ശിവശങ്കര്‍ ആത്മകഥ എഴുതി പുറത്തിറക്കിയപ്പോള്‍ സ്വപ്‌ന പറഞ്ഞൊരു കാര്യമുണ്ട്. ഞാന്‍ ആത്മകഥയെഴുതിയാല്‍ അത് പലര്‍ക്കും വിനയാകും എന്ന്. അത് അച്ചട്ടായിരിക്കുകയാണ്. ശിവശങ്കര്‍ രണ്ടാമതും സസ്‌പെന്‍ഷനിലാകാനുള്ള സാധ്യത തെളിഞ്ഞു വരികയാണ്. സ്വപ്‌നയുടെ ആത്മകഥ പലരും വായിച്ച് വരുന്നതേ ഉള്ളൂ.. അതിലെ വെളിപ്പെടുത്തലുകള്‍ പലതും പലരെയും തെറിപ്പിക്കാന്‍ കെല്‍പ്പുള്ളതാണ്. എന്തിനേറെ പറയുന്നു പിണറായി വിജയന്റെ മുഖ്യമന്ത്രി കസേരയ്ക്കു പോലും ഭീഷണിയാകുന്ന വെളിപ്പെടുത്തലുകള്‍ അതിലുണ്ട്. കേസ് പരിഗണിക്കുന്നത് ബംഗ്ലൂരുവിലേയ്ക്ക് മാറ്റി സ്വതന്ത്രമായ അന്വേഷണം നടന്നാല്‍ പിണറായിയുടെ കസേര തെറിക്കാന്‍ ചതിയുടെ പത്മവ്യൂഹത്തിലെ വെളിപ്പെടുത്തലുകള്‍ തന്നെ ധാരാളം. എന്തായാലും ശിവശങ്കറിനു ശേഷം അടുത്ത ഊഴം പിണറായി വിജയനാണ് എന്ന കാര്യത്തില്‍ സംശയമില്ല.

സ്‌നപ്‌നയുടെ വെളിപ്പെടുത്തലുകള്‍ കൂടതല്‍ വിനയാവുക ശിവശങ്കറിന് തന്നെയാണ്. വിവാഹിതനായ ശിവശങ്കര്‍ സ്വപ്നയെ താലി കെട്ടിയത് ആള്‍ ഇന്ത്യ സര്‍വീസ് റൂള്‍ 19 പ്രകാരം ഗുരുതര തെറ്റാണ്. മാത്രമല്ല ഔദ്യോഗിക യാത്രകളില്‍ സ്വപ്ന സുരേഷിനെ കൂടെ കൂട്ടിയതും ചട്ട ലംഘനമാണ്. ഇതോടെ സംഭവം മുഖ്യമന്ത്രിയുടെയും ശ്രദ്ധയില്‍ പെടുത്തുകയാണ് കോണ്‍ഗ്രസ്.

ശിവശങ്കറിനെ സസ്‌പെന്‍ഡ് ചെയ്യണമെന്നാവശ്യപ്പെട്ട് മുഖ്യമന്ത്രിക്കും ചീഫ് സെക്രട്ടറിക്കും പരാതിയും എത്തിക്കഴിഞ്ഞു. പരാതി നല്‍കിയിരിക്കുന്നത് കോണ്‍ഗ്രസ് നേതാവ് വീണ നായരാണ്. സ്വപ്ന സുരേഷിന്റെ പുസ്തകത്തില്‍ എം.ശിവശങ്കര്‍ ചെന്നൈയിലെ ഒരു ക്ഷേത്രത്തില്‍ വച്ച് തന്നെ താലി ചാര്‍ത്തി എന്ന് വെളിപ്പെടുത്തുന്നുണ്ട്. ഇതോടൊപ്പം ഔദ്യോഗിക യാത്രകള്‍ ദുരുപയോഗിപ്പെടുത്തി നിരവധി യാത്രകളില്‍ സ്വപ്ന സുരേഷിനെ കൂടെ കൂട്ടി എന്നും പുസ്തകത്തില്‍ പറയുന്നു.

