രണ്ടാം പിണറായി സര്‍ക്കാരിന്റെ തുടക്കം അത്രകണ്ടു മെച്ചമല്ലെന്ന് പൊതുവിലയിരുത്തല്‍ സിപിഎം നേതൃത്വവും ശരിവയ്ക്കുകയാണ്. ശരാശരി നിലവാരത്തിലേക്ക് ഉയരാന്‍ പുതിയ മന്ത്രിസഭയിലെ ഏറെ മന്ത്രിമാര്‍ക്കും സാധിക്കുന്നില്ലെന്ന വിമര്‍ശനം രണ്ടാഴ്ചയ്ക്കുള്ളില്‍ സംസ്ഥാന സെക്രട്ടറിയേറ്റും തൊട്ടുപിന്നാലെ ഇടതുമുന്നണി ഏകോപന സമിതിയും യോഗം ചേരുകയാണ്. വന്‍താരങ്ങളായി മാറുമെന്ന പ്രതീക്ഷ ജനിപ്പിച്ച മന്ത്രിമാര്‍ പ്രായോഗികതലത്തില്‍ ശരാശരിയിലേക്കുപോലും ഉയരുന്നില്ല.

അനുഭവജ്ഞാനവും പ്രവര്‍ത്തന പരിചയവുമില്ലാത്ത പുതുമുഖങ്ങളെ വരെ മന്ത്രിക്കസേരയില്‍ എത്തിച്ചതിന്റെ പാളിച്ച ഭരണത്തില്‍ നിഴലിക്കുന്നതായാണ് പാര്‍ട്ടിയുടെ വിലയിരുത്തല്‍. പുതുമുഖങ്ങളെ നിരത്തിയുള്ള പുതിയ അവതരണം മുന്നണിക്കു ഗുണത്തേക്കാള്‍ ദൂഷ്യമാണുണ്ടാക്കിയതെന്ന് സിപിഎമ്മിനും സിപിഐയ്ക്കും തോന്നിത്തുടങ്ങിയിരിക്കുന്നു.

വനം വെളിപ്പിച്ചതും മരങ്ങള്‍ വെട്ടിനിരത്തിയതിലും ഉള്‍പ്പെടെ ഭരണത്തിന്റെ തുടക്ക വേളയില്‍തന്നെ സര്‍ക്കാരിനു കാതലായ പാളിച്ച സംഭവിച്ചു. ഇതിനൊപ്പമാണ് നിയമസഭാ കൈയാംകളി കേസില്‍ മന്ത്രി വി ശിവന്‍കുട്ടി ഉള്‍പ്പെടെ ഒരു നിര എംഎല്‍എമാര്‍ക്ക് തിരിച്ചടി നേരിടേണ്ടിവന്നിരിക്കുന്നത്. റോഷി അഗസ്റ്റിന്‍, പിഎ മുഹമ്മദ് റിയാസ്, വിഎന്‍ വാസവന്‍ തുടങ്ങി ഒരു നിര മന്ത്രിമാര്‍ മാത്രമാണ് തുടക്കത്തില്‍ ഇമേജുണ്ടാക്കിയത്.വി ശിവന്‍കുട്ടി, ആര്‍ ബിന്ദു, ജെ ചിഞ്ചുറാണി, പി പ്രസാദ്, പി രാജീവ്, വീണ ജോര്‍ജ് തുടങ്ങിയവരിലൊന്നും ഭരണപ്രതിഭ തെളിഞ്ഞുകാണുന്നില്ലെന്നാണ് പൊതുവിമര്‍ശനം. നിയമസഭയിലെ കയ്യാങ്കളിയില്‍ വിചാരണ നേരിടാന്‍ പോകുന്ന ശിവന്‍കുട്ടി വിദ്യാഭ്യാസ മന്ത്രി എന്ന നിലയില്‍ നടത്തുന്ന പത്രസമ്മേളനങ്ങളെല്ലാം ഫൗളായി മാറുന്നു. . പ്രസംഗങ്ങളിലും പത്രസമ്മേളനങ്ങളിലും ഇദ്ദേഹത്തിന്റെ ഭാഷയും ശരീരഭാഷയും ഹാസ്യപരിപാടിയായി സാമൂഹ്യമാധ്യമങ്ങളില്‍ ട്രോളിക്കൊണ്ടിരിക്കുന്നു. പരീക്ഷ എഴുതിയ കുട്ടികളുടെ എണ്ണത്തെക്കാള്‍ കുട്ടികള്‍ വിജയിച്ചതായി വിടുവായത്തരം പറയുന്ന ഒരു മന്ത്രി. പ്രഫ. സി രവീന്ദ്രനാഥിനെപ്പോലെ അതിപ്രഗത്ഭനായ മന്ത്രി ഇരുന്നു ഭരിച്ച കസേരയിലിരുന്നാണ് ശിവന്‍കുട്ടി അടിമുടി ഹാസ്യതാരമായി മാറുന്നത്.

