ഇടവേളക്ക് ശേഷം കാനവും പിണറായിയും നേര്ക്കുനേര്; എങ്കില് പിന്നെ എല്ലാം എടുത്തോ എന്ന് കാനത്തിന്റെ മാസ് ഡയലോഗ്; സി പി ഐ യുടെ കൃഷി വകുപ്പ് കേരള കോണ്ഗ്രസ് മാണിക്ക് നീക്കം; വകുപ്പില് തൊട്ടാല് വിവരമറിയും എന്ന് സി.പി.ഐ
ഒരു ഇടവേളക്ക് ശേഷം കാനം രാജേന്ദ്രനും പിണറായി വിജയനും ഏറ്റുമുട്ടി. സി പി ഐ യുടെ കൃഷി വകുപ്പ് കേരള കോണ്ഗ്രസ് മാണിക്ക് നല്കാന് പിണറായി നീങ്ങിയപ്പോഴാണ് കാനം ഉടക്കിയത്. ഒന്നാം പിണറായി സര്ക്കാരിന്റെ ആദ്യകാലത്ത് ഇത്തരം ഉടക്കുകള് സജീവമായിരുന്നു. എന്നാല് കെ. എം. മാണി യു ഡി എഫിലേക്ക് മടങ്ങി പോയതോടെ അത്തരം ഉടക്കുകള് അവസാനിച്ചു.
സി പി ഐ യുടെ കൈയിലുള്ള വകുപ്പില് തൊട്ടാല് വിവരമറിയും എന്ന കാനത്തിന്റെ വീറോടെയുള്ള ജല്പ്പനങ്ങള്ക്ക് മുന്നില് പിണറായി കമാന്ന് ഒരക്ഷരം മിണ്ടിയില്ല.അല്ലെങ്കിലും അതാണ് അദ്ദേഹത്തിന്റെ രീതി. പാര വയ്ക്കാന് സമയമാകുമ്പോള് വയ്ക്കും.
പുതിയ സര്ക്കാരിലെ മന്ത്രിസ്ഥാനം സംബന്ധിച്ച ഉഭയകക്ഷിചര്ച്ചകള് അന്തിമഘട്ടത്തിലാകുന്നതിന് തൊട്ടു മുമ്പാണ് കാനവും പിണറായിയും ഉടക്കിയത് . ചര്ച്ചയുടെ ഒരു ഘട്ടത്തില് എങ്കില് എല്ലാം നിങ്ങള് എടുത്തോ എന്ന് പറഞ്ഞുകൊണ്ട് കാനം കസേരയില് നിന്നും എഴുന്നേറ്റു. പിണറായി അതിന് മറുപടി പറയാതിരുന്നതിനെ തുടര്ന്ന് കോടിയേരി ഇടപെടുകയായിരുന്നു. പിണറായിയും കാനവും തമ്മില് വഴക്കുണ്ടാകുമ്പോഴൊക്കെ കോടിയേരിയാണ് ഇടപെടാറുള്ളത്.
ഒടുവില് നാലുമന്ത്രിമാരും ഡെപ്യൂട്ടി സ്പീക്കര് സ്ഥാനവും എന്ന നിര്ദേശം സി.പി.ഐ. അംഗീകരിച്ചു. ചീഫ് വിപ്പ് സ്ഥാനം വിട്ടുനല്കും. മുഖ്യമന്ത്രി പിണറായി വിജയനും സി.പി.എം. പൊളിറ്റ് ബ്യൂറോ അംഗം കോടിയേരി ബാലകൃഷ്ണനും സി.പി.ഐ. സംസ്ഥാന സെക്രട്ടറി കാനം രാജേന്ദ്രനുമായി നടത്തിയ രണ്ടാംഘട്ട ചര്ച്ചയിലാണ് തീരുമാനം. പ്രസ്തുത തീരുമാനം കേരള കോണ്ഗ്രസ് നേതാക്കളെ സി പി എം അറിയിച്ചു. തീരുമാനം കേരള കോണ്ഗ്രസ് അംഗീകരിച്ചു.
പുതിയ കക്ഷികള് ഉള്ളതിനാല് ചില വകുപ്പുകളിലെ മാറ്റം സി.പി.ഐ.യും അംഗീകരിക്കുന്നുണ്ട്. എന്നാല്, നേരത്തേ കൈയിലുണ്ടായിരുന്ന റവന്യൂ, കൃഷി, സിവില് സപ്ലൈസ് വകുപ്പുകളൊന്നും വിട്ടുനല്കാനാകില്ലെന്ന നിലപാടിലാണവര്.
