നിറകണ്ണുകളോടെ ക്ഷീരകര്ഷകര്... കോവിഡ് കാലത്ത് പാല് വാങ്ങാന് ആളില്ലാതെ നശിക്കുന്ന പാല് ഏറ്റെടുത്ത് കര്ണാടക; കേരളത്തിലെ ക്ഷീര കര്ഷകര്ക്ക് ആശ്വാസം നല്കി മില്മയുടെ പ്രതിസന്ധി പരിഹരിക്കാമെന്ന് ഉറപ്പ്; എത്ര ടാങ്കര് പാല് എത്തിയാലും പൊടിയാക്കാനുള്ള സൗകര്യമുണ്ട്
ഒരവസരം കിട്ടിയാല് കര്ണാടകയേയും മുഖ്യമന്ത്രി യദ്യൂരപ്പയേയും കുറ്റം പറയുന്നവരാണ് നമ്മള് മലയാളികള്. അതേസമയം ഒരാപത്തു വന്നപ്പോള് കേരളത്തെ കയ്യയച്ച് സഹായിക്കുകയാണ് കര്ണാടക.
കേരളത്തിലെ ക്ഷീര കര്കര്ക്ക് ആശ്വാസമാകുന്ന പ്രഖ്യാപനവുമായി കര്ണാടക രംഗത്തെത്തിയിരിക്കുന്നത്. കേരളത്തില് നിന്ന് എത്ര ടാങ്കര് പശുവില് പാല് എത്തിയാലും തങ്ങളുടെ ഫാക്ടറികളില് പൊടിയാക്കാനുള്ള സൗകര്യം ഉണ്ടെന്ന് കര്ണാടക മില്മയെ അറിയിച്ചു. ഇതേടെ മലബാര് മേഖലയിലെ ക്ഷീര കര്ഷകരില്നിന്ന് കൂടുതല് പാല് സംഭരിക്കാന് മില്മ തീരുമാനിച്ചിട്ടുണ്ട്.
ലോക്ഡൗണ് പശ്ചാത്തലത്തില് വില്പന കുറഞ്ഞതിനാല് സംഭരിക്കുന്ന പാലിന്റെ അളവ് 60 ശതമാനമാക്കി കുറച്ചിരുന്നു. ഇത് കേരളത്തിലെ ക്ഷീര കര്ഷകരെ കടുത്ത പ്രതിസന്ധിയിലാക്കുകയും പട്ടിണിയിലേക്ക് തള്ളിവിടുകയും ചെയ്തിരുന്നു. കര്ണാടകയുടെ പുതിയ തീരുമാനത്തോടെ ഈ പ്രതിസന്ധിക്കാണ് അറുതി വന്നിരിക്കുന്നത്. കേരളത്തില് സംഭരിച്ച് മിച്ചംവരുന്ന പാല് കര്ണാടകയിലെ ഫാക്ടറികളിലേക്ക് അയച്ച് പൊടിയാക്കാനാണ് മില്മതീരുമാനിച്ചിരിക്കുന്നത്. മുന്പ് തമിഴ്നാട്ടിലെ ഫാക്ടറികളിലേക്ക് മാത്രമാണ് പാല് അയച്ച് മില്മ പൊടിയാക്കിയിരുന്നത്.
മൂന്നുലക്ഷം ലിറ്റര് പാലാണ് പ്രതിദിനം മലബാര് യൂണിയനില് മിച്ചം വന്നിരുന്നത്. ഇതു കര്ണാടകയിലെ ഫാക്ടറികളില് അയച്ച് പൊടിയാക്കാനുള്ള സംവിധാനം മില്മ ചെയ്തിട്ടുണ്ട്. കര്ണാടകയിലെ എല്ലാ ഫാക്ടറികളും മില്മയുടെ പാല് സംഭരിച്ച് പൊടിയാക്കി നല്കാമെന്ന് സമ്മതിച്ചിട്ടുണ്ട്. കേരളത്തിലെ ക്ഷീര കര്ഷകര് അനുഭവിച്ച വലിയ പ്രതിസന്ധിക്കാണ് ഇതോടെ അറുതിയാവുന്നത്.