ഒന്നാം പിണറായി സര്‍ക്കാരിന്റെ നോട്ടവും നേട്ടവും ആ മന്ത്രിസഭയിലെ പ്രഗത്ഭരായ മന്ത്രിമാരായിരുന്നു. കൃഷിമന്ത്രി പി സുനില്‍കുമാറും തോമസ് ഐസക്കും കെകെ ശൈലജ ടീച്ചറുമൊക്കെ ഭരണമികവുകൊണ്ട് ചരിത്രത്തില്‍ ഇടംനേടിയവരാണ്. നിപ്പയും കോവിഡും എലിപ്പനിയും കേരളത്തെ രോഗക്കിടക്കയിലാഴ്ത്തിയ കാലത്ത് ശൈലജ ടീച്ചര്‍ എന്ന വനിതയുടെ അപാരമായ പ്രാപ്തി കേരളം മാത്രമല്ല ദേശീയ മാധ്യമങ്ങള്‍ വരെ വാഴ്ത്തിയിട്ടുണ്ട്. ടീച്ചറമ്മ എന്ന വിശേഷണം ഇത്തരത്തില്‍ ആദരവിന് നല്‍കിയ അംഗീകാരമായിരുന്നു.

കെ. കെ ശൈലജ ടീച്ചറെക്കാള്‍ പ്രതിഭയാകുമെന്ന പ്രതീക്ഷ സമ്മാനിച്ച വീണ ജോര്‍ജിനും തുടക്കം പാളിയിരിക്കുന്നു. കോവിഡ് മരണക്കണക്കിലെ അവ്യക്തതയ്ക്ക് വ്യക്തമായ ഉത്തരം നല്‍കാന്‍ സാധിച്ചില്ല. മാത്രവുമല്ല രണ്ടാം കോവിഡ് തരംഗത്തിന്റെ വ്യാപനത്തെ നേരിടുന്നതില്‍ ഇവര്‍ പരാജയപ്പെടുകയും ചെയ്തു. ഇനി മൂന്നാം തരംഗമുണ്ടായാല്‍ എന്തു സംഭവിക്കും എന്ന ആശങ്കയിവാണ് കേരളം. കേവലം ഓണക്കിറ്റും ക്ഷേമപ്രഖ്യാപനങ്ങളും മാത്രം നിരത്തി മുന്നോട്ടുപോകില്ലെന്ന താണ് നിലവിലെ സാഹചര്യം.

ഐഎന്‍എല്‍ പാര്‍ട്ടിയിലുണ്ടായ കൂട്ടയടി മന്ത്രി അഹമ്മദ് തേവര്‍കോവിലിനു മാത്രമല്ല ഇടതുമുന്നണിക്ക് അപ്പാടെ കളങ്കമായി മാറി.പ്രതിപക്ഷത്ത് 40 അംഗങ്ങളേയുള്ളുവെങ്കിലും ഏറെയെണ്ണവും പുലികളാണെന്ന് നിയമസഭയില്‍ കണ്ടുകഴിഞ്ഞു. ഉമ്മന്‍ ചാണ്ടിയുടെ ശാന്തസ്വഭാവത്തിലല്ല വിഡി സതീശന്റെ പ്രകടനം. രമേശ് ചെന്നിത്തല നന്നായി പ്രവര്‍ത്തിച്ചെങ്കിലും ശരങ്ങള്‍ ഉന്നത്തില്‍ കൊള്ളിക്കുന്നതില്‍ പരാജയപ്പെട്ടു എന്ന വിമര്‍ശനം ബാക്കി നില്‍ക്കുന്നു. എന്നാല്‍ ഓരോ വിഷയവും ആധികാരികമായ പഠിച്ച് ഇരുത്തം വന്ന ഭാഷയില്‍ അവതരിപ്പിക്കുന്നതില്‍ പ്രതിപക്ഷ നേതാവ് വിഡി സതീശന്റെ പ്രകടനം അപാരമായി മാറുന്നു. പിണറായി മന്ത്രിസഭയിലെ ഒരു നിര മന്ത്രിമാരുടെ സംഭാണവും പെരുമാറ്റവും പിണറായിയെപ്പോലെ പരുക്കനാണെന്ന് ജനം പറയുന്നു.

വിഷയം പഠിക്കുന്നതിലും പ്രശ്‌നങ്ങളെ കൈകാര്യം ചെയ്യുന്നതിലും ഇവര്‍ക്ക് പാളിച്ച സംഭവിക്കുന്നു. നിയമസഭയിലും പുറത്തും ഇവരുടെ ഭാഷയും പ്രതികരണവും പലപ്പോഴും അവ്യക്തമായി മാറുകയും ചെയ്യുന്നു. ഓണക്കിറ്റും ക്ഷേമപെന്‍ഷനുംകൊണ്ട് ഇമേജ് നേടാവുന്ന സാഹചര്യമല്ല നിലവിലുള്ളത്. അടുത്ത മാസത്തോടെ ഭരണതലം സജീവമായില്ലെങ്കില്‍ പിണറായുടെ രാഷ്ട്രീയഭാവിയെയും ഇത് പ്രതികൂലമായി ബാധിച്ചേക്കാം.