ഐഎഎസ് മാന്വല്‍ ചട്ടം 19 പ്രകാരം വിവാഹിതനായ ഒരു ഉദ്യോഗസ്ഥന്‍ സര്‍വിസില്‍ തുടരുന്ന കാലം മറ്റൊരു വിവാഹ ബന്ധത്തില്‍ ഏര്‍പ്പെടാന്‍ പാടുള്ളതല്ലെന്നു പരാതിയില്‍ ചൂണ്ടിക്കാട്ടുന്നു. ഇതോടൊപ്പം ഇന്ത്യന്‍ ശിക്ഷ നിയമത്തിലെ 493,494 വകുപ്പുകള്‍ പ്രകാരവും ഇത് കുറ്റകരമാണ്. ഔദ്യോഗിക യാത്രകള്‍ വ്യക്തി താല്പര്യങ്ങള്‍ക്കായി ഉപയോഗപ്പെടുത്തുന്നതും കുറ്റകരമാണെന്നും വീണയുടെ പരാതിയില്‍ പറയുന്നു.

വീണ നായര്‍ സമര്‍പ്പിച്ച പരാതി ഇങ്ങനെയാണ്

ബഹുമാനപ്പെട്ട മുഖ്യമന്ത്രി

മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറിയും, നിലവിലെ സ്‌പോര്‍ട്‌സ് യുവജന കാര്യ വകുപ്പ് പ്രിന്‍സിപ്പല്‍ സെക്രട്ടറിയുമായ എം ശിവശങ്കര്‍ തന്നെ താലി ചാര്‍ത്തി എന്ന് സ്വപ്ന സുരേഷ് തന്റെ പുസ്തകത്തില്‍ വെളിപ്പെടുത്തിയത് അങ്ങയുടെ ശ്രദ്ധയില്‍പ്പെട്ടു കാണുമല്ലോ. ' ചതിയുടെ പത്മവ്യൂഹം ' എന്ന സ്വപ്ന സുരേഷിന്റെ പുസ്തകത്തില്‍ എം ശിവശങ്കര്‍ ചെന്നൈയിലെ ഒരു ക്ഷേത്രത്തില്‍ വച്ച് തന്നെ താലി ചാര്‍ത്തി എന്ന് സ്വപ്ന സുരേഷ് വെളിപ്പെടുത്തുന്നുണ്ട്. ഇതോടൊപ്പം ഔദ്യോഗിക യാത്രകള്‍ ദുരുപയോഗിപ്പെടുത്തി നിരവധി യാത്രകളില്‍ സ്വപ്ന സുരേഷിനെ കൂടെ കൂട്ടി എന്നും പുസ്തകത്തില്‍ വെളിപ്പെടുത്തുണ്ട്. ഐ എ എസ് മാന്വലിലെ റൂള്‍ 19 പ്രകാരം വിവാഹിതനായ ഒരു ഉദ്യോഗസ്ഥന്‍ സര്‍വിസില്‍ തുടരുന്ന കാലം മറ്റൊരു വിവാഹ ബന്ധത്തില്‍ ഏര്‍പ്പെടാന്‍ പാടുള്ളതല്ല. ഇതോടൊപ്പം ഇന്ത്യന്‍ ശിക്ഷ നിയമത്തിലെ 493,494 വകുപ്പുകള്‍ പ്രകാരവും ഇത് കുറ്റകരമാണ്.

ഔദ്യോഗിക യാത്രകള്‍ വ്യകതി താല്പര്യങ്ങള്‍ക്കായി ഉപയോഗപ്പെടുത്തുന്നതും കുറ്റകരമാണ്.ഈ സാഹചര്യത്തില്‍ മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറിയും, നിലവിലെ സ്‌പോര്‍ട്‌സ് യുവജന കാര്യ വകുപ്പ് പ്രിന്‍സിപ്പല്‍ സെക്രട്ടറിയുമായ എം ശിവശങ്കറിനെ സസ്‌പെന്‍ഡ് ചെയ്തു കൊണ്ട് അന്വേഷണം നടത്താന്‍ അങ്ങ് നടപടി സ്വീകരിക്കണമെന്ന് അപേക്ഷിക്കുന്നു.