ഇനിയെങ്കിലും മാറുമോ... ചില പോലീസുദ്യോഗസ്ഥര് അനാവശ്യമായി പിഴ ഈടാക്കി പൊതുജനങ്ങളെ ബുദ്ധിമുട്ടിക്കുന്നുവെന്ന് പരാതി; ബാങ്കിനു മുന്നില് ക്യൂ നിന്നവരില് നിന്നു പിഴ ഈടാക്കിയതുമായി ബന്ധപ്പെട്ട തര്ക്കം ചൂടുപിടിച്ചു; അന്വേഷണത്തിന് ഉത്തരവിട്ട് മനുഷ്യാവകാശ കമ്മീഷന്
ചില പോലീസുകാര് കാരണം സേനയ്ക്ക് മൊത്തം കളങ്കമുണ്ടാക്കുന്നത് ആദ്യത്തെ സംഭവമല്ല. അടുത്തകാലത്ത് ഫൈനുമായി ബന്ധപ്പെട്ട് നിരവധി പരാധികളാണ് ഉണ്ടായത്.
അവസാനം മനുഷ്യാവകാശ കമ്മീഷനും രംഗത്തെത്തി. ദുരിത കാലത്ത് ചില പോലീസുദ്യോഗസ്ഥര് മനുഷ്യാവകാശങ്ങള് ലംഘിക്കുന്ന തരത്തില് പെരുമാറുകയാണെന്ന പരാതിയെ കുറിച്ച് അന്വേഷിക്കണമെന്ന് സംസ്ഥാന മനുഷ്യാവകാശ കമ്മീഷന്. സംസ്ഥാന പോലീസ് മേധാവി പരാതികളെ കുറിച്ച് അന്വേഷണം നടത്തി 15 ദിവസത്തിനകം റിപ്പോര്ട്ട് സമര്പ്പിക്കണമെന്ന് കമ്മീഷന് ജുഡീഷ്യല് അംഗം കെ. ബൈജുനാഥ് ആവശ്യപ്പെട്ടു.
മനുഷ്യാവകാശ പ്രവര്ത്തകനായ നൗഷാദ് തെക്കയില് സമര്പ്പിച്ച പരാതിയിലാണ് നടപടി. ചില ഉദ്യോഗസ്ഥര് അനാവശ്യമായി പിഴ ഈടാക്കി പൊതുജനങ്ങളെ ബുദ്ധിമുട്ടിക്കുകയാണെന്ന് പരാതിയില് പറയുന്നു.
കഴിഞ്ഞ ദിവസം ബാങ്കിനു മുന്നില് ക്യൂ നിന്നവരില് നിന്നു പിഴ ഈടാക്കിയതുമായി ബന്ധപ്പെട്ട തര്ക്കത്തില് ഇടപെട്ട വിദ്യാര്ഥിനിക്കെതിരെ കേസെടുത്ത ചടയമംഗലം പൊലീസിന് എതിരെ വ്യാപക പ്രതിഷേധം ഉയര്ന്നിരുന്നു. ജാമ്യം ലഭിക്കുന്ന വകുപ്പാണ് ചുമത്തിയതെന്നതായിരുന്നു പൊലീസ് വിശദീകരണം. ജോലി തടസപ്പെടുത്തിയതിന് ജാമ്യമില്ലാവകുപ്പ് ചുമത്തിയെന്ന് കഴിഞ്ഞദിവസം പൊലീസ് അധികൃതര് പറഞ്ഞിരുന്നെങ്കിലും കേരള പൊലീസ് ആക്ട് 117 (ഇ)പ്രകാരമാണ് കേസ് എടുത്തത്.
