തിരുവനന്തപുരം സ്വര്‍ണക്കടത്ത് കേസില്‍ ഒരു വര്‍ഷത്തെ ജയില്‍ ശിക്ഷ അനുഭവിച്ച ശേഷം പുറത്തിറങ്ങുന്ന സ്വപ്ന സുരേഷ് മാധ്യമങ്ങളോട് സംസാരിക്കാതിരിക്കാനുള്ള നീക്കങ്ങള്‍ അണിയറയില്‍ തകൃതിയായി നടക്കുന്നു.

ഇഡിക്കോ മറ്റേതെങ്കിലുമൊരു അന്വേഷണ ഏജന്‍സിക്കോ എതിരെ സംസാരിച്ചാല്‍ വരും ദിവസങ്ങളിലും അകത്തു കടക്കേണ്ടി വരുമെന്ന വ്യക്തമായ സൂചന സ്വപ്നക്ക് ലഭിച്ചു കഴിഞ്ഞു. സ്വപ്നയെ കൊണ്ട് ബി ജെ പി ക്കെതിരെ സംസാരിക്കാനുള്ള സി പി എമ്മിന്റെ നീക്കങ്ങള്‍ക്കും തിരിച്ചടി നേരിട്ടിരിക്കുകയാണ്.

സ്വപനയുമായി ജയിലില്‍ ചില ഇടതുമുന്നണി നേതാക്കള്‍ നടത്തിയ സംഭാഷണത്തില്‍ താന്‍ ഒരക്ഷരം മിണ്ടില്ലെന്ന വ്യക്തമായ സൂചന സ്വപ്ന നല്‍കി കഴിഞ്ഞതായാണ് മനസിലാക്കുന്നത്.

ജയില്‍ മോചിതനായ ബിനീഷ് കോടിയേരിയും തലസ്ഥാനത്ത് മടങ്ങിയെത്തിയാലുടന്‍ രഹസ്യങ്ങളുടെ കെട്ടഴിക്കുമെന്ന് വീമ്പിളക്കിയിരുന്നു. എന്നാല്‍ തിരുവനന്തപുരത്ത് മടങ്ങിയെത്തി രണ്ടു ദിവസം കഴിഞ്ഞിട്ടും ബിനീഷിന്റെ കാര്യത്തില്‍ യാതൊരു അനക്കവുമില്ല. പറഞ്ഞ് പറഞ്ഞു കൂടുതല്‍ കുരുങ്ങേണ്ടന്ന നിര്‍ദ്ദേശം കോടിയേരി നല്‍കി കഴിഞ്ഞെന്നാണ് വിവരം.

സ്വര്‍ണ്ണക്കടത്ത് കേരള രാഷ്ട്രീയത്തിലും വന്‍ വിവാദങ്ങള്‍ക്കാണ് തിരികൊളുത്തിയത്. മുഖ്യമന്ത്രിയുടെ ഓഫീസിനെതിരേയും സ്പീക്കര്‍ക്കെതിരേയും ആരോപണങ്ങളുയര്‍ന്നു. മന്ത്രിയായിരുന്ന കെ.ടി. ജലീലിനെതിരേയും ആരോപണങ്ങളുണ്ടായി. ഒടുവില്‍ ഒരുവര്‍ഷത്തിന് ശേഷം സ്വപ്ന സുരേഷ് ജയിലില്‍നിന്ന് പുറത്തിറങ്ങുമ്പോള്‍ അവര്‍ക്ക് എന്താണ് പറയാനുള്ളതെന്നാണ് രാഷ്ട്രീയ കേരളം ഉറ്റുനോക്കുന്നത്. എന്നാല്‍ ബിനീഷ് പറഞ്ഞതിന് അപ്പുറത്തേക്ക് സ്വപ്ന ഒന്നും പറയാന്‍ സാധ്യതയില്ലെന്നാണ് ചില മാധ്യമങ്ങള്‍ കരുതുന്നത്.

സ്വര്‍ണക്കടത്ത് കേസില്‍ മകളുടെ നിരപരാധിത്വം തെളിയിക്കുമെന്നായിരുന്നു ജാമ്യം ലഭിച്ചെന്ന വാര്‍ത്തയ്ക്ക് പിന്നാലെ സ്വപ്നയുടെ അമ്മ പ്രഭ സുരേഷ് പ്രതികരിച്ചത്. മകളെ ഒരുപാട് മിസ് ചെയ്തിരുന്നു. സഹായിച്ചവര്‍ക്കും ആക്ഷേപിച്ചവര്‍ക്കും നിയമപീഠത്തിനും നന്ദിയുണ്ട്. മകള്‍ തെറ്റ് ചെയ്തിട്ടില്ലെന്ന് ഈ നിമിഷം വരെ വിശ്വസിക്കുന്നു. അസുഖങ്ങള്‍ കാരണം അവള്‍ ബുദ്ധിമുട്ട് അനുഭവിക്കുകയാണ്. എല്ലാ ആഴ്ചയും ജയിലില്‍ പോയി മകളെ കണ്ട് തിരിച്ചുവരുന്നത് ഹൃദയം തകര്‍ന്നനിലയിലാണ്. അവളെ ചതിച്ചതാണെന്ന് അവള്‍ എപ്പോഴും പറഞ്ഞിരുന്നു. ജയിലില്‍നിന്നിറങ്ങിയാല്‍ മകള്‍ മാധ്യമങ്ങളെ കാണും. കേസില്‍ നിരപരാധിത്വം തെളിയിക്കും. സത്യം ഒരുനാള്‍ പുറത്തുവരുമെന്നും പ്രഭ സുരേഷ് ഒരു ദൃശ്യമാധ്യമത്തോട് പ്രതികരിക്കവേ അമ്മ പറഞ്ഞു.

