കോവിഡിനെതിരായ പ്രതിരോധത്തില്‍ കേരളം നിര്‍ണായക നീക്കം നടത്തുകയാണ്. കോവിഡിനെതിരായ മരുന്നു വികസിപ്പിക്കുന്നതില്‍ വിജയിച്ചു എന്ന് മാത്രമല്ല കോവാക്‌സിനെപ്പറ്റി ശുഭ വാര്‍ത്തയും വരുന്നുണ്ട്.

ഡിഫന്‍സ് റിസര്‍ച് ആന്‍ഡ് ഡവലപ്‌മെന്റ് ഓര്‍ഗനൈസേഷന്‍ അഥവാ ഡിആര്‍ഡിഒ വികസിപ്പിച്ച കോവിഡ് പ്രതിരോധ മരുന്ന് തിങ്കളാഴ്ച മുതല്‍ ലഭ്യമാകും. കേന്ദ്ര പ്രതിരോധ മന്ത്രി രാജ്‌നാഥ് സിങ് പതിനായിരത്തോളം ഡോസുകള്‍ ഡല്‍ഹിയിലെ ചില ആശുപത്രികള്‍ക്കു വിതരണം ചെയ്താണ് ഉദ്ഘാടനം നടത്തുക.

ഹൈദരാബാദ് ആസ്ഥാനമായുള്ള ഡോ. റെഡ്ഡീസ് ലബോറട്ടറീസുമായി സഹകരിച്ച് ഡിആര്‍ഡിഒ ലാബ് വികസിപ്പിച്ചെടുത്ത 2ഡിയോക്‌സിഡിഗ്ലൂക്കോസ് അഥവാ 2ഡിജി എന്ന മരുന്നാണു കോവിഡിനു നല്‍കുന്നത്. രാജ്യത്ത് അടിയന്തര ഉപയോഗത്തിനു ഡ്രഗ്‌സ് കണ്‍ട്രോളര്‍ ജനറല്‍ ഓഫ് ഇന്ത്യ (ഡിസിജിഐ) അനുമതി നല്‍കിയിരുന്നു.

രണ്ട്, മൂന്ന് ഘട്ട ക്ലിനിക്കല്‍ പരീക്ഷണങ്ങളില്‍ മികച്ച ഫലമാണു മരുന്നു കാണിച്ചത്. കോവിഡ് രോഗികളുടെ ആശുപത്രി വാസം കുറയ്ക്കുന്നതിനും അവരുടെ ഓക്‌സിജന്‍ ആശ്രിതത്വം കുറയ്ക്കുന്നതിനും മരുന്നു ഫലപ്രദമാണെന്നാണു കണ്ടെത്തല്‍. പൊടി രൂപത്തില്‍ ലഭ്യമാകുന്ന മരുന്ന് വെള്ളത്തിനൊപ്പം കഴിക്കാം.

കോവിഡ് ചികിത്സയ്ക്കു കൃത്യമായി മരുന്ന് ലഭ്യമായിട്ടില്ലാത്ത സാഹചര്യത്തില്‍ രോഗതീവ്രത കുറയ്ക്കുന്നതിന് ഉപയോഗിക്കുന്ന ചുരുക്കം ചിലതിന്റെ കൂട്ടത്തിലാണ് 2ഡിജിയും വരുന്നത്. കോവിഡിന്റെ രണ്ടാം തരംഗത്തില്‍ ഏതാനും ആഴ്ചകളായി മൂന്നു ലക്ഷത്തിലധികം കേസുകളും ആയിരക്കണക്കിനു മരണങ്ങളും റിപ്പോര്‍ട്ട് ചെയ്യുന്ന ഇന്ത്യയ്ക്കു വലിയ ആശ്വാസമാകും പുതിയ മരുന്നെന്നാണു പ്രതീക്ഷിക്കുന്നത്.

