വടക്കഞ്ചേരിയിലെ ബസ് അപകടവുമായി ബന്ധപ്പെട്ട് പോലീസിന്റെ പ്രാഥമിക അന്വേഷണ റിപ്പോര്‍ട്ട് തിങ്കളാഴ്ച ഹൈക്കോടതിയില്‍ സമര്‍പ്പിക്കും. സംഭവത്തില്‍ അന്വേഷണ ഉദ്യോഗസ്ഥനോട് നേരിട്ട് ഹാജരാവാനാണ് ഹൈക്കോടതി ഉത്തരവ്.


അപകടത്തെ കുറിച്ച് ഇതുവരെയുള്ള അന്വേഷണ റിപ്പോര്‍ട്ട് അന്വേഷണ ഉദ്യോഗസ്ഥനായ ആലത്തൂര്‍ ഡിവൈഎസ്പി ആര്‍.അശോകന്‍ നേരിട്ടെത്തി സമര്‍പ്പിക്കും. സംഭവത്തെ കുറിച്ച് അന്വേഷണം നടന്നുവരികയാണെന്ന് ഡിവൈഎസ്പി . രണ്ടു ബസുകളിലും സഞ്ചരിച്ചവരില്‍ നിന്നു വിവരങ്ങള്‍ ശേഖരിക്കുകയും ചെയ്യും.

അപകട സമയത്ത് റോഡില്‍ ഉണ്ടായിരുന്ന കാര്‍ ഡ്രൈവര്‍ മണ്ണാര്‍ക്കാട് സ്വദേശി ജയപ്രകാശില്‍ നിന്നും കൂടുതല്‍ വിവരങ്ങള്‍ അന്വേഷിച്ചറിയും. അപകടത്തെ തുടര്‍ന്ന് ഹൈക്കോടതി സ്വമേധയാ കേസെടുത്തിട്ടുണ്ടായിരുന്നു. ഇതിനിടെ പോലീസ് കസ്റ്റഡിയിലെടുത്ത ടൂറിസ്റ്റ് ബസിന്റെ മാനേജര്‍ ഉള്‍പ്പെടെയുള്ള രണ്ടുപേരെ വിട്ടയച്ചു.

സംഭവത്തില്‍ ഇവര്‍ക്കു നേരിട്ടു പങ്കില്ലെന്നു തെളിഞ്ഞതിനെ തുടര്‍ന്നാണ് വിട്ടയച്ചത്. അപകടത്തെ തുടര്‍ന്ന് അറസ്റ്റിലായ ടൂറിസ്റ്റ് ബസ് ഡ്രൈവര്‍ ജോമോനേയും ഉടമ അരുണിനെയും റിമാന്‍ഡ് ചെയ്തിരിക്കുകയാണ്. അപകടസമയത്ത് ടൂറിസ്റ്റ് ബസിലുണ്ടായിരുന്ന മറ്റൊരു ഡ്രൈവറുടെ മൊഴി രേഖപ്പെടുത്താന്‍ കഴിഞ്ഞിട്ടില്ല. ഗുരുതരമായി പരുക്കേറ്റ ഇയാള്‍ കോട്ടയത്ത് ചികിത്സയില്‍ കഴിയുകയാണ്.