ആത്മഹത്യ ഒന്നിനും ഒരു പരിഹാരമല്ല. ഒരു നിമിഷത്തെ വികാരത്തില്‍ ചെയ്യുന്നതാണ് ആത്മഹത്യ. അതേത് ആത്മഹത്യകളിലും കാണാനാകും. ഇനി എന്തൊക്കെ തല പോകുന്ന പ്രശ്‌നങ്ങളാണെങ്കിലും അതിനെല്ലാം പരിഹാരങ്ങളുണ്ട്. അതൊന്നും ചിന്തിക്കാതെ ഒരു നിമിഷത്തെ വികാരത്തില്‍ മറ്റവനെ തോല്‍പ്പിക്കാനായി ചാടി പുറപ്പെടുന്നവരാണ് പലരും. എന്നാല്‍ മറ്റവന്‍ തോല്‍ക്കുകയുമില്ല നമ്മള്‍ ചെയ്തത് വെറുതേയുമാകും.

പല ആത്മഹത്യകളും തട്ടിമാറി പോകാറുണ്ട്. അതാണിവിടെ സംഭവിച്ചത്. ആലുവയിലാണ് സംഭവം നടന്നത്. പൊലീസിന്റെ ഇടപെടല്‍ കാരണം യുവാവിനെ രണ്ടാം ജന്മമാണ് ലഭിച്ചത്. ആലുവ മണപ്പുറം നടപ്പാലത്തില്‍ നിന്നു പുഴയിലേക്കു ചാടി ആത്മഹത്യയ്ക്ക് ശ്രമിച്ച യുവാവിനാണു റൂറല്‍ പൊലീസ് രക്ഷകനായത്. യുവാവിന്റെ ജീവന്‍ രക്ഷിച്ച ഉദ്യോഗസ്ഥര്‍ക്ക് എറണാകുളം റൂറല്‍ ജില്ലാ പൊലീസ് മേധാവി കെ. കാര്‍ത്തിക് ഗുഡ് സര്‍വീസ് എന്‍ട്രി പ്രഖ്യാപിച്ചു.

പെരുമ്പാവൂര്‍ അല്ലപ്ര സ്വദേശിയായ യുവാവാണ് പൊല്ലാപ്പുണ്ടാക്കിയത്. ഒന്നും രണ്ടും പറഞ്ഞ് കുടുംബ വഴക്കായി. ഭാര്യയും ഭര്‍ത്താവും വിട്ടുകൊടുത്തില്ല. ഇരുവരും താന്‍ പിടിച്ച മുയലിന് രണ്ട് കൊമ്പെന്ന രീതിയില്‍ ഉറച്ച് നിന്നു. ഇതിനിടെ പലരും പറഞ്ഞ് വിലക്കിയെങ്കിലും കേട്ടില്ല. തുടര്‍ന്ന് ആത്മഹത്യ ഭീഷണി മുഴക്കിയെങ്കിലും മൈന്‍ഡ് ചെയ്തില്ല. എന്നാല്‍ യുവാവ് വീട്ടില്‍ നിന്നും ഇറങ്ങിയതോടെ സംഗതി കൈവിട്ടെന്ന് ഭാര്യക്ക് മനസിലായി. അല്‍പം താണുകൊടുത്തെങ്കിലും അല്‍പം പോലും മാറാതെ കാണിച്ചു തരാമെന്ന് പറഞ്ഞ് യുവാവ് മുന്നോട്ട് പോയി.

അവസാനം യുവാവ് രാത്രി വീടുവിട്ട് ഇറങ്ങുകയായിരുന്നു. ഇതോടെ ഭാര്യക്ക് അങ്കലാപ്പായി. വെറുതേ പറഞ്ഞ് തീര്‍ക്കാമായിരുന്ന ചെറിയ പ്രശ്‌നമാണ് ഭര്‍ത്താവിനെ ആത്മഹത്യയിലേക്ക് നയിച്ചത്. ഉടന്‍ എന്തെങ്കിലും ചെയ്തതില്ലെങ്കില്‍ ചിലപ്പോള്‍ ജീവിത കാലം മുഴുവന്‍ വേദനിക്കേണ്ടി വരും. എന്ത് ചെയ്യണമെന്നറിയാതെ ഭാര്യ വാവിട്ട് കരഞ്ഞു. ഉടന്‍ തന്നെ ഭാര്യ പൊലീസിന്റെ എമര്‍ജന്‍സി നമ്പറിലേക്ക് വിവരമറിയിച്ചു.

