കേരളത്തെ നടുക്കിയ ഇലന്തൂർ ഇരട്ടനരബലിക്കേസിൽ നിർണായക സംഭവങ്ങളാണ് പുറത്ത് വരുന്നത്. സംഭവത്തിന് പിന്നിൽ അവയവമാഫിയയ്ക്ക് ബന്ധമുണ്ടോ എന്നാണ് പലരും സംശയം ഉന്നയിക്കുന്നത്. എന്നാൽ ഇവർക്ക് മറുപടിയുമായി ഡോ. നെൽസൺ ജോസഫ് രംഗത്ത് എത്തിയിരിക്കുകയാണ്.

ഫേസ്ബുക്ക് കുറിപ്പ് ഇങ്ങനെ;

സംശയം ചോദിച്ച്‌ കളിക്കുന്ന സീസണായകൊണ്ട്‌ കുറച്ച്‌ സംശയം അങ്ങോട്ടും ചോദിക്കാമല്ലോ. സ്വന്തം ലേഖകനോ ഈ " വഴിത്തിരിവ്‌ " കണ്ടുപിടിച്ചവരോ ആരേലും മറുപടി തന്നാ മതി.

1) അങ്ങനെ ആർക്കെങ്കിലും ചെയ്യാൻ കഴിയുന്ന ഒന്നാണോ അവയവ മാറ്റത്തിനായി അവയവം നീക്കം ചെയ്യുന്നത്‌?
അല്ല, എന്നാപ്പിന്നെ ഇനി പത്തുപതിനഞ്ച്‌ കൊല്ലം പഠിച്ച ട്രാൻസ്പ്ലാന്റ്‌ സർജന്മാരെയൊക്കെ പിരിച്ചുവിടാല്ലോ
2) അവയവദാനത്തെക്കുറിച്ച്‌ ഒരു ബേസിക്‌ വിവരമെങ്കിലും ഉണ്ടോ?
ഉണ്ടെങ്കിൽ അതിനു വിദൂരസാധ്യതയെങ്കിലും ഉണ്ടോ എന്ന് ഒരു തവണയെങ്കിലും ആലോചിച്ചിരുന്നോ?
ഓർഗ്ഗൻ ട്രാൻസ്പ്ലാന്റിംഗ്‌ രംഗത്തെ - പോട്ട്‌, ഒരു സർജറി എങ്കിലും ചെയ്ത്‌ പരിചയമുള്ള ആരോടെങ്കിലും സംസാരിച്ചിരുന്നുവോ?
3) മേജർ സർജറികൾ എവിടെയും വച്ച്‌ ചെയ്യാവുന്ന ഒന്നാണോ?
ആണേൽ പിന്നെ ഇനി ഓപ്പറേഷൻ തിയറ്ററൊക്കെ വാടകയ്ക്ക്‌ കൊടുക്കാല്ലോ
4) ശരീരത്തിനുള്ളിൽ വയ്ക്കുന്ന അവയവം മാത്രമല്ല, മെഷ്‌ തൊട്ട്‌ അങ്ങോട്ടുള്ള ഒരു വിധം കാര്യങ്ങളൊക്കെ അണുവിമുക്തമായ ഇടങ്ങളിൽ വച്ച്‌ അതിനുള്ള മുൻ കരുതലുകൾ പാലിച്ച്‌ ചെയ്യേണ്ടതാണെന്ന് അറിയുമോ?
അത്രയുമൊക്കെ കഴിഞ്ഞിട്ടേ ബാക്കി കാര്യങ്ങളിലേക്ക്‌ കടക്കുക പോലും ചെയ്യേണ്ടൂ.
5) ഈ വാർത്ത ഇപ്പൊത്തന്നെ വെല്ലുവിളികൾ നേരിടുന്ന അവയവദാന രംഗത്തിനുണ്ടാക്കാൻ പോവുന്ന ആഘാതത്തെക്കുറിച്ച്‌ ചെറു രൂപമെങ്കിലും ഉണ്ടോ?
6) അവയവങ്ങൾ കാത്തിരിക്കുന്ന മനുഷ്യരോടും അവരുടെ ബന്ധുക്കളോടും എന്താണു പറയാനുള്ളതെന്ന് ചുരുങ്ങിയ വാക്കുകളിൽ വ്യക്തമാക്കാമോ?

ഇതിന്റടിയിൽ വേണമെന്നില്ല. അതും ഒരു വാർത്തയാക്കിക്കോ. . അതാണല്ലോ അതിന്റെ ശരി.