സംഘം ചേര്‍ന്ന് ഭവനം കൈയ്യേറി ഗൃഹനാഥനെ കൊലപ്പെടുത്തിയ ചെറുവയ്ക്കല്‍ സുരേന്ദ്രന്‍ കൊലക്കേസില്‍ 68 ദിവസങ്ങളായി ജയിലില്‍ കഴിയുന്ന ഒന്നാം പ്രതിക്ക് ജാമ്യമില്ല.

തിരുവനന്തപുരം പ്രിന്‍സിപ്പല്‍ ജില്ലാ സെഷന്‍സ് ജഡ്ജി പി. കൃഷ്ണ കുമാറാണ് ഒന്നാം പ്രതിക്ക് ജാമ്യം നിഷേധിച്ചത്. ഒന്നാം പ്രതി ചെറുവയ്ക്കല്‍ വില്ലേജില്‍ തുറുവിക്കല്‍ പുലയനാര്‍കോട്ട ശ്രീജ ഭവനില്‍ ചന്ദ്രന്റെ (53) ജാമ്യ ഹര്‍ജിയാണ് കോടതി തള്ളിയത്.

പ്രതിയുടെ ആദ്യ ജാമ്യഹര്‍ജി തിരുവനന്തപുരം അഡീഷണല്‍ ചീഫ് ജുഡീഷ്യല്‍ മജിസ്ട്രേട്ട് കോടതി തള്ളിയതിനെ തുടര്‍ന്നാണ് പ്രതി ജില്ലാ കോടതിയെ സമീപിച്ചത്.


2021 ആഗസ്റ്റ് 12 ന് വൈകിട്ട് 6 മണിക്കാണ് കേസിനാസ്പദമായ സംഭവം നടന്നത്. സുരേന്ദ്രനെ കൊലപ്പെടുത്തണമെന്ന പൊതു ലക്ഷ്യം പുരോഗമിപ്പിക്കുന്നതിനായി പ്രതികള്‍ കൂടി ചേര്‍ന്ന് മഞ്ചാടി ജംഗ്ഷന് സമീപമുള്ള സുരേന്ദ്രന്റെ വീട്ടില്‍ ഭവന ഭേദനം നടത്തി അതിക്രമിച്ചു കയറി മൃഗീയമായി ദേഹോപദ്രവം ഏല്‍പ്പിക്കുകയും തേങ്ങ കൊണ്ട് ആക്രമിക്കുകയും ചെയ്തു. മെഡിക്കല്‍ കോളേജാശുപത്രിയില്‍ എത്തിച്ചെങ്കിലും പരിക്കിന്റെ കാഠിന്യത്താല്‍ 8.30 മണിയോടെ മരണപ്പെട്ടുവെന്നുമാണ് പ്രോസിക്യൂഷന്‍ കേസ്.

പ്രതിക്ക് ക്രിമിനല്‍ പഞ്ചാത്തലമില്ലെന്നും മറ്റു യാതൊരു കേസിലും ഉള്‍പ്പെട്ടിട്ടില്ലെന്നും 2016 ല്‍ ആന്‍ജിയോ പ്ലാസ്റ്റി ചെയ്തിട്ടുണ്ടെന്നും 68 ദിവസങ്ങളായി ജയിലില്‍ കഴിയുന്ന പ്രതിയുടെ തുടര്‍ കസ്റ്റഡി കൊണ്ട് യാതൊരു കാര്യവുമില്ലെന്നുമുള്ള പ്രതിയുടെ ജാമ്യഹര്‍ജിയിലെ വാദങ്ങളെ പബ്ലിക് പ്രോസിക്യൂട്ടര്‍ വെമ്പായം: എ. ഹക്കീം ശക്തമായി എതിര്‍ത്തിരുന്നു.

ഒന്നാം പ്രതിയുടെ ബോധപൂര്‍വ്വമായ ക്രിമിനല്‍ പ്രവൃത്തികളുടെ ഭാഗമായാണ് കൊലപാതകം നടന്നതെന്ന് അദ്ദേഹം വാദിച്ചു. അന്വേഷണം പുരോഗമിക്കുന്ന ഈ ഘട്ടത്തില്‍ ജാമ്യത്തില്‍ വിട്ടയച്ചാല്‍ സുഗമമായ അന്വേഷണത്തെ പ്രതികൂലമായി ബാധിക്കും. മെഡിക്കല്‍ കോളേജ് പോലീസ് ഹാജരാക്കിയ സി ഡി ഫയലില്‍ പ്രതിക്കെതിരായ കുറ്റാരോപണത്തിന് വളരെയധികം അടിസ്ഥാനമുണ്ട്.

മുഖ്യ പ്രതി പരസ്യമായി ചെയ്ത കൃത്യങ്ങള്‍ ഗൗരവമേറിയതും ഒന്നാം പ്രതിയുടെ ഭാഗത്തു നിന്നും മുന്‍കൂട്ടി ആസൂത്രണം ചെയ്ത ക്രിമിനല്‍ കൃത്യവുമാണെന്നുമുള്ള പ്രോസിക്യൂട്ടറുടെ വാദത്തില്‍ കഴമ്പുണ്ടെന്ന് കോടതി നിരീക്ഷിച്ചു. കുറ്റകൃത്യത്തിന്റെ രീതിയും സ്വഭാവവും , പ്രതിയുടെ പങ്കാളിത്തം എന്നിവ പരിഗണിക്കുമ്പോള്‍ ജാമ്യത്തില്‍ വിട്ടയച്ചാല്‍ സുഗമമായ അന്വേഷണത്തിന് തടസ്സമുണ്ടാകുമെന്നും ജാമ്യം നിരസിച്ച ഉത്തരവില്‍ കോടതി വ്യക്തമാക്കി.