തൃക്കാക്കരയില്‍ എന്‍ഡിഎ സ്ഥാനാര്‍ഥി എ.എന്‍. രാധാകൃഷ്ണനു കെട്ടിവച്ച കാശ് നഷ്ടമാകും. കഴിഞ്ഞ തിരഞ്ഞെടുപ്പില്‍ ബിജെപിയുടെ ജില്ലാ നേതാവിനു ലഭിച്ച വോട്ടുകള്‍ പോലും പാര്‍ട്ടിയുടെ സംസ്ഥാന ഉപാധ്യക്ഷനു ലഭിച്ചുമില്ല. 12,957 വോട്ടുകളുമായി മൂന്നാം സ്ഥാനമാണ് രാധാകൃഷ്ണന് നേടാനായത്.

തിരഞ്ഞെടുപ്പു കമ്മിഷന്റെ കണക്കനുസരിച്ച് പോസ്റ്റല്‍ വോട്ടടക്കം 1,35,349 വോട്ടുകളാണ് ഇത്തവണ തൃക്കാക്കരയില്‍ പോള്‍ ചെയ്തത്. ഇതിന്റെ ആറിലൊന്നായ 22,551 വോട്ടുകള്‍ നേടിയെങ്കില്‍ മാത്രമേ കെട്ടിവച്ച കാശ് തിരികെ ലഭിക്കൂ. എന്നാല്‍ രാധാകൃഷ്ണന് ലഭിച്ചതാകട്ടെ 12,957 (9.57%) വോട്ടുകള്‍ മാത്രം. 2021ല്‍ മത്സരിച്ച എസ്.സജി എന്‍ഡിഎയ്ക്കായി 15,483 (11.34%) വോട്ടുകള്‍ നേടിയിട്ടുണ്ട്. കഴിഞ്ഞ തവണ 13,897 വോട്ടുകള്‍ നേടിയ ട്വന്റി20യും രംഗത്തുണ്ടായിരുന്നു. എന്നാല്‍ ഇത്തവണ ട്വന്റി20 സ്ഥാനാര്‍ഥികള്‍ ഇല്ലാതിരുന്നിട്ടു പോലും ബിജെപി മുന്നണിയുടെ വോട്ടുകള്‍ കുറയുകയാണ് ചെയ്തത്.

രാധാകൃഷ്ണന്‍ ഉള്‍പ്പെടെ ഇത്തവണ മത്സരരംഗത്തുണ്ടായിരുന്ന ഏഴു പേര്‍ക്കാണ് കെട്ടിവച്ച കാശ് നഷ്ടമാവുക. തിരഞ്ഞെടുപ്പു കമ്മിഷന്റെ നിയമം അനുസരിച്ച് ആകെ പോള്‍ ചെയ്യുന്ന വോട്ടുകളുടെ ആറിലൊന്ന് (16.7%) എങ്കിലും നേടിയില്ലെങ്കില്‍ കെട്ടിവച്ച കാശ് നഷ്ടമാകും. നിയമസഭാ തിരഞ്ഞെടുപ്പില്‍ മത്സരിക്കാന്‍ ഓരോ സ്ഥാനാര്‍ഥിയും 10,000 രൂപയും ലോക്‌സഭയിലേക്കെങ്കില്‍ 25,000 രൂപയും കമ്മിഷനില്‍ കെട്ടിവയ്ക്കണം എന്നാണ് ചട്ടം.

അനില്‍ നായര്‍, ജോമോന്‍ ജോസഫ് സ്രാമ്പിക്കല്‍ എപിജെ ജുമാന്‍ വിഎസ്, സി.പി ദിലീപ് കുമാര്‍, ബോസ്‌കോ കളമശേരി, മന്മഥന്‍ എന്നിവര്‍ക്കാണ് രാധാകൃഷ്ണനു പുറമെ കെട്ടിവച്ച കാശ് നഷ്ടമാവുക. നോട്ടയ്ക്ക് 1,111 വോട്ടുകളും ലഭിച്ചു.