രക്ഷപ്പെട്ടത് അത്ഭുതകരമായി.... ഉദുമയില്‍ നിന്ന് പൂച്ചക്കാടിലേക്കുള്ള യാത്രമധ്യേ കാര്‍ നിയന്ത്രണം വിട്ട് റോഡരികിലെ 15 മീറ്ററോളം ആഴമുള്ള കിണറ്റിലേക്ക് ....

ആവിയില്‍ നിന്ന് പള്ളിക്കര ബീച്ചിലേക്കു പോവുകയായിരുന്ന ഇരുചക്ര വാഹനത്തിലിടിച്ചശേഷം കാര്‍ 15 മീറ്ററോളം ആഴമുള്ള പള്ളിയുടെ അടുത്തുള്ള കിണറിലേക്ക് വീഴുകയായിരുന്നു. ഇന്നലെ വൈകുന്നേരം നാലരയോടെയാണ് സംഭവം നടന്നത്.

കാറിലുണ്ടായിരുന്ന മൂന്നു കുട്ടികളെ നാട്ടുകാരും പിതാവിനെ അഗ്‌നിരക്ഷാസേനയും ചേര്‍ന്ന് രക്ഷപ്പെടുത്തി. ഉദുമ സ്വദേശി അബ്ദുല്‍ നാസര്‍, മക്കളായ മുഹമ്മദ് മിഥുലാജ്, അജ്മല്‍, വാഹിദ് എന്നിവര്‍ സഞ്ചരിച്ച കാറാണ് കിണറ്റില്‍ വീണത്. അപകടം കണ്ടയുടന്‍ നാട്ടുകാരായ രാമചന്ദ്രന്‍, അയ്യപ്പന്‍, ബാബു എന്നിവര്‍ ഉടന്‍ കിണറ്റില്‍ ഇറങ്ങി രണ്ടു കുട്ടികളെ രക്ഷപ്പെടുത്തി മുകളില്‍ എത്തിച്ചു.


അപ്പോഴേക്കും കാഞ്ഞങ്ങാടുനിന്നു സ്റ്റേഷന്‍ ഓഫിസര്‍ പി.വി. പവിത്രന്റെ നേതൃത്വത്തില്‍ എത്തിയ സേനയിലെ ഇ.വി. ലിനേഷ്, എച്ച്. നിഖില്‍ കിണറ്റില്‍ ഇറങ്ങിയാണ് നസീറിനെയും ഒരു കുട്ടിയെയും രക്ഷപ്പെടുത്തിയത്.

ഇരുചക്ര വാഹനം ഓടിച്ച ഫസീല (29), ബന്ധുക്കളായ അസ്മില (14 ), അന്‍സില്‍ (9 ) എന്നിവരെ നാട്ടുകാര്‍ ചേര്‍ന്ന് സ്വകാര്യ ആശുപത്രിയിലേക്കു മാറ്റി.

ഇതിനു പിന്നാലെ കിണറില്‍ അകപ്പെട്ടവരെയെയും എത്തിച്ചു. ഫസിലക്ക് പരിക്ക് അല്‍പം ഗുരുതരമാണ്. ആള്‍മറ തകര്‍ത്താണ് കാര്‍ കിണറിലേക്ക് മറിഞ്ഞുവീണത്.