അട്ടപ്പാടിയില്‍ ആദിവാസി ബാലന്‍ കൊവിഡ് ബാധിച്ച്‌ മരിച്ച സംഭവത്തില്‍ കോട്ടത്തറ ട്രൈബല്‍ ആശുപത്രിക്കെതിരെ ആരോപണം ഉയര്‍ത്തി കുടുംബം രംഗത്തെത്തി. കടുത്ത പനി ഉണ്ടായിട്ടും കുട്ടിയെ കിടത്തി ചികിത്സിക്കാതെ ആശുപത്രി മടക്കി അയച്ചുവെന്ന് കുടുംബം പറയുന്നു. എന്നാല്‍ സംഭവത്തില്‍ ആശുപത്രിയുടെ ഭാഗത്ത് നിന്നും വീഴ്ച ഉണ്ടായിട്ടില്ലെന്ന് കോട്ടത്തറ ട്രൈബല്‍ ആശുപത്രി സൂപ്രണ്ട് അറിയിച്ചു.

അട്ടപ്പാടിയില്‍ കൊവിഡ് ബാധിച്ച്‌ രണ്ട് വയസ്സുകാരന്‍ മരിച്ച സംഭവത്തിലാണ് ആശുപത്രിയുടെ അനാസ്ഥ കുടുംബം ആരോപിക്കുന്നത്. ശനിയാഴ്ച പുലര്‍ച്ചെയാണ് സൈജു - സരസ്വതി ദമ്ബതികളുടെ മകന്‍ സ്വാദീഷ് കൊവിഡ് ബാധിച്ച്‌ മരിച്ചത്. കടുത്ത പനിയെ തുടര്‍ന്ന് കുട്ടിയെ ചൊവ്വാഴ്ച അഗളിയിലെ സ്വകാര്യ ആശുപത്രിയില്‍ കാണിച്ചിരുന്നു. പനി കുറയാത്തതിനാല്‍ കുട്ടിയെ വ്യാഴാഴ്ച കോട്ടത്തറ ട്രൈബല്‍ ആശുപത്രിയിലേക്ക് കൊണ്ടുവന്നു. മരുന്ന് നല്‍കിയ ശേഷം വീട്ടിലേക്ക് മടങ്ങിക്കൊള്ളാന്‍ ആശുപത്രി അധികൃതര്‍ പറഞ്ഞെങ്കിലും, കുട്ടി ക്ഷീണിച്ച്‌ അവശനായതോടെ മാതാപിതാക്കള്‍ കിടത്തി ചികിത്സിക്കാന്‍ ആവശ്യപ്പെട്ടു. എന്നാല്‍ അവരുടെ ആവശ്യം അവഗണിച്ചുകൊണ്ട് ആശുപത്രി തങ്ങളെ നിര്‍ബന്ധിച്ച്‌ തിരിച്ച്‌ അയയ്ക്കുകയായിരുന്നു എന്ന് കുടുംബം ആരോപിക്കുന്നു.

എന്നാല്‍ ആശുപത്രിയുടെ ഭാഗത്ത് നിന്നും വീഴ്‌ച്ച ഇല്ലെന്നാണ് ആശുപത്രി സൂപ്രണ്ടിന്റെ വാദം. കുട്ടിയെ മൂന്ന് മണിക്കൂര്‍ നിരീക്ഷിച്ചതിന് ശേഷമാണ് മടക്കി അയച്ചത്. ചുമ ഒഴികെ മറ്റ്‌ രോഗലക്ഷണങ്ങള്‍ ഒന്നും ഉണ്ടായിരുന്നില്ല. അടുത്ത ദിവസം ശിശുരോഗ വിദഗ്ധനെ കാണിക്കാനും നിര്‍ദ്ദേശിച്ചിരുന്നു. ചെറിയ കുട്ടിയായതിനാലാണ് കൊവിഡ് ടെസ്റ്റ് നടത്താതിരുന്നതെന്നും സൂപ്രണ്ട് ഡോ. അബ്ദുള്‍ റഹ്മാന്‍ പറഞ്ഞു.