ഒത്തിരിക്കാലം കൂടി അച്ഛനൊപ്പമുള്ള ഓണക്കാലം.... ഇക്കുറി അച്ഛനോടൊപ്പം ഓണം ആഘോഷിക്കാനുള്ള സന്തോഷത്തിലായിരുന്നു അഭിരാമി, ആ ആഗ്രഹം ബാക്കിയാക്കി അവള്‍ യാത്രയായി.... കണ്ണീരടക്കാനാവാതെ കുടുംബം
ഇപ്രാവശ്യത്തെ ഓണത്തിന് അച്ഛനൊപ്പമുണ്ടല്ലോ എന്ന സന്തോഷത്തിലായിരുന്നു അഭിരാമി. വിദേശത്തായിരുന്ന അച്ഛന്‍ ഹരീഷ് തലേദിവസം വന്നു. ഒത്തിരിക്കാലം കൂടി അച്ഛനൊപ്പമുള്ള ഓണക്കാലം. അഭിരാമി ഏറെ സന്തോഷത്തിലായിരുന്ന ദിവസം രാവിലെയാണ് തെരുവുനായയുടെ കടിയേറ്റത്.

കുടുംബത്തോടൊപ്പമുള്ള ആഹ്ലാദനിമിഷങ്ങള്‍ ഹരീഷ് അനുഭവിച്ച് തുടങ്ങുമ്പോഴാണ് ദേവുവെന്ന് വിളിച്ചിരുന്ന മകളെ തെരുവുനായ കടിച്ചെന്ന ദുഃഖവാര്‍ത്ത എത്തുന്നത്. പിന്നീട് ഊണും ഉറക്കവും ഉപേക്ഷിച്ച് കുഞ്ഞിനൊപ്പമായിരുന്നു. വെള്ളിയാഴ്ച മുതലാണ് അഭിരാമിയുടെ സ്ഥിതി വഷളാകാന്‍ തുടങ്ങിയത്. ഇക്കുറി അച്ഛനൊപ്പം ഓണം ആഘോഷിക്കാമെന്ന സന്തോഷം ബാക്കിയാക്കി അവള്‍ യാത്രയായത് കുടുംബത്തിന് താങ്ങാനാവുന്നില്ല.
അമ്മയുടെ നിലവിളിയും കണ്ടു നിന്നവരെ കണ്ണീരിലാഴ്ത്തി. ''അമ്മയ്ക്ക് കുഞ്ഞിനെ ഇങ്ങനെ കാണേണ്ട.'' ചേതനയറ്റ അഭിരാമിയുടെ ശരീരം കണ്ടതോടെ അമ്മ രജനിയുടെ അലറിവിളിച്ചുള്ള കരച്ചില്‍ കുട്ടികളുടെ ആശുപത്രിയില്‍ കൂടിനിന്നവരെ നൊമ്പരപ്പെടുത്തി.

''എത്ര ദിവസമായി എത്രയോ ചികിത്സകള്‍. മരുന്നും വെന്റിലേറ്ററുമായി കുഞ്ഞ് ഏറെ അനുഭവിച്ചു. മടങ്ങി വന്നില്ല. ഇനി ആ ശരീരം കീറിമുറിക്കല്ലേ...'' രജനി അപേക്ഷിച്ചു. രജനിയും ഭര്‍ത്താവ് ഹരീഷും പോസ്റ്റ്‌മോര്‍ട്ടം വേണ്ടെന്ന വിവരം ആശുപത്രി അധികാരികളെ അറിയിച്ചതോടെ മൃതദേഹം പെട്ടെന്ന് വിട്ടുകൊടുക്കുകയായിരുന്നു.

ഓഗസ്റ്റ് 13ന് രാവിലെ വീട്ടില്‍നിന്നു 500 മീറ്ററോളം അകലെയുള്ള വീട്ടിലേക്കുപോകും വഴിയായാണ് അഭിരാമിക്ക് തെരുവുനായയുടെ കടിയേറ്റത്.