ഇടുക്കി ഡാം തുറന്നു....ഡാമിന്റെ മൂന്നാമത്തെ ഷട്ടറാണ് ആദ്യം തുറന്നത്. നേരത്തെ അധികൃതര്‍ മുന്നറിയിപ്പ് നല്‍കിയ പ്രകാരം 11 മണിക്ക് തന്നെ ഡാം തുറന്നത്. ഡാം തുറക്കലിന്റെ ഭാഗമായി രാവിലെ 10.55 ന് 3 സൈറണുകള്‍ മുഴങ്ങിയ ശേഷമാണ് ഷട്ടര്‍ തുറന്നത്. ഒരുതരത്തിലുമുള്ള ആശങ്ക വേണ്ടെന്ന് അധിക്യതര്‍ മുന്നറിയിപ്പ് നല്‍കി.

3 വര്‍ഷത്തിന് ശേഷമാണ് ഡാം ഇപ്പോള്‍ തുറന്നിരിക്കുന്നത്. ചെറുതോണി ടൗണിലേക്ക് വെള്ളമെത്താന്‍ തുടങ്ങി. മന്ത്രിമാരുടെ സാന്നിധ്യത്തിലാണ് ഷട്ടറുകള്‍ തുറന്നത്.10.55 ന് മുന്നറിയിപ്പ് സൈറണ്‍ മുഴക്കി ജലസേചന മന്ത്രി റോഷി അഗസ്റ്റിന്‍, വൈദ്യുതി മന്ത്രി കെ കൃഷ്ണന്‍കുട്ടി, ജില്ല കളക്ടര്‍ ഷീബ ജോര്‍ജ്, വൈദ്യുതി ബോര്‍ഡ് ചീഫ് എന്‍ജിനീയര്‍ സുപ്രിയ എസ്. ഡെപ്യൂടി ചീഫ് എന്‍ജിനീയര്‍ പ്രസന്നകുമാര്‍, എക്സിക്യൂടീവ് ആര്‍ ശ്രീദേവി എന്നിവരുടെ സാന്നിധ്യത്തില്‍ ആദ്യം മൂന്നാമത്തെ ഷട്ടര്‍ തുറന്നു.

ചെറുതോണിയിലെ ജലനിരപ്പ് വിലയിരുത്തി അഞ്ച് മിനിറ്റിന് ശേഷം രണ്ടാമത്തെ ഷട്ടറും, അഞ്ച് മിനിറ്റ് ശേഷം നാലാമത്തെ ഷടെറും 35 സെ.മീ. ഉയര്‍ത്തും. കുറവന്‍ കുറത്തി മലകളെ ബന്ധിപ്പിച്ച് പെരിയാറിന് കുറുകെ നിര്‍മിച്ചിരിക്കുന്ന ഇടുക്കി ജലസംഭരണിയുടെ ഭാഗമായി ആര്‍ച് ഡാം അടക്കം മൂന്ന് അണക്കെട്ടുകളാണുള്ളത്. കുളമാവ്, ചെറുതോണി എന്നിവയാണ് മറ്റ് രണ്ടെണ്ണം. ആര്‍ച് ഡാമിന് ഷടെറുകളില്ല. ജലനിരപ്പ് ക്രമീകരിക്കാന്‍ ചെറുതോണി ഡാമിന്റെ ഷട്ടറാണ് തുറന്നിരിക്കുന്നത്.

2018 മഹാപ്രളയസമയത്താണ് ഇനിന് മുന്‍പ് ഇടുക്കി ഡാം തുറന്നത് . എല്ലാ ജാഗ്രതാ നിര്‍ദ്ദേശങ്ങളോട് കൂടിയാണ് ഡാം തുറന്നത്. ആദ്യത്തെ അലേര്‍ട്ടായ ബ്ലു, അടുത്ത അലേര്‍ട്ടായ ഓറഞ്ച് അലേര്‍ട്ട്,പിന്നെ റെഡ് എന്നീ അലേര്‍ട്ടുകള്‍ മുന്നറിയിപ്പിന്റെ ഭാഗമായി പ്രഖ്യാപിച്ചിരുന്നു.

അതേസമയം, ജലനിരപ്പ് പൂര്‍ണ സംഭരണശേഷിയിലേക്ക് എത്തുന്നതിനെത്തുടര്‍ന്ന് ഇടുക്കി അണക്കെട്ട് തുറന്നത് ഇത് അഞ്ചാം തവണയാണ്. 1981 ഒക്ടോബര്‍ 29, 1992 ഒക്ടോബര്‍ 12, 2018 ആഗസ്റ്റ് ഒമ്ബത്, ഒക്ടോബര്‍ ആറ് എന്നീ തീയതികളിലാണ് മുമ്പ് ഇടുക്കി അണക്കെട്ട് തുറന്നത്. അപൂര്‍വം ചില അവസരങ്ങളില്‍ അണക്കെട്ട് നിറഞ്ഞെങ്കിലും തുറക്കേണ്ട സാഹചര്യമുണ്ടായില്ല.