കോഴിക്കോട് മെഡിക്കല്‍ കോളേജില്‍നിന്ന് മൃതദേഹം മാറി നല്‍കി. വിവരം അറിഞ്ഞത് സംസ്ക്കാരത്തിന് ശേഷം. പുരുഷന്‍റെ മൃതദേഹത്തിന് പകരം ബന്ധുക്കള്‍ക്ക് നല്‍കിയത് സ്ത്രീയുടെ മൃതദേഹം. കുന്ദമംഗലത്ത് മരിച്ചയാളുടെ മൃതദേഹമാണ് മാറി സംസ്കരിച്ചത്. കുന്ദമംഗലം പാണരുകണ്ടിയില്‍ സുന്ദരന്‍റെ (62) മൃതദേഹത്തിന് പകരം ബന്ധുക്കള്‍ക്ക് ലഭിച്ചത് കക്കോടി മോരിക്കര സ്വദേശി കൗസല്യയുടെ(76) മൃതദേഹമായിരുന്നു. സുന്ദരന്‍റെ ബന്ധുക്കള്‍ മൃതദേഹം ഞായറാഴ്ച രാവിലെ സംസ്കരിക്കുകയും ചെയ്തു.

കൗസല്യയുടെ മൃതദേഹം ബന്ധുക്കള്‍ തുറന്ന് പരിശോധിച്ചപ്പോഴാണ് മൃതദേഹം മാറിയതായി കണ്ടെത്തിയത്. തുടര്‍ന്ന് നടത്തിയ അന്വേഷണത്തിലാണ് സുന്ദരന്‍റെ മൃതദേഹമാണ് മാറിയതെന്ന് മനസ്സിലായത്. അപ്പോഴേക്കും കൗസുവിന്‍റെ മൃതദേഹം കളരിക്കണ്ടി ശ്മശാനത്തില്‍ സംസ്‌കരിച്ചിരുന്നു. തെറ്റ് പറ്റിയെന്നും, സുന്ദരന്‍റെ മൃതദേഹം സ്വന്തം ചെലവില്‍ തിങ്കളാഴ്ച സംസ്‌കരിക്കാന്‍ ഏര്‍പ്പാട് ചെയ്യാമെന്നും ആരോഗ്യ വകുപ്പ് ബന്ധുക്കള്‍ക്ക് ഉറപ്പ് നല്‍കി. എച്ച്‌ ഐ മാര്‍ മൃതദേഹം ആംബുലന്‍സില്‍ കയറ്റുമ്ബോല്‍ മാറിയതാണ് എന്നാണ് ഫോറന്‍സിക് മേധാവി ഡോ. പ്രസന്നന്‍ പറയുന്നത്.

ശനിയാഴ്ചയാണ് മെഡിക്കല്‍ കോളേജ് ആശുപത്രിയില്‍ ചികില്‍സയിലിരിക്കെ കൗസല്യ മരണപ്പെട്ടത്. മരിച്ചതിന് ശേഷമാണ് സുന്ദരന്‍റെ മൃതദേഹം ആശുപത്രിയിലെത്തിച്ചത്. മോര്‍ച്ചറില്‍ വെച്ചാണ് മൃതദേഹം മാറിയത്.

20 ലധികം മൃതദേഹങ്ങള്‍ മോര്‍ച്ചറിയിലുണ്ടായിരുന്നു. ഉച്ചക്ക്​ രണ്ടിനും മൂന്ന്​ മണിക്കിടയിലാണ്​ സംഭവം. കുന്ദമംഗലം കോ-ഓപറേറ്റീവ് ബാങ്ക് റിട്ട. പ്യൂണ്‍ ആയിരുന്നു​ പാണരുകണ്ടിയില്‍ സുന്ദരന്‍ (62). ശനിയാഴ്​ചയാണ്​ ഇദ്ദേഹം മരിച്ചത്​. നേരത്തെ തിരുവനന്തപുരം മെഡിക്കല്‍ കോളേജിലും കോവിഡ് രോഗിയുടെ മൃതദേഹം മാറി നല്‍കിയ സംഭവം റിപ്പോര്‍ട്ട് ചെയ്തിരുന്നു. പാലക്കാട്ടെ സ്വകാര്യ ആശുപത്രിയിലും മൃതദേഹം മാറി നല്‍കിയത് വിവാദമായിരുന്നു.