ഇലന്തൂരിലെ നരബലി കേസിൽ അറസ്റ്റിലായ മുഖ്യപ്രതി ഷാഫിക്കെതിരെ ഗുരുതര ആരോപണവുമായി കെ സുരേന്ദ്രൻ രംഗത്ത്. മതഭീകരവാദ സംഘടനകളുമായി ബന്ധമുണ്ടെന്ന ആരോപണവുമായാണ് സുരേന്ദ്രൻരംഗത്ത് എത്തിയിരിക്കുന്നത്. കൃത്യമായ ആസൂത്രണത്തോടെ നടപ്പിലാക്കിയ ഈ കുറ്റകൃത്യം വെറും നരബലിയല്ല. പിന്നിൽ തീവ്രവാദ സംഘടന സ്വാധീനം ഉണ്ടെന്നും ആരോപണം ഉന്നയിച്ചു.

സമഗ്രമായ അന്വേഷണം നടത്തണം. അത്യന്തം ക്രൂരമായ സംഭവമാണിത്. ഇതിനു പിന്നിൽ സിപിഎം പ്രവർത്തകനാണെന്നതു സംഭവത്തിന്റെ ഗൗരവം വർധിപ്പിക്കുന്നു എന്നും അദ്ദേഹം വ്യക്തമാക്കി. ലോകത്തിന് മുൻപിൽ നാടിന്റെ പ്രതിഛായ തകർന്നുവെന്നും അദ്ദേഹം കൂട്ടിച്ചേർത്തു. പ്രതി മുഹമ്മദ് ഷാഫിയെ കുറിച്ച് മനസ്സിലായ കാര്യങ്ങൾ തുറന്നുപറയാൻ പോലീസ് തയാറാകണമെന്നും കെ സുരേന്ദ്രൻ പറഞ്ഞു.

മതഭീകരവാദികളുടെ ശൈലിയിൽ നടന്ന കൊലപാതകമാണിത്. അത്തരം ശക്തികളുണ്ടെങ്കിൽ അവരെ പുറത്തെത്തിക്കണം. സിപിഎം എന്തുകൊണ്ടാണു പ്രതി ഭഗവൽ സിങ്ങിനെതിരെ നടപടി എടുക്കാത്തതെന്നും കെ സുരേന്ദ്രൻ ചോദിച്ചു. കേരളത്തിന് പുറത്തായിരുന്നു ഇത്തരമൊരു സംഭവമെങ്കിൽ എങ്ങനെയാകുമായിരുന്നു ഇവിടുത്തെ പ്രതികരണങ്ങൾ? നമ്മുടെ നാട്ടിലെ സാംസ്കാരിക നായകർ എവിടെ പോയെന്നും കെ സുരേന്ദ്രൻ ചോദിച്ചു.

അതേസമയം സംസ്ഥാനത്ത് ആഭിചാര കൊലപാതകങ്ങളും അന്ധവിശ്വാസങ്ങളും തടയാൻ പുതിയ നിയമ നിർമാണം വേണമെന്ന് സിപിഎം. അനാചാരങ്ങൾക്കെതിരെ ബഹുജന മുന്നേറ്റവും ബോധവത്കരണവും ഉണ്ടാകണം. പത്തനംതിട്ട ഇലന്തൂരിലെ ഇരട്ട നരബലിയെ ശക്തമായി അപലിക്കുന്നുവെന്നും സിപിഎം വ്യക്തമാക്കി. കുറ്റകൃത്യം പുറത്തെത്തിക്കാൻ കേരള പൊലീസ് നടത്തിയ ഇടപെടൽ പ്രശംസനീയമാണെന്നും സിപിഎം വ്യക്തമാക്കി.