ഇന്ന് ഗാന്ധിജിയുടെ രക്ത സാക്ഷി ദിനമാണ്. അദ്ദേഹത്ത സ്മരിച്ച് കൊണ്ട് കുറിപ്പ് പങ്കു വച്ചിരിക്കുകയാണ് രാഹുൽ മാങ്കൂട്ടത്തിൽ . ഹിന്ദു മതത്തെ ഉപയോഗിച്ച് ഇതരമതങ്ങളെ ഇല്ലായ്മ ചെയ്യുവാൻ നിന്ന സംഘപരിവാർ ഫാഷിസത്തിന് ആ അർദ്ധനഗ്നനായ, ദുർബല ശരീരത്തിന്റെയുടമ ഹിന്ദുമത വിശ്വാസിയായി തന്നെ പ്രതിരോധമുയർത്തി. അതിന്റെ മറുപടിയായിയിരുന്നു ആ വെടിയൊച്ചയെന്നാണ് അദ്ദേഹം പറഞ്ഞിരിക്കുന്നത്.

അദ്ദേഹത്തിന്റെ ഫേസ്ബുക്ക് കുറിപ്പിന്റെ പൂർണ്ണ രൂപം ഇങ്ങനെ; "ആരാണ് ഗാന്ധി? നേരാണ് ഗാന്ധി, നേരിനു നാം നല്കിയ പേരാണ് ഗാന്ധി" ആ നേരിനെ കൊലപ്പെടുത്തിയത് സംഘപരിവാറാണ്. ഗോഡ്സേ എന്ന ഒരു വ്യക്തി മാത്രമാണ് വെടിവെച്ചതെങ്കിലും, അത് പക്ഷേ ഒരു വ്യക്തിയുടെ മാത്രം തീരുമാനമോ ആവശ്യമോ ആയിരുന്നില്ല.

കാരണം ഗാന്ധിയും ഗോഡ്സേയും തമ്മിൽ വ്യക്തിപരമായി യാതൊരു പ്രശ്നങ്ങളും ഉണ്ടായിരുന്നില്ല. ഗാന്ധിയെ കൊല്ലുവാൻ സംഘപരിവാർ ഉപയോഗിച്ച രണ്ട് ആയുധങ്ങളാണ്, ഒന്ന് ആ പിസ്റ്റളും, മറ്റൊന്ന് ആ പിസ്റ്റളേന്തിയ ഗോഡ്സേയും. അതുകൊണ്ട് തന്നെ ഗാന്ധിയെ കൊന്നത് ഗോഡ്സേയാണ് എന്നതിനേക്കാൾ, സംഘപരിവാറാണ് എന്ന് പറയുന്നത്.

ഗാന്ധിയുടെ മതേതര ചിന്തയും, ബഹുസ്വരത ഉയർത്തുന്ന മൂല്യങ്ങളും അവരെ അത്രമേൽ അലോസരപ്പെടുത്തിയതിനാലാണ് ആ വന്ദ്യവയോധികനിൽ അവർ വെടിയുതിർത്തത്. ഇതര മതവിശ്വാസികളേക്കാളോ, നാസ്തികരേക്കാളോ സംഘപരിവാറിനു വെല്ലുവിളിയുയർത്തിയത് വിശ്വാസിയായ, പ്രാക്ടീസിംഗ് ഹിന്ദുവായ ഗാന്ധി തന്നെയാണ്.

കാരണം സംഘപരിവാർ ഹിന്ദു മതത്തെ ഇതര മത വിരുദ്ധതയ്ക്കുള്ള ഉപാധിയായി വർഗ്ഗീയത കുത്തി നിറച്ചപ്പോൾ, ഗാന്ധി എല്ലാ മതങ്ങളെയും ചേർത്തു നിർത്തുന്ന വിശ്വാസത്തിന്റെ പ്രതീകമായി നിലനിന്നു. ഗോഡ്സേ പോലും ഗാന്ധിയെ കൊന്നതിന്റെ ന്യായീകരണമായി കരുതിയത്, ''ഗാന്ധി മതത്തെ ദുർബലപ്പെടുത്തി" എന്നാണ്. ആയുധമേന്തിയ, ശത്രു നിഗ്രഹകനായ രാമനിൽ നിന്ന് ശത്രുവിനോട് സഹിഷ്ണുത കാണിക്കുന്ന, സമാധാനത്തിന്റെയും അഹിംസയുടെയും വക്താവാകുന്ന ഗാന്ധിയുടെ രാമൻ വേറിട്ടു നിന്നു.

ഹിന്ദു മതത്തെ ഉപയോഗിച്ച് ഇതരമതങ്ങളെ ഇല്ലായ്മ ചെയ്യുവാൻ നിന്ന സംഘപരിവാർ ഫാഷിസത്തിന് ആ അർദ്ധനഗ്നനായ ദുർബല ശരീരത്തിന്റെയുടമ ഹിന്ദുമത വിശ്വാസിയായി തന്നെ പ്രതിരോധമുയർത്തി.. അതിന്റെ മറുപടിയായിയിരുന്നു ആ വെടിയൊച്ച.... അതിന്റെ പ്രതിധ്വനി ഇപ്പോഴും ഉയരുന്നുണ്ട്, കോട്ട കെട്ടി കാക്കുന്നത് ഗാന്ധിസം തന്നെയാണ്... ഗാന്ധി മരിക്കാത്ത ഇന്ത്യയാണ് പ്രതിരോധം...