മുന്നറിയിപ്പില്ലാതെ ആരോഗ്യ വകുപ്പ് മന്ത്രി വീണാ ജോര്‍ജ് വ്യാഴാഴ്ച രാത്രിയില്‍ തിരുവനന്തപുരം മെഡിക്കല്‍ കോളേജ് ആശുപത്രി സന്ദര്‍ശിച്ചപ്പോള്‍ ഞെട്ടിക്കുന്ന കാഴ്ചയാണ് കണ്ടത്. രാത്രികാലത്തെ മെഡിക്കല്‍ കോളേജ് ആശുപത്രിയുടെ പ്രവര്‍ത്തനം നേരിട്ട് ബോധ്യമാകാനാണ് രാത്രി 10.30ന് ശേഷം മന്ത്രി മെഡിക്കല്‍ കോളേജില്‍ സാധാരണക്കാരിയായി ചുരിദാറുമിട്ട് നേരിട്ടെത്തിയത്.

പോലീസിനേയോ മെഡിക്കല്‍ കോളേജ് അധികൃതരേയോ വിവരം അറിയിച്ചില്ല. ഓഫീസിലെ സാധാരണ വാഹനത്തില്‍ കാഷ്വാലിറ്റിയില്‍ വന്നിറങ്ങിയ മന്ത്രിയെ ആരും തിരിച്ചറിഞ്ഞില്ല. പോലീസ് തന്നെ വളരെ വൈകിയാണ് എത്തിയത്.

രാത്രി പത്തരയായിട്ടും അത്യാഹിത വിഭാഗത്തില്‍ വലിയ തിരക്കാണ്. പല തരത്തിലുള്ള രോഗികളെയാണ് കാണാന്‍ കഴിഞ്ഞത് പലരോടും മന്ത്രി സംസാരിച്ചു. രോഗികള്‍ പരക്കം പായുന്നു. എന്നിട്ടും ഡ്യൂട്ടിയിലുള്ള സീനിയര്‍ ഡോക്ടര്‍മാരെ കാണാനില്ല. ഡ്യൂട്ടി ലിസ്റ്റും അതനുസരിച്ച് ഡ്യൂട്ടി സമയത്ത് ജീവനക്കാര്‍ ഉണ്ടോയെന്നും പരിശോധിച്ചു. അപ്പോഴാണ് ഞെട്ടിപ്പോയത്. ഡ്യൂട്ടിയുണ്ടെങ്കിലും സീനിയര്‍ ഡോക്ടര്‍മാരെല്ലാം മുങ്ങി. പിജിക്കാരും ഹൗസ് സര്‍ജന്‍മാരുമാണ് രോഗികളെ നോക്കുന്നത്.

അറ്റന്റര്‍മാരും മുങ്ങുന്നു. പാവം രോഗികളുടെ കൂട്ടിരുപ്പുകാരാണ് ട്രോളി തള്ളുന്നത്. ഇതിവിടെ പതിവാണെന്ന് ഉള്ള ജീവനക്കാര്‍ തന്നെ മന്ത്രിയോട് പറഞ്ഞു. സീനിയര്‍ ഡോക്ടര്‍മാരില്ലാത്ത പരാതി ജനങ്ങളും പറഞ്ഞു.

സംഗതി ഇത്രയുമായപ്പോള്‍ മന്ത്രിയാണെന്ന് ബോധ്യപ്പെട്ട ആശുപത്രി ജീവനക്കാര്‍ ആശുപത്രി അധികൃതരെ വിവരം അറിയിച്ചു. അതിന് ശേഷമാണ് സൂപ്രണ്ടും മറ്റും ഓടിയെത്തിയത്. ഡ്യൂട്ടിയിലുള്ള സമയത്ത് സീനിയര്‍ ഡോക്ടര്‍മാരുള്‍പ്പെടെയുള്ള ജീവനക്കാര്‍ അവിടെത്തന്നെയുണ്ടാകണമെന്ന് അപ്പോള്‍ തന്നെ കര്‍ശനിര്‍ദേശം മന്ത്രി നല്‍കി.

