മാട്ടൂലിലെ ഒന്നരവയസ്സുകാരന്‍ മുഹമ്മദിന് ലഭിച്ച സഹായനിധിയില്‍ അവശേഷിക്കുന്ന തുക സര്‍ക്കാറിന് കൈമാറും. കുട്ടിയുടെ ചികിത്സക്ക് ആവശ്യമായ തുക വകയിരുത്തിയ ശേഷമാണ് ബാക്കി തുക കൈമാറുക. ഇതുസംബന്ധിച്ച് ചികിത്സ സഹായ കമ്മിറ്റി ഭാരവാഹിയായ എം. വിജിന്‍ എം.എല്‍.എ മുഖ്യമന്ത്രിയുമായി ചര്‍ച്ച നടത്തി. സാമൂഹികസുരക്ഷ മിഷനിലേക്കാവും പണം കൈമാറുക. സമാനമായ അസുഖമുള്ള കുട്ടികള്‍ക്ക് ചികിത്സ സഹായം നല്‍കുന്ന അക്കൗണ്ടിലേക്കാവും ഈ തുക നിക്ഷേപിക്കുക. ഇതേ അസുഖം ബാധിച്ച ജില്ലയിലെ കുട്ടികള്‍ക്ക് മുന്‍ഗണന നല്‍കണമെന്ന അഭ്യര്‍ഥനയും സര്‍ക്കാറിന് കൈമാറിയിട്ടുണ്ട്.

ശനിയാഴ്ച നടക്കുന്ന ചികിത്സ സഹായ കമ്മിറ്റി യോഗത്തില്‍, സര്‍ക്കാറിലേക്ക് കൈമാറുന്ന തുക സംബന്ധിച്ച് ധാരണയിലെത്തുമെന്ന് എം.എല്‍.എ പറഞ്ഞു. മുഹമ്മദിന്റെ ചികിത്സക്കാവശ്യമായ മരുന്നിനായി 18 കോടി രൂപയായിരുന്നു ആവശ്യമായത്. എന്നാല്‍, കവിഞ്ഞൊഴുകിയ മലയാളികളുടെ സ്‌നേഹത്തില്‍ 46.78 കോടി രൂപയാണ് അക്കൗണ്ടിലെത്തിയത്. മരുന്നിന്റെ നികുതി ഒഴിവാക്കിക്കൊണ്ട് കഴിഞ്ഞദിവസം കേന്ദ്രസര്‍ക്കാര്‍ ഉത്തരവ് ഇറക്കിയിരുന്നു. 18 കോടി രൂപയുടെ മരുന്നിന് ഏകദേശം ആറരക്കോടി രൂപയാണ് നികുതിയിനത്തില്‍ കുറവുവരുക. നടപടികള്‍ പൂര്‍ത്തിയായ മുറക്ക് ഒരാഴ്ചക്കുള്ളില്‍ മരുന്ന് എത്തിക്കാനാവുമെന്നാണ് ചികിത്സ സഹായ കമ്മിറ്റി ഭാരവാഹികള്‍ അറിയിച്ചത്. പ്രതിപക്ഷ നേതാവ് വി.ഡി. സതീശന്‍, ചികിത്സ സഹായ കമ്മിറ്റി ചെയര്‍മാന്‍ ഫാരിഷ ടീച്ചര്‍, കണ്‍വീനര്‍ അബ്ബാസ് ഹാജി, അജിത്ത് മാട്ടൂല്‍, പ്രകാശന്‍, അബ്ദുല്‍ കലാം, ബി.നസീര്‍ എന്നിവര്‍ എം.എല്‍.എക്ക് ഒപ്പമുണ്ടായിരുന്നു.