അനുപമക്ക് മുന്നില് വഴികളടയുന്നു: സി പി എം നേതാവായിരുന്ന പേരൂര്ക്കട സദാശിവന്റെ കൊച്ചുമകള് അനുപമയുടെ മകളെ കിട്ടാനുള്ള സാധ്യതകള് ഏതാണ്ട് അടയുന്നു, ഹൈക്കോടതിയും സര്ക്കാരും വാതിലടച്ചു
സി പി എം നേതാവായിരുന്ന പേരൂര്ക്കട സദാശിവന്റെ കൊച്ചുമകള് അനുപമയുടെ മകളെ കിട്ടാനുള്ള സാധ്യതകള് ഏതാണ്ട് അടയുന്നു. സര്ക്കാര് തന്നെയാണ് എല്ലാ വഴികളും അടച്ചത്. സംസ്ഥാന സര്ക്കാരിന് നിയന്ത്രണമുള്ള ഏജന്സിയാണ് വഴിയടക്കാന് മുന്നില് നിന്നത്. സര്ക്കാര് ഇക്കാര്യത്തില് ഇരട്ടത്താപ്പ് കാണിക്കുകയാണെന്ന് മലയാളി വാര്ത്ത മുമ്പും റിപ്പോര്ട്ട് ചെയ്തിട്ടുണ്ട്.
ഹൈക്കോടതിയിലും സര്ക്കാര് അനുപമക്കെതിരെയാണ് നിലപാടെടുത്തത്. അനുപമ ഫയല് ചെയ്ത ഹര്ജി പിന്വലിക്കാനാണ് ഹൈക്കോടതി ആവശ്യപ്പെട്ടത്. ഇല്ലെങ്കില് ഹര്ജി തള്ളുമെന്നും ഹൈക്കോടതി പറഞ്ഞു. ഹര്ജി തള്ളിയാല് അനുപമക്ക് മുന്നിലുള്ള വഴികള് അടയും.
സംസ്ഥാന അഡോപ്ഷന് റിസോഴ്സ് ഏജന്സിയാണ് സര്ക്കാരിന് അനുകൂലമായി പോലീസിന് റിപ്പോര്ട്ട് നല്കിയത്. ദത്ത് നടപടികള് പൂര്ണമായും നിയമപരമായാണ് നടന്നത്. കുഞ്ഞിനെ ആര്ക്ക് നല്കിയെന്നോ, എപ്പോള് നല്കിയെന്നോ അറിയിക്കാനാകില്ലെന്നും ഏജന്സി പ്രതികരിച്ചു. ദത്തെടുക്കല് നിയമപ്രകാരം ഈ വിവരങ്ങള് വെളിപ്പെടുത്താനാകില്ലെന്ന് ഏജന്സി വ്യക്തമാക്കി.
ശിശുക്ഷേമ സമിതിയില് കുട്ടി എങ്ങനെ എത്തിയെന്നതില് വ്യക്തത വേണമെന്ന് ഇന്നലെ കോടതി പറഞ്ഞിരുന്നു. കുട്ടിയുടെ അമ്മയുടെ പരാതിയില് വ്യക്തത വരുത്താന് ഡിഎന്എ പരിശോധന വരെ നടത്താന് ചൈല്ഡ് വെല്ഫയര് കമ്മിറ്റിക്ക് അധികാരമുണ്ട്. സമഗ്രമായ അന്വേഷണം നടത്തി ഈ മാസം 20ന് റിപ്പോര്ട്ട് നല്കാനാണ് ഇന്നലെ കുടുംബ കോടതി സിഡബ്ല്യൂസിക്ക് നിര്ദ്ദേശം നല്കിയത്. പരാതിയില് സമയോചിതമായി സര്ക്കാര് ഇടപ്പെട്ടുവെന്ന് കോടതി പ്രശംസിച്ചു.
