മന്ത്രി മേഴ്‌സിക്കുട്ടിയമ്മയെ തെരഞ്ഞെടുപ്പില്‍ തോല്‍പ്പിച്ച ആഴക്കടല്‍ മത്സ്യബന്ധനം തിരിച്ചടിച്ചിരിക്കുകയാണ്. ആഴക്കടല്‍ വിവാദത്തിന് പിന്നില്‍ വന്‍ ലോബിയുണ്ടെന്ന സൂചനകളാണ് പുറത്ത് വരുന്നത്.

അതിനിടെ നിയമസഭാ തിരഞ്ഞെടുപ്പ് ദിവസത്തെ ഇ.എം.സി.സി ബോംബാക്രമണ കേസില്‍ ചലച്ചിത്ര സീരിയല്‍ താരം പ്രിയങ്കയെ പൊലീസ് ചോദ്യം ചെയ്തു. ചാത്തന്നൂര്‍ എ.സി.പിയുടെ നേതൃത്വത്തിലുളള പൊലീസ് സംഘമാണ് ചോദ്യം ചെയ്യുന്നത്. തിരഞ്ഞെടുപ്പ് ഫണ്ടിംഗുമായി ബന്ധപ്പെട്ടാണ് നടപടി.

ഡെമോക്രാറ്റിക് സോഷ്യല്‍ ജസ്റ്റിസ് പാര്‍ട്ടിയുടെ (ഡി.എസ്.ജെ.പി) തിരഞ്ഞെടുപ്പ് ഫണ്ടിംഗിനെ കുറിച്ചുളള വിവരങ്ങള്‍ ശേഖരിക്കാനാണ് പ്രിയങ്കയെ ചോദ്യം ചെയ്യുന്നതെന്ന് പൊലീസ് പറഞ്ഞു. ബോംബാക്രമണവുമായി പ്രിയങ്കയ്ക്ക് നേരിട്ട് ബന്ധമില്ലെന്നും അന്വേഷണ ഉദ്യോഗസ്ഥര്‍ വ്യക്തമാക്കി. അരൂര്‍ നിയമസഭാ മണ്ഡലത്തിലെ ഡി.എസ്.ജെ.പി സ്ഥാനാര്‍ത്ഥിയായിരുന്നു പ്രിയങ്ക.

ബോംബാക്രമണക്കേസിലെ മുഖ്യപ്രതി ഇ.എം.സി.സി ഡയറക്ടര്‍ ഷിജു എം. വര്‍ഗീസും ഡി.എസ്.ജെ.പി സ്ഥാനാര്‍ത്ഥിയായിരുന്നു. ആഴക്കടല്‍ മത്സ്യബന്ധന പദ്ധതിക്കു സംസ്ഥാന സര്‍ക്കാരുമായി ധാരണാപത്രം ഒപ്പിട്ട അമേരിക്കന്‍ കമ്പനിയാണ് ഇ.എം.സി.സി.




നിയമസഭ തിരഞ്ഞെടുപ്പ് ദിവസം കൊല്ലം കുണ്ടറയില്‍വച്ച് ഇഎംസിസി ഡയറക്ടര്‍ സ്വന്തം വാഹനം കത്തിച്ച കേസിലാണ് അന്വേഷണ സംഘം നടി പ്രിയങ്കയുടെ മൊഴി എടുത്തത്. വിവാദ ഇടനിലക്കാരന്‍ നന്ദകുമാറാണ് ഷിജു വര്‍ഗീസിനെ പരിചയപ്പെടുത്തിയതെന്നും തിരഞ്ഞെടുപ്പ് ചെലവുകള്‍ വഹിച്ചതെന്നുമാണ് നടിയുടെ മൊഴി.