ഭര്‍ത്താവ് പുറത്ത് പോയെന്ന് മാത്രമേ ഭാര്യക്കറിയാവൂ. എവിടെ പോയെന്നോ എങ്ങോട്ട് പോയെന്നോ അറിയാന്‍ പറ്റിയില്ല. യുവാവിന്റെ മൊബൈല്‍ ഫോണില്‍ വിളിച്ചിട്ടും കിട്ടുന്നില്ല എന്നറിയിച്ചു. എങ്ങനേയും ഭര്‍ത്താവിനെ രക്ഷിക്കണമെന്ന് അവര്‍ കരഞ്ഞ് പറഞ്ഞു. തനിക്ക് അദ്ദേഹമല്ലാതെ ആരുമില്ലെന്നും പറഞ്ഞു.

യുവതിയില്‍ നിന്നും കിട്ടിയ സൂചന പ്രകാരം എമര്‍ജന്‍സി റെസ്‌പോണ്‍സ് സെന്ററില്‍ നിന്നു ആലുവ കണ്‍ട്രോള്‍ റൂമിലേക്കു വിവരം കൈമാറി. ഉടന്‍ തന്നെ ആലുവ പോലീസ് സംഗതി സീരിയസായി എടുത്തു.

കണ്‍ട്രോള്‍ റൂമില്‍ നിന്നു യുവാവിനെ മൊബൈല്‍ ഫോണില്‍ ബന്ധപ്പെട്ടു. പക്ഷെ ഫോണ്‍ എടുക്കുന്നില്ല. ഇതോടെ യുവാവ് എന്തെങ്കിലും ചെയ്യുമെന്നും പോലീസിന് മനസിലായി. യുവാവ് എവിടെയുണ്ടെന്ന് ആദ്യം കണ്ടുപിടിക്കണം. അതാണ് ആദ്യ വഴി.

തുടര്‍ന്ന് യുവാവിന്റെ മൊബൈല്‍ ലൊക്കേഷന്‍ പരിശോധിച്ചു. ലൊക്കേഷന്‍ സ്ഥലം മണപ്പുറം നടപ്പാലമാണെന്നു മനസ്സിലാക്കി. ഇതോടെ പെട്ടെന്നിടപെട്ടില്ലെങ്കില്‍ ചിലപ്പോള്‍ കൈവിട്ടെന്നിരിക്കും. ഉടന്‍ തന്നെ വയര്‍ലസിലൂടെ പോലീസുകാര്‍ക്ക് അലര്‍ട്ട് നല്‍കി.

യുവാവ് നില്‍ക്കുന്ന സ്ഥലത്തെ ക്യാമറയില്‍ നിന്നുള്ള ദൃശ്യം കണ്‍ട്രോള്‍ റൂമില്‍ സ്ഥാപിച്ചിട്ടുള്ള സംവിധാനത്തില്‍ കണ്ടു. തുടര്‍ന്ന് പൊലീസ് സംഘം മഫ്തിയില്‍ അവിടേക്കു കുതിച്ചു. ഇതിനിടെ യുവാവ് ഫോണെടുത്തു. ഇതോടെ കണ്‍ട്രോള്‍ റൂമിലുള്ള ഉദ്യോഗസ്ഥന്‍ യുവാവുമായി സംസാരം തുടര്‍ന്നുകൊണ്ടിരുന്നു.

അല്‍പം അകലെ വാഹനം നിര്‍ത്തിയിട്ട ശേഷം ഉദ്യോഗസ്ഥര്‍ തന്ത്രപൂര്‍വം യുവാവിനെ സമീപിച്ച് രക്ഷിച്ചു കൊണ്ടുവരികയായിരുന്നു. ആലുവ സ്‌റ്റേഷനിലെത്തിച്ച യുവാവിനെ ആശ്വസിപ്പിച്ച് വീട്ടുകാരെ വിളിച്ചുവരുത്തി അവരോടൊപ്പം പറഞ്ഞയച്ചു. യുവാവിനെ കണ്ടതോടെ യുവതി പൊട്ടിക്കരഞ്ഞു. ഒപ്പം യുവാവിനും കരച്ചില്‍ വന്നു. ഇരുവരും പരസ്പരം ആശ്വസിപ്പിച്ചു. നോക്കണേ ഒരു നിമിഷം വൈകിയെങ്കില്‍. ഇത്രയേയുള്ളൂ ഏത് ആത്മഹത്യയും.