മൂന്ന് മണിക്കൂറോളം മന്ത്രി മെഡിക്കല്‍ കോളേജില്‍ ചെലവഴിച്ചു. ആശുപത്രിയിലെത്തിയ രോഗികളുമായും കൂട്ടിരിപ്പുകാരുമായും അവരുടെ ബന്ധുക്കളുമായും ആശയവിനിമയം നടത്തി. പഴയ അത്യാഹിത വിഭാഗത്തിന് പുറമെ ഒബ്‌സര്‍വേഷന്‍ റൂമുകള്‍, വാര്‍ഡുകള്‍, പുതിയ അത്യാഹിത വിഭാഗം എന്നിവയും മന്ത്രി സന്ദര്‍ശിച്ചു. അവിടേയും ഇതൊക്കെ തന്നെയായിരുന്നു അവസ്ഥ. പരാതിയുമായി പലരും ഓടിയെത്തി. ജീവനക്കാരുടെ പ്രശ്‌നങ്ങളും മന്ത്രി കേട്ടു. പരിശോധനയെല്ലാം കഴിഞ്ഞ് മന്ത്രി ഇറങ്ങുമ്പോള്‍ ഏതാണ്ട് ഒന്നര മണിയോളമായി.

തിരുവനന്തപുരം മെഡിക്കല്‍ കോളേജില്‍ കണ്ടെത്തിയ കാര്യങ്ങളില്‍ നടപടിയെടുക്കാന്‍ മന്ത്രി വീണാ ജോര്‍ജ് മെഡിക്കല്‍ കോളേജ് മെഡിക്കല്‍ കോളേജ് പ്രിന്‍സിപ്പല്‍, ആശുപത്രി സൂപ്രണ്ട്, വിവിധ വകുപ്പ് മേധാവികള്‍ എന്നിവരെ അടിയന്തരമായി വിളിച്ചു വരുത്തി.

ഡ്യൂട്ടിയെടുക്കാതെ സീനിയര്‍ ഡോക്ടര്‍മാര്‍ ഉള്‍പ്പെടെയുള്ളവര്‍ മാറി നില്‍ക്കുന്ന കാര്യത്തിന് വിശദീകരണം തേടി. ഇതിന്റെ കാരണം വിശദമാക്കണമെന്ന് നിര്‍ദേശം നല്‍കി. ആര്‍ക്കെങ്കിലും ജോലി ചെയ്യാന്‍ ബുദ്ധിമുട്ടാണെങ്കില്‍ സ്ഥലംമാറ്റം നല്‍കാമെന്ന് പറഞ്ഞു. ചില ഡോക്ടര്‍മാരും നീണ്ട അവധിയിലാണ്. ചിലര്‍ ഒത്താശ ചെയ്യുന്നുമുണ്ട്. ഈ രണ്ട് കൂട്ടര്‍ക്കുമെതിരെ നടപടി സ്വീകരിക്കാന്‍ നിര്‍ദേശം നല്‍കി.

ഡ്യൂട്ടിയിലുള്ള ഡോക്ടര്‍മാര്‍ ഉള്‍പ്പെടെയുള്ളവരുടെ പേര് വിവരങ്ങള്‍ ഇനിമുതല്‍ ബോര്‍ഡില്‍ പ്രസിദ്ധപ്പെടുത്താന്‍ നിര്‍ദേശം നല്‍കി. ഇവര്‍ ഡ്യൂട്ടിയെടുക്കാതെ വന്നാല്‍ കര്‍ശന നടപടി സ്വീകരിക്കും. സര്‍ക്കാര്‍ ഉത്തരവനുസരിച്ചുള്ള കാഷ്വാലിറ്റി പ്രോട്ടോകോള്‍ പാലിക്കാന്‍ കര്‍ശന നിര്‍ദേശം നല്‍കി. ഇതുസംബന്ധിച്ച് 24 മണിക്കൂറിനകം റിപ്പോര്‍ട്ട് സമര്‍പ്പിക്കാന്‍ മന്ത്രി ആവശ്യപ്പെട്ടു. ഡ്യൂട്ടിയിലുള്ള ഡോക്ടര്‍മാരുടെ പേര് ബോര്‍ഡില്‍ പ്രസിദ്ധപ്പെടുത്തുന്നത് വലിയ കാര്യമാണ്. മുങ്ങിയാല്‍ ജനങ്ങള്‍ തന്നെ റിപ്പോര്‍ട്ട് ചെയ്‌തോളും.

എന്തായാലും മന്ത്രിയുടെ പാതിരാത്രിയുള്ള സന്ദര്‍ശനം വലിയ ചലനമാണ് ഉണ്ടാക്കിയിരിക്കുന്നത്. മന്ത്രിയുടെ പേജില്‍ തന്നെ ഇതുപോലെ എല്ലാ മെഡിക്കല്‍ കോളേജിലും മന്ത്രി മിന്നല്‍ സന്ദര്‍ശനം നടത്തണമെന്നാണ് പറയുന്നത്. ലക്ഷങ്ങള്‍ ശമ്പളം വാങ്ങിച്ചും മുങ്ങുന്നവര്‍ക്കെതിരെ കര്‍ശന നടപടി വേണമെന്നും പറയുന്നു.