കടക്ക് പുറത്തല്ല കണ്ടുപോകരുത്... കൈരളി, ജയ്ഹിന്ദ്, റിപ്പോര്ട്ടര്, മീഡിയ വണ് തുടങ്ങി മലയാളത്തിലെ നാല് മാധ്യമങ്ങളെ വാര്ത്താസമ്മേളത്തില് പങ്കെടുപ്പിക്കാതെ ഗവര്ണര്; മറ്റ് ചാനലുകള് അവര്ക്ക് പിന്തുണ നല്കാതെ ഗവര്ണറുടെ പത്രസമ്മേളനത്തില് പങ്കെടുത്തത് തിരിച്ചടി; അനുമതി നല്കാത്തതിന് കാരണം വെളിപ്പെടുത്തി ഗവര്ണര്
കൈരളി, ജയ്ഹിന്ദ്, റിപ്പോര്ട്ടര്, മീഡിയ വണ് മലയാളത്തിലെ അത്യാവശ്യം വ്യൂവര്ഷിപ്പുള്ള 4 മാധ്യമങ്ങളെ ഗവര്ണര് ആരിഫ് മുഹമ്മദ് ഖാന് ഇന്നലെ വാര്ത്താ സമ്മേളനത്തില് പങ്കെടുപ്പിച്ചില്ല. സാധാരണ ഒരുമിച്ച് നില്ക്കുന്ന പത്രക്കാര് ഇന്നലെ റേറ്റിംഗ് മുന്നില് കണ്ട് ഗവര്ണറുടെ അടുത്തേയ്ക്ക് പോയി, അതോടെ അവസരം കിട്ടാത്ത നാല് ചാനലുകള് ഒറ്റപ്പെട്ടു.
ചില മാധ്യമങ്ങള് തെറ്റായ രീതിയില് കൊടുത്ത വാര്ത്ത ആവശ്യപ്പെട്ടിട്ടും തിരുത്താന് തയ്യാറായില്ലെന്നും അതാണ് അവരെ ഒഴിവാക്കാന് കാരണമെന്നുമാണ് ഗവര്ണര് നല്കിയ വിശദീകരണം. രാജ് ഭവനുമായി ബന്ധപ്പെട്ട് തെറ്റായ രീതിയില് ചില മാധ്യമങ്ങള് വാര്ത്ത നല്കുകയുണ്ടായി. രാജ്ഭവന് പിആര്ഒ ആവശ്യപെട്ടിട്ടും തിരുത്താന് അവര് തയ്യാറായില്ല. അതുകൊണ്ടാണ് അത്തരം മാധ്യമങ്ങളെ വാര്ത്താ സമ്മേളനത്തില് പങ്കെടുപ്പിക്കേണ്ടെന്ന് തീരുമാനിച്ചത്.
പാര്ട്ടി കേഡറുകളെ താന് വാര്ത്താ സമ്മേളനത്തില് പങ്കെടുപ്പിക്കാനുദ്ദേശിക്കുന്നില്ലെന്നും ഗവര്ണര് പറഞ്ഞു. ചില വിഷയങ്ങളില് വിശദീകരണം നല്കാനാണ് വാര്ത്താ സമ്മേളനം വിളിച്ചത്. എന്നാല് താന് പറയുന്നതിനെ ചില മാധ്യമങ്ങള് വളച്ചൊടിക്കുന്നുണ്ടെന്നും അത്തരക്കാരെ ഒഴിവാക്കുകയായിരുന്നുവെന്നും ഗവര്ണര് പറഞ്ഞു.
കൈരളി, ജയ്ഹിന്ദ്, റിപ്പോര്ട്ടര്, മീഡിയ വണ് എന്നീ മാധ്യമങ്ങള് അനുമതി ചോദിച്ചിട്ടും രാജ്ഭവന് പ്രവേശനം നിഷേധിക്കുകയായിരുന്നു. മാധ്യമങ്ങളോടുള്ള വിവേചനത്തില് ഇതിനോടകം വിമര്ശനം ഉയര്ന്നിട്ടുണ്ട്. നാല് മാധ്യമങ്ങള്ക്ക് മാത്രം പ്രവേശനം നിഷേധിച്ചത് തെറ്റാണെന്ന് പ്രതിപക്ഷ നേതാവ് വി ഡി സതീശന് പ്രതികരിച്ചു. ഗവര്ണറുടെ കസേരയിലിരുന്ന് ആരിഫ് മുഹമ്മദ് ഖാന് ചെയ്യുന്നത് ശരിയല്ലെന്നും എല്ലാവരെയും ഒരു പോലെ കാണണമെന്നും സതീശന് ആവശ്യപ്പെട്ടു.
അതേസമയം മാധ്യമ വിമര്ശനത്തില് വിശദീകരണവുമായി ഗവര്ണര് ആരിഫ് മുഹമ്മദ് ഖാന് രംഗത്തെത്തി. മാധ്യമങ്ങളോട് ബഹുമാനം മാത്രമാണെന്നും എന്നും അത്തരം നിലപാടാണ് താന് സ്വീകരിച്ചിട്ടുള്ളതെന്നും ഗവര്ണര് വിശദീകരിച്ചു. മാധ്യമങ്ങളെന്ന വ്യാജേന പാര്ട്ടി കേഡറുകളെത്തുന്നുവെന്ന പരാമര്ശം വിവാദമായതോടെയാണ് പ്രത്യേക വാര്ത്താ സമ്മേളനത്തില് ഗവര്ണറുടെ പ്രതികരണം.
