സംസ്ഥാനത്ത് 1 മുതല്‍ 9 വരെയുള്ള ക്ലാസ്സുകളില്‍ അധ്യയനം പുനരാരംഭിച്ചപ്പോള്‍ എല്ലാ ജില്ലകളിലുമായി ബാച്ച് അടിസ്ഥാനത്തില്‍ ഇന്ന് വരേണ്ടിയിരുന്നവരില്‍ 82% കുട്ടികള്‍ ഹാജരായി. ഫെബ്രുവരി 19 വരെ ബാച്ച് അടിസ്ഥാനത്തില്‍ ഉച്ചവരെ ആയിരിക്കും അധ്യയനം.

സംസ്ഥാനത്ത് പ്രീ-പ്രൈമറി ക്ലാസ്സുകളും ആരംഭിച്ചു. കോവിഡ് നിയന്ത്രണങ്ങള്‍ വന്നതിനുശേഷം ആദ്യമായാണ് പ്രീ-പ്രൈമറി ക്ലാസ്സുകള്‍ ഓഫ്ലൈനായി ആരംഭിക്കുന്നത്. ഓരോ ദിവസവും 50% കുട്ടികള്‍ ഉച്ചവരെ അധ്യയനം എന്ന നിലയിലാണ് പ്രീ-പ്രൈമറി ക്ലാസ്സുകള്‍ പ്രവര്‍ത്തിക്കുന്നത്. സംസ്ഥാനത്താകെ ഇന്ന് വരേണ്ടിയിരുന്നവരില്‍ 65% കുട്ടികള്‍ ക്ലാസ്സുകളില്‍ എത്തിച്ചേര്‍ന്നിരുന്നു.

ഫെബ്രുവരി 21 മുതല്‍ 1 മുതല്‍ 12 വരെയുള്ള ക്ലാസ്സുകളിലെ മുഴുവന്‍ കുട്ടികളെയും ഉള്‍പ്പെടുത്തി രാവിലെ മുതല്‍ വൈകുന്നേരം വരെ ക്ലാസ്സുകള്‍ നടത്തുന്നതിനുള്ള മുന്നൊരുക്ക പ്രവര്‍ത്തനങ്ങള്‍ സ്‌കൂളുകളില്‍ ആരംഭിച്ചിട്ടുണ്ടെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി ശിവന്‍കുട്ടി വ്യക്തമാക്കി.

തിരുവനന്തപുരം തൈക്കാട് ഗവര്‍മെന്റ് മോഡല്‍ എച്ച്.എസ്.എല്‍. പി.എസിലെത്തി കുട്ടികളെ മന്ത്രി വി ശിവന്‍കുട്ടി നേരില്‍ കണ്ടു. കുട്ടികളുമായി മന്ത്രി ഏറെ നേരം ചിലവഴിച്ചു. കോവിഡ് മാനദണ്ഡങ്ങള്‍ പാലിച്ച് അധ്യയനം മുന്നോട്ട് പോകുമെന്ന് മന്ത്രി വ്യക്തമാക്കി.