എന്നാല് ശിശുക്ഷേമ സമിതിയെ രൂക്ഷമായി കോടതി വിമര്ശിച്ചു. ദത്തെടുക്കലിനുള്ള ശിശുക്ഷേമ സമിതിയുടെ ലൈസന്സിന്റെ കാലാവധി കഴിഞ്ഞതാണെന്ന് കോടതി വിമര്ശിച്ചു. സമിതി ഹാജരാക്കിയ ലൈസന്സിന്റെ കാലാവധി ജൂണ് 30ന് അവസാനിച്ചതാണ്. ലൈസന്സ് പുതുക്കല് നടപടികള് നടന്നുവരികയാണെന്ന് ശിശുക്ഷേമ സമിതിയുടെ അഭിഭാഷകന് കോടതിയെ അറിയിച്ചു. ലൈസന്സ് പുതുക്കാനുള്ള നടപടിയുള്പ്പെടെ എല്ലാ കാര്യങ്ങളും വിശദമാക്കി സത്യവാങ്മൂലം നല്കണമെന്ന് ശിശുക്ഷേമ സമിതിക്കും നിര്ദ്ദേശം നല്കി.
ഈ മാസം 20ന് കേസ് വീണ്ടും പരിഗണിക്കും. അതിനിടെയാണ്, കുഞ്ഞിനെ വിട്ടുകിട്ടാന് അനുപമ ഹൈക്കോടതില് ഹേബിയസ് കോര്പ്പസ് ഹര്ജി നല്കിയത്. താന് അറിയാതെയാണ് നാല് ദിവസം മാത്രം പ്രായമായ കുഞ്ഞിനെ ദത്ത് നല്കിയെന്നും കുഞ്ഞിനെ ഹാജരാക്കാന് സിറ്റി പൊലീസ് കമ്മീഷണര്ക്ക് നിര്ദ്ദേശം നല്കണമെന്നാണ് അനുപമയുടെ ഹര്ജിയിലെ ആവശ്യം. അനുപമയുടെ അച്ഛന് ജയചന്ദ്രന്, അമ്മ സ്മിത എന്നിവരടക്കം ആറ് പേരെ എതിര് കക്ഷിയാക്കിയാണ് ഹര്ജി.
കുഞ്ഞിനെ ദത്ത് നല്കാനുള്ള അനുപമയുടെ കത്ത് ഉള്പ്പെടെ സര്ക്കാര് കോടതിയില് ഹാജരാക്കിയിട്ടുണ്ട്. സര്ക്കാരിന് അവരുടെ ഏജന്സികള്ക്ക് എതിരെ സംസാരിക്കാനാവില്ല. അങ്ങനെ സംഭവിച്ചാല് അത് സര്ക്കാരിനെ സംബന്ധിച്ച നിയമപരമായ ബാധ്യതകള്ക്ക് ഇടയാക്കും.
അനുപമയെ സര്ക്കാര് രക്ഷിക്കാന് ശ്രമിച്ചാല് സര്ക്കാര് കൂടുതല് പ്രതിക്കൂട്ടിലാവും. പാര്ട്ടി ഫലത്തില് പ്രതിക്കൂട്ടിലാണ്. പാര്ട്ടിയെയും അനുപമയെയും ഒരുമിച്ച് രക്ഷിക്കാന് സര്ക്കാരിന് കഴിയുന്നുമില്ല. ഇങ്ങനെയൊരു പ്രതിസന്ധി മുമ്പുണ്ടായിട്ടില്ലെന്നാണ് നിയമ ലോകം പറയുന്നത്.
മനുഷ്യത്വത്തിന്റെ ഒരംശവും സര്ക്കാര് വകുപ്പുകള് അനുപമ യുടെ കാര്യത്തില് കാണിക്കില്ല. കാരണം സര്ക്കാര് ഫയലില് മനുഷ്യത്വം എന്ന പദമില്ല.
"
https://www.facebook.com/Malayalivartha
