രോഗം ഭേദമാക്കാമെന്ന് വിശ്വസിപ്പിച്ച് നാല് ലക്ഷം രൂപ തട്ടിയെടുത്ത സംഭവത്തില് മന്ത്രവാദി അറസ്റ്റില്
രോഗം ഭേദമാക്കാമെന്ന് വിശ്വസിപ്പിച്ച് നാല് ലക്ഷം രൂപ തട്ടിയെടുത്ത സംഭവത്തില് മന്ത്രവാദി അറസ്റ്റില്. മന്ത്രവാദത്തിലൂടെ കാന്സര് രോഗം ഭേദമാക്കാമെന് വിശ്വസിപ്പിച്ചാണ് നാല് ലക്ഷം രൂപ തട്ടിയെടുത്തത്. കോന്നി മഞ്ഞക്കടമ്ബ് മാടത്തെത്ത് വീട്ടില് താമസിക്കുന്ന ബാലന്(53) ആണ് കോന്നി പൊലീസിന്റെ പിടിയിലായത്.
ഐരവണ് സ്വദേശിനിയെയാണ് ദുര്മന്ത്രവാദത്തിന്റെ പേര് പറഞ്ഞു വിശ്വസിപ്പിച്ച് പണം തട്ടിയത്. ഇക്കഴിഞ്ഞ ഏപ്രിലിലാണ് പ്രതിയുടെ വീട്ടില് വച്ച് രോഗം ഭേദമാക്കാന് എന്ന് തെറ്റിദ്ധരിപ്പിച്ച് പൂജകള് നടത്തിയത്. തുടര്ന്ന് ഇയാള് നാല് ലക്ഷം രൂപ പരാതിക്കാരില് നിന്നും കൈപ്പറ്റുകയായിരുന്നു.
മാസങ്ങള് കഴിഞ്ഞിട്ടും അസുഖം ഭേദമാകാത്തതിനാല് ഇവര് പണം തിരികെ ചോദിച്ചപ്പോള് മന്ത്രവാദം നടത്തി ശരീരം തളര്ത്തിക്കളയുമെന്ന് ഇയാള് ഭീഷണിപ്പെടുത്തുകയും ചെയ്തു. തുടര്ന്ന് യുവതി പൊലീസില് പരാതി നല്കുകയായിരുന്നു. ഇവരുടെ പരാതി പ്രകാരം കോന്നി പൊലീസ് വീട്ടിലെത്തി വിശദമായ മൊഴിയെടുത്ത ശേഷം കേസ് രജിസ്റ്റര് ചെയ്യുകയായിരുന്നു.
വിശ്വാസവഞ്ചനയ്ക്കും, ഉദ്ദിഷ്ട കാര്യം സാധിച്ചുകൊടുക്കാമെന്ന് വിശ്വസിപ്പിച്ച ശേഷമുള്ള ആഭിചാരക്രിയ നടത്തി പറ്റിച്ചതിനുമാണ് കേസെടുത്തത്. തുടര്ന്ന് ജില്ലാ പൊലീസ് മേധാവി സ്വപ്നില് മധുകര് മഹാജന് ഐപിഎസിന്റെ കര്ശന നിര്ദേശത്തെ തുടര്ന്ന് കോന്നി ഡിവൈഎസ്പി കെ ബൈജു കുമാറിന്റെ മേല്നോട്ടത്തില് പ്രതിയെ ശനിയാഴ്ച അറസ്റ്റ് ചെയ്യുകയായിരുന്നു. കുറ്റസമ്മത മൊഴി രേഖപ്പെടുത്തിയ ശേഷം ഇയാളുടെ വീട്ടില് നിന്നും പൂജകള് നടത്താനുപയോഗിച്ച സാധനങ്ങള് കസ്റ്റഡിയിലെടുത്തു. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
https://www.facebook.com/Malayalivartha
