ടൂറിസം സാധ്യതകൾ പ്രയോജനപ്പെടുത്തുന്നതിന് രാജ്യാന്തര നിലവാരമുള്ള യാത്രക്കപ്പൽ കൊച്ചി പുതുവൈപ്പിൽ നീറ്റിലിറക്കി. കൊച്ചി കേന്ദ്രമായ മിനാർ ക്രൂസ് കൊച്ചിൻ കമ്പനിയാണ് ഇന്ത്യൻ റജിസ്റ്റർ ഓഫ് ഷിപ്പിങ് (ഐആർഎസ്) ക്ലാസിഫിക്കേഷനുള്ള ചെറു യാത്രക്കപ്പൽ പുറത്തിറക്കിയത്. ഐആർഎസ് ക്ലാസിലുള്ള കേരളത്തിലെ ആദ്യ സ്വകാര്യ ക്രൂസ് വെസലാണിതെന്നു മിനാർ എംഡി സി.എ.കുഞ്ഞുമോൻ പറഞ്ഞു.

2016ൽ കീലിട്ട കപ്പലിന്റെ നിർമാണം പൂർണമായും ഫൈബർ ഗ്ലാസിലാണ്. ആർക്കിടെക്റ്റ് വിജിത് മേനോന്റെ ഡിസൈനിൽ കൊച്ചിയിലെ ഐശ്വര്യ മറൈൻ കമ്പനിയുടെ നേതൃത്വത്തിൽ നിർമിച്ച കപ്പൽ ടൂറിസ്റ്റുകൾക്കു കടൽ യാത്രയ്ക്കാണ് ഉപയോഗിക്കുക. 150 പേർക്കു യാത്ര ചെയ്യാവുന്ന ചെറുകപ്പലിന് 27 മീറ്റർ നീളവും 8 മീറ്റർ വീതിയുമുണ്ട്. മൂന്നു നിലകളിലായി നിർമിച്ച പാർട്ടി ഹാളും അനുബന്ധ സൗകര്യങ്ങളുമുണ്ട്