നീലച്ചിത്ര നിര്‍മാണവുമായി ബന്ധപ്പെട്ട് ഭര്‍ത്താവ് രാജ് കുന്ദ്ര അറസ്റ്റിലായതിനെ തുടര്‍ന്ന് ബോളിവുഡ് താരം ശില്‍പ ഷെട്ടി ആകെ തളര്‍ന്ന് പോയിരുന്നു. മാധ്യമങ്ങളുടെ നിരന്തരമായ ആക്രമണത്തില്‍ പ്രതിഷേധിച്ച് ശില്‍പ രംഗത്തെത്തി.

ആദ്യമായാണ് താരം ഈ വിഷയത്തില്‍ പ്രതികരണം അറിയിക്കുന്നത്. വെല്ലുവിളി നിറഞ്ഞ ദിവസങ്ങളിലൂടെയാണ് കടന്നുപോകുന്നതെന്നും മാധ്യമങ്ങള്‍ പ്രചരിപ്പിക്കുന്നവയില്‍ പലതും സത്യമല്ലെന്നും ശില്‍പ പറയുന്നു. മാധ്യമ വിചാരണ തങ്ങള്‍ക്ക് ആവശ്യമില്ലെന്നും നിയമം നിയമത്തിന്റെ വഴിക്ക് പോകട്ടെയെന്നും ശില്‍പയുടെ കുറിപ്പില്‍ വ്യക്തമാക്കുന്നു.

കഴിഞ്ഞ കുറച്ചു ദിവസങ്ങള്‍ വെല്ലുവിളികളുടേതായിരുന്നു. എല്ലാ അര്‍ഥത്തിലും. ധാരാളം അഭ്യൂഹങ്ങളും ആരോപണങ്ങളും ഉണ്ടായിട്ടുണ്ട്. മാധ്യമങ്ങളും അഭ്യുദയകാംക്ഷികളും എന്നെ അനാവശ്യമായി അധിക്ഷേപിച്ചു. എനിക്കും എന്റെ കുടുംബത്തിനും നേരെ ഒരുപാട് ചോദ്യങ്ങളും ട്രോളുകളും ഉയര്‍ന്നു. ഇതില്‍ എന്റെ നിലപാട് ഞാനിത് വരെ വ്യക്തമാക്കിയിരുന്നില്ല.

ഇനിയും അത് ചെയ്യുന്നതില്‍ നിന്ന് വിട്ടുനില്‍ക്കും, കാരണം ഇത് നിയമത്തിന്റെ പരിധിയില്‍ വരുന്നതാണ്, അതിനാല്‍ ദയവായി എന്റെ പേരില്‍ തെറ്റായ വാര്‍ത്തകള്‍ നല്‍കുന്നത് നിര്‍ത്തുക. ഒരു സെലിബ്രിറ്റി എന്ന നിലയില്‍ 'ഒരിക്കലും പരാതിപ്പെടരുത്, ഒരിക്കലും വിശദീകരിക്കരുത്' എന്ന എന്റെ തത്വശാസ്ത്രം ആവര്‍ത്തിക്കുന്നു. എനിക്ക് പറയാനുള്ളത്, ഇതിപ്പോള്‍ നടന്നുകൊണ്ടിരിക്കുന്ന അന്വേഷണമായതിനാല്‍, എനിക്ക് മുംബൈ പോലീസിലും ഇന്ത്യന്‍ നിയമവ്യവസ്ഥയിലും പൂര്‍ണ വിശ്വാസമുണ്ട്.

ഒരു കുടുംബമെന്ന നിലയില്‍, ലഭ്യമായ നിയമപരമായ എല്ലാ പരിഹാരങ്ങളും ഞങ്ങള്‍ തേടുന്നുണ്ട്. പക്ഷേ, അതുവരെ ഞാന്‍ നിങ്ങളോട് വിനീതമായി അഭ്യര്‍ഥിക്കുകയാണ്, പ്രത്യേകിച്ച് ഒരു അമ്മയെന്ന നിലയില്‍, എന്റെ കുട്ടികള്‍ക്കുവേണ്ടി ഞങ്ങളുടെ സ്വകാര്യതയെ മാനിക്കണമെന്നും വാര്‍ത്തകളുടെ സത്യസന്ധത പരിശോധിക്കാതെ അഭിപ്രായം പറയരുതെന്നും അഭ്യര്‍ത്ഥിക്കുന്നു.

