ഉമ്മന്നൂർ തുടന്തല സ്വദേശിനിയെ ആസിഡ് ഉള്ളിൽ ചെന്ന് മരിച്ച നിലയിൽ കണ്ടെത്തിയ സംഭവത്തിൽ ഭർത്താവ് അറസ്റ്റിൽ. തുടന്തല ചെറിയമംഗലത്ത് വടക്കേതിൽ വീട്ടിൽ സുരേന്ദ്രൻപിള്ള (48) ആണ് ഭാര്യ പ്രതിഭയുടെ (36) മരണത്തിൽ അറസ്റ്റിലായത്.

2020 ഫെബ്രുവരി എട്ടിന് രാത്രി പതിനൊന്നരയോടെയാണ് പ്രതിഭയെ മരിച്ച നിലയിൽ കണ്ടെത്തിയത്. ഭാര്യയെ സുരേന്ദ്രൻ പിള്ള നിരന്തരം ഉപദ്രവിച്ചിരുന്നു. സംഭവ ദിവസവും ക്രൂരമായി ഉപദ്രവിച്ചു. സഹികെട്ട പ്രതിഭ റബർത്തോട്ടത്തിൽ സൂക്ഷിച്ച ആസിഡ് കുടിച്ച് ജീവൻ ഒടുക്കുകയായിരുന്നുവെന്ന് പോലീസ് പറയുന്നു.

പോസ്റ്മോർട്ടത്തിൽ തലയിലും ശരീര ഭാഗങ്ങളിലുമായി ഒമ്പത് മുറിവുകൾ കണ്ടതിനെ തുടർന്ന് വിശദമായ ശാസ്ത്രീയ പരിശോധനയും അന്വേഷണവും നടത്തി.

12 വയസ്സുള്ള ഒരു മകൻ മാത്രമാണ് ദമ്പതികൾക്ക് ഉള്ളത്. കൊട്ടാരക്കര ഡിവൈഎസ്പി ആർ.സുരേഷ്, കൊട്ടാരക്കര സ്റ്റേഷൻ ഇൻസ്പെക്ടർ ജോസഫ് ലിയോൺ എന്നിവരുടെ നേതൃത്വത്തിലാണ് പ്രതിയെ അറസ്റ്റ് ചെയ്തത്.