ഗുരുവായൂർ സത്യാഗ്രഹം നടന്നിട്ട് 90 വർഷങ്ങൾ പിന്നിട്ടിരിക്കുന്നുവെന്ന് രമ്യ ഹരിദാസ് എംപി .കേളപ്പജി തുടങ്ങി വെച്ച സമരം പിന്നീട് കേരളം ഏറ്റെടുക്കുകയായിരുന്നുവെന്നും അവർ ചൂണ്ടികാണിക്കുന്നു. കുറിപ്പിന്റെ പൂർണ്ണ രൂപം ഇങ്ങനെ;

ഗുരുവായൂർ സത്യാഗ്രഹം നടന്നിട്ട് 90 വർഷങ്ങൾ പിന്നിട്ടിരിക്കുന്നു.കേളപ്പജി തുടങ്ങി വെച്ച സമരം പിന്നീട് കേരളം ഏറ്റെടുക്കുകയായിരുന്നു.ഗുരുവായൂരമ്പലത്തിൽ എല്ലാ ജാതിക്കാർക്കും ആരാധനാ സ്വാതന്ത്ര്യത്തിനുവേണ്ടി നടന്ന സമരങ്ങൾക്ക് നേതൃത്വം കൊടുത്തത് മന്നത്തു പത്മനാഭനും എ.കെ.ജി യും സുബ്രഹ്മണ്യ തീരുമുൻപും ആയിരുന്നു. ഗാന്ധിജിയും കസ്തൂർബാ യും നേരിട്ട് ഗുരുവായൂരിലെത്തി.

ടാഗോറും അംബേദ്കറും അടക്കമുള്ളവർ സത്യാഗ്രഹത്തിന് പിന്തുണയർപ്പിച്ചു.നിയമത്തിന്റെ നൂലാമാലകളിൽ പെട്ട് ആരാധനാസ്വാതന്ത്ര്യം നീണ്ടു പോയെങ്കിലും 1936 ലെ ക്ഷേത്രപ്രവേശനവിളംബരത്തിനു പോലും വഴിവെച്ചത് ഗുരുവായൂർ സത്യാഗ്രഹം ആയിരുന്നു.എല്ലാസമരങ്ങളും കുറെ ആളുകളുടെ ത്യാഗത്തിന്റെയും സമർപ്പണത്തിനും ഫലമായാണ് വിജയിച്ചിട്ടുള്ളത്.

കേളപ്പജിക്ക് ഗുരുവായൂരമ്പലനടയിൽ സത്യാഗ്രഹമിരിക്കേണ്ട കാര്യമുണ്ടോ? മന്നത്ത് പത്മനാഭന് സമരത്തിന് പിന്തുണ കൊടുക്കേണ്ടതുണ്ടായിരുന്നോ? ട്രെയിൻ ഗതാഗതം മാത്രമുള്ള കാലത്ത് ഗാന്ധിജിക്കും കസ്തൂർബ ഗാന്ധിക്കും ഗുരുവായൂർ വരെ എത്തി സമരത്തിന് പിന്തുണ കൊടുക്കേണ്ടിയിരുന്നോ?

പൊന്നാനി താലൂക്കിലെ ഭൂരിഭാഗം ഉയർന്ന ജാതിക്കാരും എല്ലാ ജാതിക്കാർക്കും പ്രവേശനം കൊടുക്കണമെന്ന് ഹിതപരിശോധനയിൽ ആവശ്യപ്പെടേണ്ടതുണ്ടായിരുന്നോ?ധീര രക്തസാക്ഷികൾ ഭഗത് സിങ്ങും സുഖദേവും ചെറുപ്രായത്തിൽ ജീവൻ ബലിയർപ്പിക്കേണ്ടിയിരുന്നോ?
ലക്ഷക്കണക്കിനാളുകൾക്ക് സർക്കാർ ജോലി ഉപേക്ഷിക്കേണ്ടി വരുമായിരുന്നോ?

റോഡ് പിക്കറ്റ് ചെയ്യേണ്ടിവരുമായിരുന്നോ?ജയിലുകളിൽ തടവിൽ കഴിയേണ്ടി വരുമായിരുന്നോ? നാടുകടത്തപ്പെടേണ്ടി വരുമായിരുന്നോ?അവകാശങ്ങൾ നേടാൻ പ്രതിഷേധങ്ങൾ ഉയർത്തേണ്ടിവരും..സമരങ്ങളും പ്രതിഷേധങ്ങളും അങ്ങനെയാണ്.. ഒന്നും സ്വകാര്യ ലാഭത്തിനല്ല,സമൂഹ നന്മയ്ക്ക് വേണ്ടിയാണ്..

അത്തരം സമരങ്ങളെ പിന്തുണച്ചില്ലെങ്കിലും ഇകഴ്ത്തരുത്.അത് നാടിനോട് ചെയ്യുന്ന അനീതിയാണ്. തൃശൂർ ഡിസിസി സംഘടിപ്പിച്ച ഗുരുവായൂർ സത്യാഗ്രഹം നവതി ജ്യോതി AICC ജനറൽ സെക്രട്ടറി കെ.സി വേണുഗോപാൽ എം.പി ഉദ്ഘാടനം ചെയ്തു.ഡിസിസി പ്രസിഡണ്ട് ജോസ് വള്ളൂർ അധ്യക്ഷത വഹിച്ചു. സത്യാഗ്രഹത്തിന്റെ നവതിയിൽ സത്യാഗ്രഹികൾക്കും സമരപോരാളികൾക്കും സ്മരണാഞ്ജലികൾ...