നിയമം അനുസരിക്കുന്ന ഒരു ഇന്ത്യന്‍ പൗരനും കഴിഞ്ഞ 29 വര്‍ഷമായി സിനിമയിലുള്ള ആളുമാണ് ഞാന്‍. എന്നിലുള്ള നിങ്ങളുടെ വിശ്വാസം ഞാന്‍ ഒരിക്കലും തകര്‍ക്കില്ല. അതുകൊണ്ടു തന്നെ എന്നെയും എന്റെ കുടുംബത്തിന്റെയും സ്വകാര്യതയെ നിങ്ങള്‍ ബഹുമാനിക്കണം. ഞങ്ങളെ മാധ്യമങ്ങള്‍ വിചാരണ ചെയ്യേണ്ട ആവശ്യമില്ല, നിയമം നിയമത്തിന്റെ വഴിക്ക് പോകട്ടെ, സത്യമേവ ജയതേ

അതേസമയം തെളിവ് നശിപ്പിക്കാന്‍ തുടങ്ങിയതിനാലാണ് ശില്‍പ ഷെട്ടിയുടെ ഭര്‍ത്താവുമായ രാജ് കുന്ദ്രയെയും സഹായി റയാന്‍ തോര്‍പെയെയും അറസ്റ്റ് ചെയ്തതെന്നാണ് പോലീസ് വാദം.

രാജ് കുന്ദ്രയുടെ ഓഫീസില്‍നിന്നും വീട്ടില്‍ നിന്നുമായി രണ്ടു ആപ്പുകളിലെ 51 നീലച്ചിത്രങ്ങള്‍ മുംബൈ ക്രൈംബ്രാഞ്ച് പിടിച്ചെടുത്തിട്ടുണ്ട്. കുന്ദ്രയും തോര്‍പെയും വാട്‌സാപ്പ് ചാറ്റുകളും ഗ്രൂപ്പുകളും ഡിലീറ്റ് ചെയ്ത് തെളിവുനശിപ്പിക്കാന്‍ ശ്രമിച്ചതോടെയാണ് അറസ്റ്റ് ചെയ്തതെന്ന് പബ്ലിക് പ്രോസിക്യൂട്ടര്‍ അരുണ പൈ കോടതിയെ അറിയിച്ചു.

അറസ്റ്റിലായതോടെ കുന്ദ്രയുടെ അഭിഭാഷകന്‍ അബാദ് പോണ്ട വഴി ബോംബൈ ഹൈക്കോടതിയില്‍ ഹര്‍ജി നല്‍കിയിരുന്നു. അറസ്റ്റിനെ ചോദ്യംചെയ്തുകൊണ്ടുള്ള ഹര്‍ജി പരിഗണിക്കുകയായിരുന്നു കോടതി. കേസ് വീണ്ടും വാദം കേള്‍ക്കാനായി മാറ്റി. അന്വേഷണത്തില്‍ സഹകരിക്കുന്നതിന് പകരം തെളിവ് നശിപ്പിക്കാനായിരുന്നു ഇവരുടെ ശ്രമം. തെളിവ് നശിപ്പിക്കുന്നത് അന്വേഷണത്തെ പ്രതികൂലമായി ബാധിക്കും. ഇത് ഒഴിവാക്കാനായിരുന്നു ഇവരെ അറസ്റ്റ് ചെയ്തതെന്നും അദ്ദേഹം കോടതിയെ അറിയിച്ചു.

കൂടാതെ കുന്ദ്രയുടെ ലാപ്‌ടോപ്പ്, മൊബൈല്‍ ഫോണ്‍, സ്‌റ്റോറേജ് ഏരിയ നെറ്റ്‌വര്‍ക്ക് എന്നിവയില്‍ നിന്ന് കൂടുതല്‍ രേഖകള്‍ പിടിച്ചെടുത്തിട്ടുണ്ടെന്നും അദ്ദേഹം കോടതിയില്‍ പറഞ്ഞു.