സ്വര്‍ണക്കടത്തുമായി ബന്ധപ്പെട്ട് കസ്റ്റംസ് രജിസ്റ്റര്‍ ചെയ്ത കേസില്‍ 26 പ്രതിളാണുള്ളത്. അനുബന്ധ പ്രതികളായി 27 പേരുമുണ്ട്. എന്‍.ഐ.എ. രജിസ്റ്റര്‍ ചെയ്ത കേസില്‍ ആകെ 35 പ്രതികളുണ്ട്. രണ്ടുപേര്‍ പിടികിട്ടാപ്പുള്ളികളാണ്. സന്ദീപ് നായരെ ഈ കേസില്‍ മാപ്പ് സാക്ഷിയാക്കുകയും ചെയ്തു.

നയതന്ത്ര ബാഗേജ് വഴി സ്വര്‍ണം കടത്തിയ കേസില്‍ ഒരുവര്‍ഷം പിന്നിട്ടിട്ടും ഫൈസല്‍ ഫരീദ് അടക്കമുള്ള മുഖ്യപ്രതികളെ അന്വേഷണ ഏജന്‍സികള്‍ക്ക് പിടികൂടാനായിട്ടില്ല. ദുബായില്‍നിന്ന് സ്വര്‍ണം അയച്ചത് ഫൈസല്‍ ഫരീദാണെന്നാണ് അന്വേഷണത്തില്‍ കണ്ടെത്തിയത്. എന്‍.ഐ.എയ്ക്ക് പുറമേ കസ്റ്റംസും ഇ.ഡി.യും രജിസ്റ്റര്‍ ചെയ്ത കേസിലും ഫൈസല്‍ പ്രതിയാണ്. വിദേശകാര്യ മന്ത്രാലയം ഫൈസലിന്റെ പാസ്‌പോര്‍ട്ട് റദ്ദാക്കുകയും ലുക്ക് ഔട്ട് നോട്ടീസ് പുറപ്പെടുവിക്കുകയും ചെയ്തിരുന്നു. എന്നാല്‍ ഫൈസല്‍ എവിടെയാണെന്ന ചോദ്യം മാത്രം ബാക്കിനില്‍ക്കുന്നു.

ഫൈസല്‍ ഫരീദിനെ ദുബായ് പോലീസ് കസ്റ്റഡിയിലെടുത്തതായി നേരത്തെ വിവരങ്ങളുണ്ടായിരുന്നു. കോടതിയിലും നേരത്തെ ഈ വിവരങ്ങളായിരുന്നു ഏജന്‍സികള്‍ പറഞ്ഞിരുന്നത്. എന്നാല്‍ സ്വര്‍ണക്കടത്ത് കേസില്‍ എന്‍.ഐ.എ. കുറ്റപത്രം സമര്‍പ്പിച്ചപ്പോള്‍ ഫൈസല്‍ ഫരീദ് ഒളിവിലാണെന്നാണ് പറയുന്നത്.

യു.എ.ഇ. കോണ്‍സുലേറ്റ് മുന്‍ അക്കൗണ്ടന്റ് ഖാലിദ് മുഹമ്മദ് അലി ഷൗക്രിയാണ് വിദേശത്തുള്ള മറ്റൊരാള്‍. ഇയാള്‍ക്കെതിരെയും ജാമ്യമില്ലാ വാറന്റ് പുറപ്പെടുവിച്ചിട്ടുണ്ട്. ഇയാള്‍ ഈജിപ്തിലാണെന്നാണ് വിവരം. എന്നാല്‍ ഒരുവര്‍ഷം പിന്നിട്ടിട്ടും ഫൈസലിനെയും ഖാലിദിനെയും ഇന്ത്യയിലെത്തിക്കാന്‍ നടപടികളുണ്ടായില്ല. അതു കൊണ്ടു തന്നെ കേസില്‍ യാതൊരു പുരോഗതിയും ഉണ്ടാകാനിടയില്ല. കോടതിയിലും കേസിന്റെ ഭാവിയെ കുറിച്ച് യാതൊരു പ്രതീക്ഷയുമില്ല.



മൗനം വിദ്വാന് ഭൂഷണം എന്ന നിലപാടാണ് സ്വര്‍ണ്ണത്തിന്റെയും മയക്കുമരുന്ന് കേസുകളിലെയും പ്രതികള്‍ അനുവര്‍ത്തിക്കുന്നത്. എന്തെങ്കിലും പറഞ്ഞു പോയാല്‍ അത് കേന്ദ്ര സര്‍ക്കാരിന് എതിരായി തീരും.കേന്ദ്രത്തെ പിണക്കിയാല്‍ എന്തും സംഭവിക്കുമെന്ന് ബിനീഷിനും സ്വപ്നക്കുമറിയാം. മോദിപ്പേടിയില്‍ വിറയ്ക്കുന്ന പ്രതികള്‍ക്ക് വരുംവരായ്കകളെ കുറിച്ച് നല്ല ബോധ്യമുണ്ട്. കാരണം കഷ്ടകാലം വരുമ്പോള്‍ പിണറായി പൊടിയും തട്ടി സ്ഥലം വിടുമെന്ന് ഇവര്‍ക്കറിയാം.