ചടയമംഗലം അക്കോണം ഇടുക്കുപാറ സ്വദേശി ഗൗരിനന്ദയ്ക്ക്(18) എതിരെയാണ് പൊലീസ് കേസ് എടുത്തത്. ക്യൂവില് നിന്നതിന് പെറ്റി ലഭിച്ചയാളും പൊലീസും തമ്മില് തര്ക്കമുണ്ടാകുന്നതു കണ്ട ഗൗരി കാര്യം തിരക്കിയപ്പോള് പൊലീസ് ഗൗരിക്ക് എതിരെയും പെറ്റി എഴുതാന് ശ്രമിച്ചെന്നും പ്രതിഷേധിച്ചപ്പോള് അസഭ്യം വിളിച്ചെന്നും കേസ് എടുത്തെന്നുമാണ് ഗൗരിയുടെ പരാതി. കേസ് എടുത്തതിന് എതിരെ സംസ്ഥാന പൊലീസിന്റെ ഔദ്യോഗിക ഫെയ്സ്ബുക് പേജില് നൂറുകണക്കിന് ആളുകളാണ് പ്രതിഷേധവുമായി എത്തിയത്.
തുടര്ന്ന് ഒരു ഓണ്ലൈന് മാധ്യമത്തിലൂടെ വിശദീകരണവുമായി ചടയമംഗലം പൊലീസ് എത്തി. എസ്ഐ എസ്. ശരലാല് പറഞ്ഞത്: 'ചടയമംഗലം പഞ്ചായത്ത് കണ്ടെയ്ന്മെന്റ് സോണ് ആണ്. കഴിഞ്ഞ ദിവസം സാമൂഹിക അകലം പാലിക്കാതെ ഏറെപ്പേര് തടിച്ചുകൂടിയെന്ന ഫോണ്കോള് സ്റ്റേഷനില് വന്നതിനെ തുടര്ന്നാണ് ബാങ്കിന്റെ മുന്നില് എത്തിയത്. ആരോപണം ഉയരുന്നതു പോലെ, പെറ്റി നല്കിയിട്ടില്ല. കോവിഡ് മാനദണ്ഡം പാലിക്കണമെന്ന വാണിങ് നോട്ടിസാണ് നല്കിയത്. അപ്പോള് ആ പെണ്കുട്ടി പറഞ്ഞത് 'നോട്ടിസ് നല്കുന്ന ഉദ്യോഗസ്ഥനായ ഞാന് സാമൂഹിക അകലം പാലിച്ചിട്ടില്ലെന്നും രണ്ടു പേര്ക്കും പെറ്റി വേണമെന്നുമാണ്.
നിയമം നടപ്പിലാക്കുന്ന ഉദ്യോഗസ്ഥന് പെറ്റി നല്കുന്നത് സാധ്യമല്ലെന്നു പറഞ്ഞപ്പോള് പെണ്കുട്ടി വാശിപിടിച്ചു. പെണ്കുട്ടിയുടെ പ്രവൃത്തി മൂലം നോട്ടിസ് നല്കാന് സാധിച്ചില്ല. എപ്പിഡെമിക് ആക്ട് പ്രകാരവും കുട്ടിക്ക് എതിരെ കേസെടുത്തിട്ടുണ്ട്.' അതേസമയം തനിക്കെതിരെ പെറ്റി ചുമത്തുന്നു എന്നു തന്നെയാണ് ഉദ്യോഗസ്ഥര് പറഞ്ഞതെന്ന് ഗൗരിനന്ദ പറഞ്ഞു. 'നോട്ടിസ് നല്കിയതാണെങ്കില് പ്രതികരിക്കില്ലായിരുന്നു. അസഭ്യം പറഞ്ഞപ്പോഴാണ് ശക്തമായി പ്രതികരിച്ചത്.
ചെറിയ കുറ്റങ്ങള്ക്ക് ഭീമമായ പിഴ ചുമത്തുന്നത് വലിയ പ്രതിഷേധത്തിനാണ് വഴി ഒരുക്കിയത്. പ്രത്യേകിച്ച് വ്യാപാര സ്ഥാപനങ്ങള്ക്ക് എതിരെ പല സ്ഥലങ്ങളിലും പിഴ ചുമത്തുന്നതിന് എതിരെ വ്യാപാരികളും രംഗത്ത് വന്നിരുന്നു. ഇതിന് പിന്നാലെയാണ് മനുഷ്യവകാശ കമ്മീഷന്റെ ഇടപെടല് ഉണ്ടായിരിക്കുന്നത്.
"
https://www.facebook.com/Malayalivartha