പാര്ട്ടി കേഡര് ജേര്ണലിസ്റ്റ് ചമയുന്നുവെന്ന പരാമര്ശം ആവര്ത്തിക്കുകയാണെന്നും അത് കൊണ്ടാണ് രാജ് ഭവനിലേക്ക് മാധ്യമപ്രവര്ത്തകരോട് അപേക്ഷ നല്കാന് ആവശ്യപ്പെട്ടതെന്നും ഗവര്ണര് കൂട്ടിച്ചേര്ത്തു. മുഖ്യമന്ത്രി പിണറായി വിജയന് മാധ്യമങ്ങളോട് നേരത്തെ നടത്തിയ 'കടക്ക് പുറത്ത്', മാധ്യമ സിന്ഡിക്കേറ്റ് പരാമര്ശങ്ങളും ഗവര്ണര് സൂചിപ്പിച്ചു. ഭരണ പക്ഷത്തിനിരിക്കുമ്പോള് മാധ്യമങ്ങളോട് 'കടക്ക് പുറത്ത്' പരാമര്ശം നടത്തിയത് താനല്ല.
പ്രതിപക്ഷത്തിരിക്കുമ്പോള് മാധ്യമങ്ങളെ മാധ്യമ സിന്ഡിക്കേറ്റെന്ന് വിളിച്ചതാരാണെന്ന് ഓര്മ്മിക്കുന്നില്ലെയെന്നും ഗവര്ണര് ചോദിച്ചു. സര്വകലാശാല വിസിമാരുടെ ഹര്ജി ഹൈക്കോടതി പരിഗണിക്കുന്നതിന് മുമ്പ് മാധ്യമങ്ങളോട് സംസാരിക്കുകയായിരുന്നു ഗവര്ണര് ആരിഫ് മുഹമ്മദ് ഖാന്.
അതേസമയം കേരള വൈസ് ചാന്സലറുടെ ചുമതല ആരോഗ്യ സര്വകലാശാല വിസിക്ക്. ഡോ. മോഹനനന് കുന്നുമ്മലിന് ഗവര്ണര് പകരം ചുമതല നല്കി. കേരള വിസിയുടെ കാലാവധി ഇന്ന് അവസാനിച്ച സാഹചര്യത്തിലാണ് ഡോ. മോഹനനന് കുന്നുമ്മലിന് പകരം ചുമതല നല്കിയത്. ഡോ. വി പി മഹാദേവന് പിള്ളയാണ് കേരള സര്വകലാശാല വിസി. 2018 ഒക്ടോബര് 24 നാണ് വി പി മഹാദേവന് പിള്ള വൈസ് ചാന്സലറായി നിയമിതനായത്. ഗവര്ണര് പി സദാശിവമാണ് വി പി മഹാദേവന് പിള്ളയെ വി സിയായി നിയമിച്ചത്.
അതേസമയം സര്വകലാശാലകള്ക്ക് സുരക്ഷ നല്കണമെന്ന് നിര്ദേശിച്ച് ഗവര്ണര്. ഒന്പത് സര്വകലാശാലകളില് സുരക്ഷ ഒരുക്കണമെന്ന് ആവശ്യപ്പെട്ട് ഡിജിപിക്ക് ഗവര്ണര് കത്തുനല്കി. പ്രശ്നസാധ്യത പരിഗണിച്ചാണ് സുരക്ഷ കൂട്ടാനുള്ള നിര്ദേശം.
ഹൈക്കോടതി വിധിപ്പകര്പ്പ് കിട്ടിയശേഷമാണ് ഗവര്ണറുടെ പ്രതികരണം. ഗവര്ണര് അന്തിമ ഉത്തരവ് പറയും വരെ സംസ്ഥാനത്തെ ഒന്പത് വൈസ് ചാന്സലര്മാര്ക്കും തല്സ്ഥാനത്ത് തുടരാമെന്നാണ് ഹൈക്കോടതി ഉത്തരവിട്ടിരുന്നു. രാജിവച്ച് പുറത്തുപോകണമെന്ന ഗവര്ണറുടെ ഉത്തരവ് നിയമപരമല്ലെന്നും നടപടിക്രമങ്ങള് പാലിച്ചല്ലെന്നുമുളള വൈസ് ചാന്സലര്മാരുടെ വാദം അംഗീകരിച്ചാണ് നടപടി. തങ്ങളുടെ ഭാഗം കേള്ക്കാതെയുളള ഗവര്ണറുടെ നടപടി സ്വഭാവിക നീതിയുടെ ലംഘനമാണെന്ന വൈസ് ചാന്സലര്മാരുടെ വാദം സിംഗിള് ബെഞ്ച് അംഗീകരിച്ചു.
"
https://www.facebook.com/Malayalivartha
