ഹൈക്കോടതിയാണ് ദിലീപിനെ രക്ഷിച്ചതെന്ന പരോക്ഷ വിമര്‍ശനവുമായി ഹൈക്കോടതി അഭിഭാഷകനും പരിസ്ഥിതി പ്രവര്‍ത്തകനുമായ ഹരീഷ് വാസുദേവന്‍.

ഹരീഷ് വാസുദേവന് പിന്നാലെ നിയമ ലോകത്തെ ബഹുമാനിക്കുന്ന സാധാരണക്കാരും ദിലീപിന് മുന്നിലുള്ള നിയമത്തിന്റെ വിധേയത്വത്തെ വിമര്‍ശിച്ച് രംഗത്തെത്തി.

ഹരീഷ് വാസുദേവന്റെ കുറിപ്പ് തുടങ്ങുന്നത് ഇങ്ങനെയാണ്:

'കേരളത്തിലെ ഏറ്റവും പ്രധാനപ്പെട്ട കേസുകളില്‍ ഒന്നിലെ പ്രതി പറയുകയാണ് പോലീസ് അന്വേഷിക്കുന്ന ഡിജിറ്റല്‍ തെളിവ് താന്‍ കൊടുക്കില്ല, അതിലെ തെളിവ് താന്‍ തന്നെ സ്വകാര്യ ലാബില്‍ ഫോറന്‍സിക് പരിശോധനയ്ക്ക് അയച്ചു എന്ന്


കേരളത്തിലെ പോലീസും കോടതിയുമൊക്കെ ഇയാളുടെ കാല്‍ക്കീഴിലാണോ?  CrPC438 ലെ ഒരപേക്ഷ പരിഗണിക്കുന്ന കോടതിയുടെയോ പ്രതിയായ ദിലീപിന്റെയോ ഔദാര്യം വേണോ പൊലീസിന് ആ തെളിവ് ശേഖരിക്കാന്‍? വേണ്ട. ജനാധിപത്യ മര്യാദ കൊണ്ടാണ് പോലീസ് അത് ചെയ്യാത്തത്.

ഒരു പ്രതിയെ കസ്റ്റഡിയില്‍ ചോദ്യം ചെയ്യുന്ന സമയം നിര്‍ണ്ണായകമാണ്, എപ്പോഴെങ്കിലും കസ്റ്റഡിയില്‍ കിട്ടിയാല്‍ പോരാ. കേസ് അന്വേഷണത്തോട് തെളിവ് കൊടുത്തു സഹകരിക്കാതെ ഇരിക്കാനുള്ള, പൂര്‍ണ്ണമായി മൗനം പാലിക്കാനുള്ള എല്ലാ അവകാശവും പ്രതിക്കുണ്ട്.

എന്നാല്‍, പോലീസ് അന്വേഷിക്കുന്ന നിര്‍ണ്ണായക തെളിവ് താന്‍ മാനുപലേറ്റ് ചെയ്യുന്നു എന്നു കോടതിയോടും പൊലീസിനോടും പറയാന്‍ ദിലീപിനെപ്പോലെ സ്വാധീനമുള്ള ഒരു പ്രതിക്ക് മാത്രമേ സാധിക്കൂ.  CrPC 91 അനുസരിച്ചു നോട്ടീസ് കൊടുത്താല്‍ ഹാജരാക്കേണ്ട വസ്തുവല്ലേ മൊബൈല്‍ ഫോണ്‍? അത് ഇന്ന് കസ്റ്റഡിയില്‍ കിട്ടുന്നതും നാളെ കിട്ടുന്നതും തമ്മില്‍ വലിയ വലിയ വ്യത്യാസമില്ലേ? തെളിവ് നശിപ്പിക്കും മുന്‍പ് വേണ്ടേ കിട്ടാന്‍?

ഹരീഷ് വാസുദേവന്‍ തുടര്‍ന്ന് ഉയര്‍ത്തുന്നത് കാതലായ ഒരു സംശയമാണ്.

ഇത്രയും പരിഗണന കോടതിയില്‍ നിന്ന് മറ്റേത് പ്രതിക്ക് കിട്ടുന്നുണ്ട്?

ദിലീപിന്റെ അറസ്റ്റ് വൈകിച്ചത് ഹൈക്കോടതി ഉത്തരവാണ്. അതിനു തികച്ചും ന്യായമുണ്ടായിരുന്നു. എന്നാല്‍ ആ സമയം കൊണ്ട് തെളിവ് നശിപ്പിക്കാന്‍ ദിലീപ് സ്വകാര്യ ലാബിനെ സമീപിച്ചു എന്ന ഒറ്റ കാരണത്തില്‍ മുന്‍കൂര്‍ ജാമ്യാപേക്ഷ കോടതി തള്ളാവുന്നതാണ്.Not to arrest order തെളിവ് നശിപ്പിക്കാനുള്ള മറയായി ഉപയോഗിക്കാന്‍ ബഹു ഹൈക്കോടതി നിന്ന് കൊടുക്കാന്‍ പാടില്ലാ.

ഇതൊരു അഭിഭാഷകന്റെ അവശ്യമല്ല, നീതിന്യായ വ്യവസ്ഥയില്‍ വിശ്വാസമുള്ള ഒരു പൗരന്റെ തുറന്ന ചിന്ത മാത്രമാണ്.



ഹൈക്കോടതിയിലെ നിരവധി അഭിഭാഷകര്‍ ഹരീഷിന്റെ പോസ്റ്റിന് കമന്റിട്ടിട്ടുണ്ട്. യഥാര്‍ത്ഥത്തില്‍ നിയമം ദിലീപിന് പിന്നാലെ എന്ന മട്ടിലുള്ള വാദങ്ങളാണ് ശനിയാഴ്ച ഹൈക്കോടതിയില്‍ നടന്നത്. ഹരീഷ് വാസുദേവന്‍ എഴുതിയത് പോലെ നിയമം ഇങ്ങനെയും ദിലീപിന് പിന്നാലെ സഞ്ചരിക്കണമായിരുന്നോ?

കോടതിയുടെയും പോലീസിന്റെയും നിസഹായവസ്ഥയാണ് ഹൈക്കോടതിയില്‍ ശനിയാഴ്ച കണ്ടത്. തിങ്കളാഴ്ച ഫോണ്‍ ഹാജരാക്കണമെന്ന് കോടതി പറഞ്ഞപ്പോള്‍ ദിലീപിന് സൗകര്യമുണ്ടായിരുന്നില്ല. നടിയെ ആക്രമിച്ച കേസില്‍ ദിലീപ് വാദിയാണോ പ്ര തിയാണോ എന്ന് പലര്‍ക്കും സംശയം തോന്നിയ മുഹൂര്‍ത്തമായിരുന്നു ഇത്.

പ്രതിക്ക് മുന്‍തൂക്കം കിട്ടുമെന്ന് എപ്പോഴും നിയമം പറയാറുണ്ട്. എന്നാല്‍ ഇത്രത്തോളം മുന്‍തൂക്കം ലഭിക്കുമോ എന്നെല്ലാവരും സംശയിക്കുന്നു. അത് പ്രതി ദിലീപായതുകൊണ്ടാണെന്ന സം ശയമാണ് കേരളത്തിനുള്ളത്. വരും ദിവസങ്ങളില്‍ കൂടുതലാളുകള്‍ നിയമ സംവിധാനത്തിനെതിരെ രംഗത്തെത്തുമെന്നാണ് കരുതുന്നത്.