കോവിഡ് രണ്ടാം തരംഗത്തിന്റെ ഭാഗമായുള്ള ലോക്ഡൗണില് മലബാറിലെ മിക്ക കടകമ്പോളങ്ങളും അടഞ്ഞു കിടക്കുന്നതിനാല് മില്മയുടെ പാല് വിപണനം ഗണ്യമായി കുറഞ്ഞിരിക്കുകയാണ്. എന്നാല് ക്ഷീരസംഘങ്ങളിലെ പാല് സംഭരണം നാള്ക്കുനാള് വര്ധിക്കുകയുമാണ്.
വില്പ്പന കഴിഞ്ഞ് മൂന്നു ലക്ഷം ലിറ്ററിലേറെ പാലാണ് നിലവില് മില്മയ്ക്ക് മിച്ചം വരുന്നത്. മിച്ചംവരുന്ന പാല് തമിഴ്നാട്ടിലെ സ്വകാര്യ പാല്പ്പൊടി നിര്മാണ കേന്ദ്രങ്ങളില് അയച്ച് പൊടിയാക്കുകയായിരുന്നു ചെയ്തിരുന്നത്. പാല് പൊടിയാക്കുന്നത് വന് നഷ്ടമാണെങ്കിലും അതുസഹിച്ച് കര്ഷകരോടൊപ്പം നില്ക്കുകയായിരുന്നു മില്മ. എന്നാല് ലോക്ഡൗണ് കാരണം മിച്ചം വരുന്ന പാല് തമിഴ്നാട്ടില് അയച്ച് പൊടിയാക്കാന് സാധിക്കുന്നില്ല. ഇത്തരമൊരു സാഹചര്യത്തിലാണ് പാല് സംഭരണം കുറച്ചത്.
ലോക്ഡൗണ് മാറി വിപണനം മെച്ചപ്പെടുകയും തമിഴ്നാട്ടിലെ ഫാക്ടറികളിലേക്ക് പൊടിയാക്കാന് കൂടുതല് പാല് അയക്കാനുള്ള സാഹചര്യമൊരുങ്ങുകയും ചെയ്യുന്ന പക്ഷം പാല് സംഭരണം പൂര്വ സ്ഥിതിയില് തുടരും. എല്ലാ കര്ഷകരും ക്ഷീര സംഘം ഭാരവാഹികളും സഹകരിക്കണമെന്ന് മില്മ മലബാര് മേഖലാ യൂണിയന് ചെയര്മാന് കെ.എസ്. മണി, മാനെജിംഗ് ഡയറക്ടര് പി. മുരളി പറഞ്ഞിരുന്നു. ഈയൊരു പ്രതിസന്ധിയാണ് കര്ണാടകയുടെ ഇടപെടലോടെ മാറിയത്.
അതേസമയം വിവിധ ഭാഗങ്ങളില് കുളമ്പുരോഗം വ്യാപകമായതോടെ നിരവധി കര്ഷകരാണ് പ്രതിസന്ധിയിലായത്. കന്നുകാലികള്ക്കുള്ള വാക്സിനേഷന് മുടങ്ങിയതാണ് ഇപ്പോള് വീണ്ടും കുളമ്പുരോഗം ഉണ്ടാകാന് കാരണമായത്. ഒരു വര്ഷത്തില് രണ്ടുതവണയാണ് വാക്സിനേഷന് നടത്തേണ്ടത്. കഴിഞ്ഞ വര്ഷം ഓഗസ്റ്റില് വാക്സിനേഷന് നടത്തിയ ശേഷം പിന്നിട് കോവിഡ് മൂലം നടന്നില്ല. പശുക്കള്ക്ക് പ്രതിരോധ ശേഷി കുറഞ്ഞ് ഇവ ചാകുന്നതു മൂലം പാല് ഉല്പാദനവും ഗണ്യമായി കുറഞ്ഞിരിക്കുകയാണ്.
കോവിഡ് കാലത്ത് ക്ഷീര കര്ഷകര് അനുഭവിക്കുന്ന ബുദ്ധിമുട്ടുകള്ക്ക് കുറെയെങ്കിലും പരിഹാരം കാണാന് യദ്യൂരപ്പയുടെ നടപടികള് സാധിക്കുമെന്നാണ് കര്ഷകര് കരുതുന്നത്.
"
https://www.facebook.com/Malayalivartha
