ആലപ്പുഴയില്‍ മാരകായുധങ്ങളും സ്‌ഫോടകവസ്തുക്കളുമായി രണ്ടുപേര്‍ പിടിയിലായി. ഇരവുകാട് ബൈപ്പാസിന് സമീപം ഒരു വീട്ടില്‍ ഒളിപ്പിച്ച നിലയിലായിരുന്നു വടിവാളുകളും സ്‌ഫോടകവസ്തുക്കളും. ഇവിടെ നിന്ന് മയക്കുമരുന്നും കണ്ടെടുത്തു. ജില്ലാ പൊലീസ് മേധാവിയുടെ നേതൃത്വത്തിലായിരുന്നു റെയ്ഡ്. പൊലീസിനെ കണ്ട് ഒരാള്‍ ഓടി രക്ഷപ്പെട്ടു.

ഇയാള്‍ക്കായി പൊലീസ് തെരച്ചില്‍ തുടങ്ങി. രാത്രിയോടെയായിരുന്നു സംഭവം നടന്നത്. ആയുധങ്ങള്‍ സൂക്ഷിച്ചിരുന്നതായി പൊലീസിന് രഹസ്യവിവരം ലഭിച്ചിരുന്നു.

ഇതിന്റെ അടിസ്ഥാനത്തിലാണ് പൊലീസ് എത്തിയത്. വടിവാള്‍ ഉള്‍പ്പെടെയുളള മാരകായുധങ്ങള്‍, എംഡിഎംഎ, കഞ്ചാവ്, സ്ഫോടക വസ്തുക്കള്‍ എന്നിവയാണ് പിടിച്ചെടുത്തത്. ക്രിമിനല്‍ പശ്ചാത്തലമുള്ള സംഘമാണ് ഇവരെന്നാണ് പൊലീസ് ഭാഷ്യം.