ടൂറിസ്റ്റ് ബസ് പിന്നിലിടിച്ച് കെ.എസ്.ആര്‍.ടി.സി. ലോഫ്ളോര്‍ ബസിന്റെ ചില്ലു തകര്‍ന്നു.. ബസില്‍ നിന്നു തെറിച്ച് റോഡിലേക്കു വീണ് യുവതിയ്ക്ക് ദാരുണാന്ത്യം.

മലപ്പുറം തിരൂരങ്ങാടി ചെമ്മാട് കോരത്ത് കണ്ടന്‍ ഷാഫിയുടെ ഭാര്യ സലീന (38) യാണ് മരിച്ചത്. അപകടത്തില്‍ നാലുപേര്‍ക്ക് പരിക്കേറ്റു. ഞായറാഴ്ച പുലര്‍ച്ചെ 5.30-ന് ദേശീയപാതയില്‍ അങ്കമാലി കെ.എസ്.ആര്‍.ടി.സി. ബസ് സ്റ്റേഷനു മുന്നിലായിരുന്നു അപകടം നടന്നത്.

സലീനയോടൊപ്പം ബസില്‍ സഞ്ചരിച്ചിരുന്ന സഹോദരി അസ്മാബി (45), അസ്മാബിയുടെ ഭര്‍ത്താവ് അബ്ദുല്‍ റഷീദ് (53), മകന്‍ ഹിലാല്‍ (8), ബസിലെ യാത്രക്കാരിയായിരുന്ന നൂറനാട് വിളയില്‍ പുത്തന്‍വീട്ടില്‍ ടീനാമോള്‍ ഫിലിപ്പ് (27) എന്നിവര്‍ക്കാണ് പരിക്കേറ്റത്.

പരിക്ക് സാരമുള്ളതല്ല. സലീന മൂന്നുമാസം മുമ്പ് സൗദി അറേബ്യയില്‍ ജോലി ചെയ്യുന്ന ഭര്‍ത്താവ് ഷാഫിയുടെ അടുത്തേക്ക് പോയിരുന്നു. ഉംറ നിര്‍വഹിച്ച് മടങ്ങി വന്നതാണ്. നെടുമ്പാശ്ശേരിയില്‍ വിമാനമിറങ്ങി നാട്ടിലേക്ക് പോകാനാണ് കെ.എസ്.ആര്‍.ടി.സി. ലോഫ്ളോര്‍ ബസില്‍ കയറിയത്.

സലീനയെ വിമാനത്താവളത്തില്‍ സ്വീകരിക്കാനെത്തിയതാണ് സഹോദരിയും കുടുംബവും. വിമാനത്താവളത്തില്‍ നിന്ന് അങ്കമാലിയിലെത്തിയ ലോഫ്ളോര്‍ ബസ് സ്റ്റാന്‍ഡില്‍ കയറുന്നതിനായി തിരിച്ചു. ആലുവ റോഡില്‍നിന്ന് വലത്തോട്ട് തിരിഞ്ഞ് സ്റ്റാന്‍ഡിലേക്ക് കയറുകയായിരുന്ന ലോഫ്ളോര്‍ ബസിന്റെ പിന്‍ഭാഗത്ത് ടൂറിസ്റ്റ് ബസ് ഇടിക്കുകയായിരുന്നു.


ടൂറിസ്റ്റ് ബസ് കര്‍ണാടകയില്‍നിന്നു വന്നതാണ്. സലീന ഇരുന്ന പിന്‍സീറ്റിന്റെ വശത്താണ് ടൂറിസ്റ്റ് ബസ് ഇടിച്ചത്. ഇടിയുടെ ആഘാതത്തില്‍ ലോഫ്ളോര്‍ ബസിന്റെ ചില്ലുതകര്‍ന്ന് സലീന ബസില്‍നിന്ന് റോഡിലേക്ക് തെറിച്ചുവീണു. റോഡില്‍ തലയടിച്ചാണ് ജീവന്‍ നഷ്ടമായത്.
രണ്ടു മക്കളുണ്ട്. അങ്കമാലി താലൂക്കാശുപത്രിയില്‍ പോസ്റ്റ്‌മോര്‍ട്ടം നടത്തിയ ശേഷം മൃതദേഹം നാട്ടിലേക്ക് കൊണ്ടുപോയി.
അതേസമയം ഭര്‍ത്താവിന്റെ അടുക്കലില്‍ നിന്ന് നാട്ടിലേക്കെത്തിയ സലീനയുടെ വേര്‍പാട് ഉറ്റവരെയും ബന്ധുക്കളേയും കണ്ണീരിലാഴ്ത്തി.