17-നു ചേരുന്ന മുന്നണിയോഗത്തിനുമുമ്പായി ഒരുതവണകൂടി കേരള കോണ്ഗ്രസുമായി ചര്ച്ചയുണ്ടാകും. ഒരു മന്ത്രിസ്ഥാനവും ചീഫ് വിപ്പ് സ്ഥാനവും അവര്ക്ക് നല്കും. രണ്ടാംവട്ട ചര്ച്ചയിലാകും ധാരണയാകുക. ഇതില് റോഷി അഗസ്റ്റിന് മന്ത്രിയും എന് ജയരാജ് വിപ്പുമാകും. വിപ്പിന് കാബിനറ്റ് പദവി നല്കും
ജോസ് കെ മാണിയുടെ പരാജയം സംഭവിച്ചില്ലായിരുന്നെങ്കില് ഒരു നല്ല വകുപ്പ് അവര്ക്ക് കിട്ടിയേനേ . ജോസിന് കിട്ടുന്ന പ്രാധാന്യം കേരള കോണ്ഗ്രസിലെ മറ്റ് നേതാക്കള്ക്ക് സി പി എമ്മും സി പി ഐയും നല്കില്ല
കൃഷിവകുപ്പ് ലഭിക്കണമെന്ന ആഗ്രഹം കേരള കോണ്ഗ്രസിനുണ്ട്. അതിനാണ് സി.പി.ഐ.യുമായുള്ള ചര്ച്ചയില് വകുപ്പുകൈമാറ്റം സംബന്ധിച്ച നിര്ദേശം സി.പി.എം. മുന്നോട്ടുവെച്ചത്. സി.പി.എമ്മിന്റെ കൈവശമുള്ള പൊതുമരാമത്തുവകുപ്പ് ഇവര്ക്ക് നല്കിയേക്കുമെന്നു സൂചനയുണ്ട്.
മന്ത്രിമാരുടെ എണ്ണം പരമാവധി 21 ആക്കി ഒറ്റയംഗങ്ങളുള്ള കക്ഷികളെക്കൂടി ഉള്പ്പെടുത്താമെന്ന നിലപാടില് സി.പി.ഐ.ക്കും സി.പി.എമ്മിനും എതിര്പ്പില്ല. എന്നാല്, അങ്ങനെയായാലും രണ്ടുകക്ഷികള്ക്കുമാത്രമേ മന്ത്രിസ്ഥാനം നല്കാനാകൂ. ഒറ്റയംഗങ്ങളുള്ള അഞ്ചുകക്ഷികള് മുന്നണിയിലുണ്ട്.
ഒന്നുകില്, ഇവര്ക്ക് ടേം അടിസ്ഥാനമാക്കി മന്ത്രിസ്ഥാനം പങ്കുവെക്കണം. അല്ലെങ്കില് ഏതെങ്കിലും മൂന്നുകക്ഷികളെ മാറ്റിനിര്ത്തണം. ഇക്കാര്യത്തില് എന്തു നിലപാട് സ്വീകരിക്കണമെന്ന് സി.പി.എം. ധാരണയാക്കിയശേഷം ഞായറാഴ്ച വീണ്ടും സി.പി.ഐ.യുമായി ചര്ച്ചനടത്തും.
കേരള കോണ്ഗ്രസ് (ബി), ജനാധിപത്യ കേരള കോണ്ഗ്രസ് എന്നിവര്ക്ക് മന്ത്രിസ്ഥാനം നല്കാനുള്ള ആലോചനയുണ്ട്. ഐ.എന്.എലിനും പരിഗണന നല്കണമെന്ന് സി.പി.എം. നേതാക്കള്ക്കുണ്ട്. ലോക് താന്ത്രിക് ജനതാദള്, കോണ്ഗ്രസ് (എസ്) എന്നിവയാണ് മറ്റുരണ്ട് ഒറ്റയംഗ കക്ഷികള്. ഇവര്ക്ക് നല്കുന്ന സ്ഥാനങ്ങളെന്തായിരിക്കണമെന്നതിലും സി.പി.എമ്മില് ഉടന് ധാരണയുണ്ടാക്കും.
കാനം പറഞ്ഞതെല്ലാം അംഗീകരിച്ചതോടെ തത്കാലം സി പി എമ്മും സി പി ഐയും തമ്മിലുള്ള വഴക്കുകള് അവസാനിച്ചു. ഇനിയുള്ള ഉടക്ക് ജോസ് കെ മാണിയുടെ രാജ്യസഭാ സീറ്റിന്റെ കാര്യത്തിലാവും
https://www.facebook.com/Malayalivartha
