ലഹരിക്കെതിരായ കര്മപദ്ധതിക്ക് ഒക്ടോബര് രണ്ടിന് തുടക്കമാകും...സംസ്ഥാനതലത്തില് മുഖ്യമന്ത്രി അധ്യക്ഷനായി സമിതി രൂപീകരിച്ചു; നവംബര് ഒന്നിന് വിദ്യാലയങ്ങളില് ലഹരിവിരുദ്ധചങ്ങല സംഘടിപ്പിക്കണം
ലഹരിക്കെതിരായ കര്മപദ്ധതിക്ക് ഒക്ടോബര് രണ്ടിന് തുടക്കമാകുമെന്നു മുഖ്യമന്ത്രി. ഒരുമാസം തീവ്രമായ പ്രചാരണപരിപാടികള് സംഘടിപ്പിക്കും. ബഹുമുഖ കൂട്ടായ്മകള് ക്യാംപയിനില് അണിചേരണം. സംസ്ഥാനതലത്തില് മുഖ്യമന്ത്രി അധ്യക്ഷനായി സമിതി രൂപീകരിച്ചു. വിദ്യാലയങ്ങളിലും ജില്ലാതലത്തിലും സമിതികള് രൂപീകരിക്കും.
നവംബര് ഒന്നിന് വിദ്യാലയങ്ങളില് ലഹരിവിരുദ്ധചങ്ങല സംഘടിപ്പിക്കണം. പ്രതീകാത്മകമായി ലഹരിവസ്തുക്കള് കത്തിച്ചു നശിപ്പിക്കണം. സ്കൂള് പരിസരത്ത് ലഹരിവിറ്റാല് കടകള് അടച്ചുപൂട്ടിക്കും.
നാര്ക്കോട്ടിക്ക് കണ്ട്രോള് ബ്യൂറോയുടെ റിപ്പോര്ട്ട് പ്രകാരം ആവര്ത്തിച്ച് കുറ്റകൃത്യത്തില് ഏര്പ്പെടുന്നവര്ക്കെതിരെ കരുതല് തടങ്കല് നടപടിയടക്കം സ്വീകരിക്കും. കാപ്പ രജിസ്റ്റര് തയ്യാറാക്കുന്ന മാതൃകയില് ലഹരിക്കടത്ത് കുറ്റകൃത്യം ചെയ്യുന്നവരുടെ ഡാറ്റാബാങ്ക്തയ്യാറാക്കും. അതിര്ത്തികളിലും മറ്റു സംസ്ഥാനങ്ങളില് നിന്നും കേരളത്തിലേക്കുവരുന്ന ട്രെയിനുകളിലും പരിശോധന ശക്തമാക്കും. സംസ്ഥാനമൊട്ടാകെ പോലീസിന്റേയും എക്സൈസിന്റെയും നേതൃത്വത്തില് ലഹരി വിരുദ്ധ സ്പെഷ്യല് ഡ്രൈവ് നടത്തും.
ലഹരിക്കെതിരായ പോരാട്ടം ജനകീയ ക്യാമ്പയിനായി സംഘടിപ്പിക്കും. യുവാക്കള്, മഹിളകള്, കുടുംബശ്രീ പ്രവര്ത്തകര്, സമുദായ സംഘടനകള്, ഗ്രന്ഥശാലകള്, ക്ലബ്ബുകള്, റസിഡന്റ്സ് അസോസിയേഷനുകള്, സാമൂഹ്യ സാംസ്കാരിക രാഷ്ട്രീയ കൂട്ടായ്മകള് ഉള്പ്പെടെയുള്ള വിവിധ പ്രാദേശിക കൂട്ടായ്മകളെ ക്യാമ്പയിനില് കണ്ണിചേര്ക്കും.
ക്യാമ്പയിനിന്റെ ഉദ്ഘാടനം ഒക്ടോബര് രണ്ടിന് നടത്തും. ഉദ്ഘാടന ദിവസം എല്ലാ വിദ്യാലയങ്ങളിലും പ്രത്യേക ക്ലാസ്സ് പി.ടി.എ. യോഗങ്ങള് ചേരും. എല്ലാ ക്ലാസ്സുകളിലും വിക്ടേഴ്സ് ചാനല് വഴി ഉദ്ഘാടന പ്രസംഗം കേള്ക്കാന് അവസരം ഒരുക്കും. തുടര്ന്ന് ലഹരിക്കെതിരായ രണ്ടോ മൂന്നോ ഹ്രസ്വ സിനിമ/ വീഡിയോയുടെ സഹായത്തോടെ ഒരു മണിക്കൂര് നീണ്ടു നില്ക്കുന്ന ലഹരിവിരുദ്ധ ക്ലാസും ലഹരി എന്ന വിപത്ത് ഒഴിവാക്കുന്നതിന് പ്രാദേശികമായി ചെയ്യേണ്ട കാര്യങ്ങള് സംബന്ധിച്ച ചര്ച്ചയും സംഘടിപ്പിക്കും.
ബസ് സ്റ്റാന്റുകളിലും ക്ലബ്ബുകളടക്കമുള്ള ഇടങ്ങളിലും ഇത്തരത്തില് പരിപാടികള് നടത്തും. ഒപ്പംതന്നെ ഗാന്ധിജയന്തി ആഘോഷങ്ങള് ലഹരി വിരുദ്ധ ക്യാമ്പയിനായി മാറ്റണമെന്ന് മുഖ്യമന്ത്രി നിര്ദ്ദേശിച്ചു. എല്ലാ വിദ്യാലയങ്ങളിലും പി.ടി.എ.യുടെ നേതൃത്വത്തില് പ്രാദേശിക കൂട്ടായ്മകളുടെ പ്രതിനിധികള്, പൂര്വ്വ വിദ്യാര്ത്ഥികള്, രാഷ്ട്രീയ പാര്ട്ടി പ്രതിനിധികള് എന്നിവര് ഉള്ക്കൊള്ളുന്ന ലഹരിവിരുദ്ധ ജനജാഗ്രത സമിതികള് രൂപീകരിക്കും.
https://www.facebook.com/Malayalivartha
