കൊവിഡ് ചികിത്സയിലിരുന്ന യുവാവ് പിപിഇ കിറ്റ് ധരിച്ചെത്തി സുഹൃത്തായ യുവതിയെ പീഡിപ്പിച്ചെന്ന് പരാതിയുമായി യുവതി രംഗത്ത്. തിരുവനന്തപുരത്ത് കൊവിഡ് 19 സന്നദ്ധപ്രവര്‍ത്തകനായ മഹേഷ് പരമേശ്വരനെതിരെയാണ് പരാതി.

ഇയാള്‍ക്കെതിരെ പോലീസ് കേസെടുത്തിട്ടുണ്ടെന്നാണ് പുറത്ത് വരുന്ന റിപ്പോർട്ട്. കൊവിഡ് 19 പോസിറ്റീവായി ചികിത്സയിലിരിക്കേ തന്നെ തിരുവനന്തപുരത്തെ വീട്ടിലെത്തി യുവാവ് പീഡിപ്പിച്ചെന്നാണ് യുവതി പരാതി നല്‍കിയത്.

വിവാഹ വാഗ്ദാനം നല്‍കിയ പ്രതി ജാതി അധിക്ഷേപം നടത്തി പിന്മാറിയെന്നും യുവതിയുടെ പരാതിയിൽ പറയുന്നു. യുവതിയും യുവാവും സന്നദ്ധ പ്രവര്‍ത്തനങ്ങളിൽ പങ്കെടുത്തിരുന്നുവെന്നാണ് റിപ്പോര്‍ട്ടിൽ പറയുന്നത്.

സംഭവം നടന്നത് എപ്രിൽ മാസത്തിലെന്നാണ് കരമന പോലീസിൽ നല്‍കിയ പരാതിയിൽ പറയുന്നത്. പിതാവിനും തനിക്കും കൊവിഡ് ബാധിച്ചതോടെ പിതാവിനെ ആശുപത്രിയിലേയ്ക്ക് മാറ്റുകയായിരുന്നു. ഈ സമയത്ത് ആശുപത്രിയിൽ പിതാവിന് ആവശ്യമായ സാധനങ്ങള്‍ എടുക്കാനായി വീട്ടിലേയ്ക്ക് വരികയായിരുന്നു.

പിപിഇ കിറ്റ് ധരിച്ച് മഹേഷും ഈ സമയം ഒപ്പം കൂടുകയായിരുന്നു. വീട്ടിലെത്തിയ ഉടൻ യുവാവ് തന്നെ പീഡിപ്പിക്കുകയും. യുവതി ആത്മഹത്യയ്ക്ക് ശ്രമിച്ചെങ്കിലും വിവാഹവാഗ്ദാനം നല്‍കി ഇയാള്‍ പിന്തിരിപ്പിക്കുകയായിരുന്നുവെന്നും യുവതി ആരോപിച്ചു. തന്നെ വിവാഹം ചെയ്യുമെന്ന് അച്ഛനോടും ഇയാള്‍ അറിയിച്ചിരുന്നുവെന്നും യുവതി

 എന്നാൽ കൊവിഡ് ബാധിതനായ അച്ഛൻ മരിച്ചതിനു പിന്നാലെ മഹേഷ് വിവാഹത്തിൽ നിന്ന് പിന്മാറിയെന്ന് യുവതി പരാതിയിൽ ചൂണ്ടിക്കാട്ടി. താൻ വിവാഹിതനാണെന്ന് മഹേഷ് വെളിപ്പെടുത്തി. തനിക്കെതിരെ ജാതി അധിക്ഷേപം നടത്തിയെന്നും പട്ടികജാതി വിഭാഗത്തിൽപ്പെട്ട യുവതി പരാതിയിൽ പറയുന്നുണ്ട്. ഫോര്‍ട്ട് അസിസ്റ്റൻ്റ് കമ്മീഷണര്‍ക്കാണ് അന്വേഷണ ചുമതലയുള്ളത്.