അതേസമയം ഇന്ത്യയില്‍ കണ്ടെത്തിയ ബി.1.167, യുകെയിലെ ബി.1.1.7 എന്നീ കൊറോണ വൈറസ് വകഭേദങ്ങള്‍ക്കെതിരെ ഇന്ത്യയുടെ തദ്ദേശീയ വാക്‌സീനായ കോവാക്‌സിന്‍ ഫലപ്രദമാണെന്നു നിര്‍മാതാക്കളായ ഭാരത് ബയോടെക്. നാഷനല്‍ ഇന്‍സ്റ്റിറ്റിയൂട്ട് ഓഫ് വൈറോളജിയും ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ചും നടത്തിയ പഠനത്തിലെ കണ്ടെത്തലുകള്‍ ക്ലിനിക്കല്‍ ഇന്‍ഫെക്ഷ്യസ് ഡിസീസസ് ജേണലില്‍ പ്രസിദ്ധീകരിച്ചു.

കോവാക്‌സിന്‍ വളര്‍ന്നുവരുന്ന എല്ലാ പ്രധാന വകഭേദങ്ങള്‍ക്കും എതിരെ ആന്റിബോഡികളുടെ സാന്ദ്രത ഉല്‍പാദിപ്പിക്കുന്നു എന്ന് പഠനം ഉദ്ധരിച്ചു ഭാരത് ബയോടെക് അവകാശപ്പെട്ടു. പുതിയ വകഭേദങ്ങള്‍ക്കെതിരായ സംരക്ഷണം വ്യക്തമാക്കുന്ന ശാസ്ത്രീയ ഗവേഷണ വിവരങ്ങള്‍ കോവാക്‌സിനു വീണ്ടും കിട്ടുന്ന രാജ്യാന്തര അംഗീകാരമാണ് എന്ന് ഭാരത് ബയോടെക്കിന്റെ സഹസ്ഥാപകയും ജോയിന്റ് മാനേജിങ് ഡയറക്ടറുമായ സുചിത്ര എല്ല ട്വീറ്റ് ചെയ്തു.

ജേണലിലെ ലേഖനത്തിന്റെ ലിങ്കും അവര്‍ ട്വീറ്റ് ചെയ്തു. ജനുവരിയില്‍ കോവിഷീല്‍ഡിനൊപ്പം അടിയന്തര അംഗീകാരം ലഭിച്ച കോവാക്‌സിന്റെ ലഭ്യതയെക്കുറിച്ചുള്ള ചര്‍ച്ചകള്‍ക്കു സുചിത്രയുടെ ട്വീറ്റ് വഴിവച്ചു. മൂന്നാംഘട്ട പരീക്ഷണം ശേഷിക്കുന്നതിനാല്‍ ക്ലിനിക്കല്‍ ട്രയല്‍ മോഡിലാണ് ഈ വാക്‌സീന്‍ ലഭ്യമാക്കിയിരിക്കുന്നത്.

രാജ്യത്തു കോവിഡ് വാക്‌സീന്‍ ദൗര്‍ലഭ്യം നേരിടുന്നതിനാല്‍ വാക്‌സിനേഷന്‍ മന്ദഗതിയിലാണ്. കൂടുതല്‍ കമ്പനികള്‍ വാക്‌സീന്‍ നിര്‍മിക്കണമെന്ന് ആവശ്യമുയരുന്നുണ്ട്. നിര്‍മാണത്തിനായി മറ്റു കമ്പനികള്‍ക്കു കോവാക്‌സിന്‍ നല്‍കണമെന്ന് ആളുകള്‍ പറയുന്നു.

ഭാരത് ബയോടെക്കുമായി ചര്‍ച്ച ചെയ്തപ്പോള്‍ ഇതു സ്വാഗതം ചെയ്തുവെന്നതില്‍ സന്തോഷിക്കുന്നു എന്നാണു നിതി ആയോഗ് അംഗം ഡോ. വി.കെ.പോള്‍ കഴിഞ്ഞദിവസം പറഞ്ഞത്. ഇത് നടപ്പിലായാല്‍ വളരെപ്പെട്ടെന്ന് കൂടുതല്‍ പേര്‍ക്ക് വാക്‌സിന്‍ നല്‍കാനാകും.