാം പിണറായി സര്ക്കാരിന്റെ സത്യപ്രതിജ്ഞ ചടങ്ങ് വെര്ച്വല് പ്ലാറ്റ്ഫോമില് നടത്തി കൊവിഡ് കാലത്ത് മാതൃകയാകണമെന്ന് ഇന്ത്യന് മെഡിക്കല് അസോസിയേഷന്. തിരഞ്ഞെടുപ്പ് കാലത്ത് മതിയായ സുരക്ഷാ മുന്കരുതലുകള് എടുക്കാതിരുന്നത് കൊവിഡ് വ്യാപനത്തിന്റെ പല കാരണങ്ങളില് ഒന്നാണ്. ജനഹിതം അറിഞ്ഞും ശാസ്ത്രീയ കാഴ്ചപ്പാടുകള് മുറുകെ പിടിച്ചും അധികാരത്തിലെത്തുന്ന പുതിയ സര്ക്കാര് സത്യപ്രതിജ്ഞാ ചടങ്ങ് ആള്ക്കൂട്ടം ഇല്ലാതെ വെര്ച്വലായി നടത്തണമെന്ന നിര്ദ്ദേശമാണ് ഐഎംഎ വാര്ത്താകുറിപ്പിലൂടെ മുന്നോട്ട് വച്ചത്.
ലോക്ഡൗണ് നീട്ടാനുള്ള സര്ക്കാര് നടപടിയെ ഐഎംഎ പ്രശംസിക്കുകയും ചെയ്തിട്ടുണ്ട്. വരുന്ന 20 നാണ് രണ്ടാം പിണറായി സര്ക്കാരിന്റെ സത്യപ്രതിജ്ഞ. കൊവിഡ് പ്രോട്ടോകോളും ലോക് ഡൗണ് അടക്കമുള്ള സാഹചര്യങ്ങളും നിലവിലുള്ളതിനാല് പൊതുജനങ്ങളെ പങ്കെടുപ്പിക്കുന്നില്ല. ക്ഷണിക്കപ്പെട്ട 800 പേര്ക്ക് ഇരിക്കാനുള്ള സൗകര്യങ്ങളാണ് തിരുവനന്തപുരം സെന്ട്രല് സ്റ്റേഡിയത്തില് സജ്ജമാക്കുന്നത്.
പുതിയ മന്ത്രിസഭയുടെ സത്യപ്രതിജ്ഞാ ചടങ്ങ് വിപുലമായി നടത്തി കൊവിഡ് പടര്ത്തരുതെന്ന് ആരോഗ്യ പ്രവര്ത്തകര് നേരത്തെ ആവശ്യപ്പെട്ടിയിരുന്നു. സംസ്ഥാനത്ത് ഭരണമാണ് വേണ്ടതെന്നും അതിന് ലളിതമായ സത്യപ്രതിജ്ഞാ ചടങ്ങാണ് വേണ്ടതെന്നും ഡോ. എസ്.എസ്. ലാല് പറഞ്ഞു. സത്യപ്രതിജ്ഞ സെന്ട്രല് സ്റ്റേഡിയത്തില് ആഘോഷമായി നടത്തരുത്. അതിനുള്ള ശ്രമങ്ങള് ജനവിരുദ്ധമാണ്. കൊവിഡ് രോഗം വ്യാപകമായി പടര്ന്ന് എല്ലായിടത്തും മരണങ്ങള് സംഭവിക്കുകയാണ്. നാട്ടുകാരോടാണ് സര്ക്കാരിന് കടപ്പാടെങ്കില് ആഘോഷ ആഭാസത്തിന് കൂട്ടുനില്ക്കരുതെന്നും അദ്ദേഹം ആവശ്യപ്പെട്ടു.
https://www.facebook.com/Malayalivartha