ഇക്കഴിഞ്ഞ നിയമസഭാ തിരഞ്ഞെടുപ്പില്‍ അരൂര്‍ മണ്ഡലത്തിലെ ഡിഎസ്‌ജെപി സ്ഥാനാര്‍ഥിയായിരുന്നു സീരിയല്‍ സിനിമ നടി പ്രിയങ്ക. ഇഎംസിസി ഡയറക്ടര്‍ ഷിജു എം.വര്‍ഗീസും ഡിഎസ്‌ജെപിയുടെ ബാനറിലാണ് ഫിഷറീസ് മന്ത്രിയായിരുന്ന ജെ. മേഴ്‌സിക്കുട്ടിയമ്മയ്‌ക്കെതിരെ കുണ്ടറയില്‍ മത്സരിച്ചത്. പാര്‍ട്ടിയുടെ വിവിധ തലങ്ങളിലുള്ള ഭാരവാഹികളുടെയും സ്ഥാനാര്‍ഥികളുടെയും മൊഴി എടുക്കുന്നുണ്ട്.

തെരഞ്ഞെടുപ്പിന്റെ സാമ്പത്തിക സ്രോതസിനെപ്പറ്റിയാണ് അന്വേഷിക്കുന്നത്. ഇതിന്റെ ഭാഗമായാണ് പ്രിയങ്കയെയും ചാത്തന്നൂര്‍ എസിപി ഓഫിസിലേക്ക് വിളിച്ചു വരുത്തിയത്. സ്ഥാനാര്‍ഥിയാക്കിയതും തിരഞ്ഞെടുപ്പു ചെലവുകള്‍ വഹിച്ചതും വിവാദ ഇടനിലക്കാരന്‍ നന്ദകുമാറാണെന്ന് പ്രിയങ്ക പൊലീസിനോട് പറഞ്ഞു.

വിവാദമായ ആഴക്കടല്‍ മല്‍സ്യബന്ധന കരാറില്‍ നന്ദകുമാറിന്റെ പങ്കിെനപ്പറ്റി മുഖ്യമന്ത്രി ഉള്‍പ്പടെയുള്ള സിപിഎം നേതാക്കള്‍ സംശയം പ്രകടിപ്പിച്ചിരുന്നു. നന്ദകുമാറിനോട് ചോദ്യം ചെയ്യലിന് ഹാജരാകന്‍ അന്വേഷണ സംഘം രണ്ടു തവണ ആവശ്യപ്പെട്ടെങ്കിലും ഇതുവരെ എത്തിയിട്ടില്ല. കേസില്‍ നേരത്തെ അറസ്റ്റിലായ ഷിജു വര്‍ഗീസ് ഉള്‍പ്പടെയുള്ളവര്‍ റിമാന്‍ഡിലാണ്.

അരൂരിലെ സ്ഥാനാര്‍ത്ഥിയായി മത്സരിക്കുമ്പോള്‍ മാനസികമായി ബുദ്ധിമുട്ട് നേരിട്ടിരുന്നതായും സ്ഥാനാര്‍ത്ഥിത്വം പിന്‍വലിക്കുന്നതിനെ കുറിച്ചുപോലും ആലോചിച്ചിരുന്നതായും പ്രിയങ്ക മാദ്ധ്യമങ്ങളോട് പറഞ്ഞു. തെരഞ്ഞെടുപ്പ് ചെലവിനായി പാര്‍ട്ടിയില്‍ നിന്ന് ലഭിക്കുമെന്ന് പറഞ്ഞിരുന്ന തുക ലഭിച്ചില്ല.

ഷിജു വര്‍ഗീസിന്റെ കാറിനു നേരെ പെട്രോള്‍ ബോംബ് എറിഞ്ഞതായും പിന്നീട് അദ്ദേഹം തന്നെയാണ് പ്രതിയെന്നും അറിഞ്ഞത് മാദ്ധ്യമങ്ങളിലൂടെയാണ്. ഷിജു വര്‍ഗീസിന്റെ ബിസിനസ് താത്പര്യങ്ങളോ കുടുംബകാര്യങ്ങളോ അറിയില്ല. പാര്‍ട്ടിയിലേക്കുക്ഷണിച്ചതും സ്ഥാനാര്‍ത്ഥിയാകാന്‍ നിര്‍ദ്ദേശിച്ചതും നന്ദകുമാറാണ്. താമസിക്കുന്ന ഫ്‌ളാറ്റിന് മുന്നിലെ ക്ഷേത്രത്തില്‍ വച്ചുള്ള പരിചയമാണ് നന്ദകുമാറുമായിട്ടുള്ളതെന്നും പ്രിയങ്ക പറഞ്ഞു.