ജോജു വിവാദത്തിൽ താരസംഘടനയായ അമ്മയ്‌ക്കെതിരെ നടനും എം.എൽ.എയുമായ കെ.ബി.ഗണേഷ് കുമാർ രംഗത്ത്. ജോജുവിനെ തെരുവിൽ ആക്രമിച്ചിട്ടും അമ്മ സംഘടന പ്രതികരിച്ചില്ലെന്ന് അദ്ദേഹം പറഞ്ഞു. അമ്മ സംഘടനയുടെ സെക്രട്ടറി ആരെ പേടിച്ചാണ് ഒളിച്ചിരിക്കുന്നതെന്ന് അറിയില്ല. അമ്മയുടെ മീറ്റിംഗിൽ പ്രതിഷേധം അറിയിക്കുമെന്നും ഗണേഷ് കുമാർ പറഞ്ഞു.

അമ്മയിൽ അംഗമായ ജോജുവിനെ ആക്രമിച്ചിട്ടും അമ്മയുടെ സെക്രട്ടറി ഒന്നും പ്രതികരിച്ചില്ല എന്നത് അത്ഭുതപ്പെടുത്തുന്നു. കോൺഗ്രസിന്റെ അഖിലേന്ത്യാ നേതാവായ കെ.സി.വേണുഗോപാൽ പോലും അക്രമത്തെ അപലപിക്കുമ്പോൾ അമ്മയുടെ പ്രതിനിധികൾ എന്തുകൊണ്ട് പ്രതികരിക്കുന്നില്ല എന്ന് മനസ്സിലാകുന്നില്ല. ഇവർ ആരെപേടിച്ചാണ് ഒളിച്ചിരിക്കുന്നതെന്ന് മനസ്സിലാകുന്നില്ല. ഇത്തരം ആക്രമണങ്ങൾ പ്രതിഷേധാർഹമാണ്. സമാനമായ അക്രമങ്ങൾ തനിക്കെതിരെയും നടന്നിട്ടുണ്ട്. ഇത്തരം അക്രമ സമരങ്ങളിൽ സ്ത്രീകളെ മറയാക്കുന്നത് ലജ്ജാകരമാണെന്നും ഗണേഷ് കുമാർ പറഞ്ഞു.