മദ്യലഹരിയില്‍ മകന്‍ വീണ്ടും മദ്യം വാങ്ങാനായി പണം അമ്മയോട് ആവശ്യപ്പെട്ട് വാക്കു തര്‍ക്കം.... ഒടുവില്‍ അമ്മയെ തീ കൊളുത്തി, വയോധിക ആശുപത്രിയില്‍, മകന്‍ അറസ്റ്റില്‍

സാരമായി പരുക്കേറ്റ ചമ്മന്നൂര്‍ ലക്ഷംവീട് കോളനി റോഡ് തലക്കാട്ടില്‍ പരേതനായ സുബ്രഹ്മണ്യന്റെ ഭാര്യ ശ്രീമതി (75) എറണാകുളം മെഡിക്കല്‍ ട്രസ്റ്റ് ആശുപത്രിയില്‍ ചികിത്സയില്‍ കഴിയുന്നു. അക്രമം നടത്തിയ മകന്‍ മനോജിനെ (53) വടക്കേകാട് പൊലീസ് അറസ്റ്റ് ചെയ്തു.


ചൊവ്വ രാത്രി 10 മണിയോടെയാണ് സംഭവം നടന്നത്. മദ്യപിച്ചു ലക്കുകെട്ട മനോജ് വീണ്ടും മദ്യം വാങ്ങാന്‍ അമ്മയോട് പണം ചോദിച്ചതിനെ തുടര്‍ന്ന് വാക്കുതര്‍ക്കമുണ്ടായി. ഇതിനിടെ വീട്ടിലുണ്ടായിരുന്ന മണ്ണെണ്ണ ദേഹത്തൊഴിച്ച് മനോജ് തീകൊളുത്തിയെന്ന് ശ്രീമതി പൊലീസില്‍ മൊഴി നല്‍കി.


ബഹളം കേട്ട് അയല്‍വാസി വിവരം അറിയിച്ചതിനെ തുടര്‍ന്ന് 3 കിലോമീറ്റര്‍ അകലെ താമസിക്കുന്ന മകള്‍ എത്തിയാണ് പൊലീസിന്റെ സഹായത്തോടെ ശ്രീമതിയെ കുന്നംകുളത്തെ സ്വകാര്യ ആശുപത്രിയില്‍ എത്തിച്ചത്.


പരുക്ക് ഗുരുതരമായതിനെ തുടര്‍ന്ന് വയോധികയെ എറണാകുളത്തേക്ക് മാറ്റി. ശ്രീമതിയും മനോജും മറ്റൊരു മകന്‍ സജിയുമാണ് വീട്ടില്‍ താമസം. വര്‍ഷങ്ങള്‍ക്കു മുന്‍പുണ്ടായ വാഹനാപകടത്തില്‍ സജിയുടെ രണ്ടു കണ്ണിനും കാഴ്ച നഷ്ടപ്പെട്ടു പോയി. വലിയ ഭൂസ്വത്തുള്ള കുടുംബമാണ് ഇവരുടേത്.