പീഡന പരാതി ഒതുക്കിതീര്‍ക്കാന്‍ ശ്രമിച്ച സംഭവവുമായി ബന്ധപ്പെട്ട് എ കെ ശശീന്ദ്രനെതിരെ ഉയര്‍ന്ന വിവാദത്തില്‍ പ്രതികരണവുമായി എന്‍സിപി സംസ്ഥാന അദ്ധ്യക്ഷന്‍ പി സി ചാക്കോ. എ.കെ. ശശീന്ദ്രന്‍ തെറ്റു ചെയ്‌തെന്ന് കണ്ടെത്തിയാല്‍ മന്ത്രി സ്ഥാനത്തു നിന്ന് നീക്കം ചെയ്യുമെന്ന് അദ്ദേഹം വ്യക്തമാക്കി. കോട്ടയത്ത് പ്രസ്‌ക്ലബില്‍ നടന്ന മീറ്റ് ദ പ്രസ് പരിപാടിയിലായിരുന്നു പി സി ചാക്കോയുടെ പ്രതികരണം.

പ്രാദേശികമായി ഉണ്ടായ തര്‍ക്കങ്ങളാണ് വിവാദം ആളിക്കത്തുന്നതിന് കാരണമായതെന്നും അദ്ദേഹം പറഞ്ഞു. സ്ത്രീ പീഡന വിഷയത്തില്‍ എന്‍.സി.പിക്ക് ഉറച്ച നിലപാടാണ് ഉള്ളത്. ഇക്കാര്യത്തില്‍ വിട്ടുവീഴ്ച ചെയ്യുന്ന നടപടി ഒരു കാരണവശാലും പാര്‍ട്ടിയുടെ ഭാഗത്തു നിന്ന് ഉണ്ടാകില്ല. പോലീസ് അന്വേഷണം കൃത്യമായി നടക്കണമെന്ന് അഭിപ്രായമാണുള്ളതെന്നും നീതിപൂര്‍വമായ അന്വേഷണം ഉണ്ടാകുമെന്ന് കരുതുന്നുവെന്നും അദ്ദേഹം വിശദമാക്കി. അന്വേഷണത്തിന് ശേഷം തുടര്‍ നടപടികളെക്കുറിച്ച്‌ ആലോചിക്കാമെന്നും പി സി ചാക്കോ പ്രതികരിച്ചു.

പെണ്‍കുട്ടിയുടെ പിതാവ് പീഡന ശ്രമത്തെ കുറിച്ച്‌ പറഞ്ഞിട്ടും ശശീന്ദ്രന്‍ എന്തുകൊണ്ടാണ് ഈ കാര്യം പൊലീസിനെ അറിയിക്കാതിരുന്നത് എന്ന മാദ്ധ്യമ പ്രവര്‍ത്തകരുടെ ചോദ്യത്തിന് പി സി ചാക്കോ വ്യക്തമായ ഉത്തരം നല്‍കിയില്ല. എന്‍.സി.പി സംസ്ഥാന നേതൃത്വത്തിനും ശശീന്ദ്രനും ഈ വിവാദത്തെ കുറിച്ച്‌ അറിയില്ലായിരുന്നു എന്നാണ് പി സി ചാക്കോ വിശദീകരിക്കുന്നത്.