കടവന്ത്രയിലെ ഉത്തരേന്ത്യൻ സ്വദേശിനിയുടെ മരണത്തിന് പിന്നാലെ കാണാതായ ഭർത്താവിനായി അന്വേഷണം ഊർജിതമാക്കി പൊലീസ്. സംഭവത്തിൽ കൊലപാതകം നടത്തി ഭർത്താവ് രാം ബഹദൂർ മുങ്ങിയെന്നാണ് പൊലീസ് നി​ഗമനം. കേസിൽ ഇൻക്വസ്റ്റ് നടപടികൾ ഇന്ന് പൂർത്തിയാക്കും.

അതേസമയം മഹാരാഷ്ട്ര സ്വദേശികളായ ഭാര്യയും ഭർത്താവും തമ്മിൽ നിരന്തരം വഴക്കുണ്ടാവാറുണ്ടായിരുന്നതായി അയൽക്കാർ വ്യക്തമാക്കുന്നു. ഈ സാഹചര്യത്തിൽ ഭർത്താവിനെ കേന്ദ്രീകരിച്ചാണ് അന്വേഷണം നടക്കുന്നത്. ഇതേസമയം ഇയാളെ സംബന്ധിച്ച് നിലവിൽ പൊലീസിന് യാതൊരു വിവരവുമില്ല.

മാത്രമല്ല, ഇപ്പോൾ അയൽവാസികളിൽ നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് അന്വേഷണം നടക്കുന്നത്. ഇതേസമയം തന്നെ മൃതദേഹം നടപടികൾ പൂർത്തിയാക്കി ആർക്കു കൈമാറണമെന്ന കാര്യത്തിലും പൊലീസിന് വ്യക്തതയില്ല.

കഴിഞ്ഞ ദിവസമാണ് കടവന്ത്ര എളംകുളത്തെ വീട്ടിൽ യുവതിയുടെ മൃതദേഹം കണ്ടെത്തിയത്. നാളുകളായി ഒരു വയോധികയുടെ വീടിന് മുകൾഭാഗത്തെ നിലയിൽ വാടകയ്ക്ക് താമസിക്കുകയായിരുന്നു ഇവർ. പിന്നാലെ പരിസരത്ത് ദുർഗന്ധമനുഭവപ്പെട്ടതിനെ തുടർന്ന് അയൽവാസികൾ പൊലീസിനെ അറിയിക്കുകയായിരുന്നു. തുടർന്ന് പൊലീസെത്തി പരിശോധന നടത്തിയപ്പോഴാണ് കവറിൽ പൊതിഞ്ഞ നിലയിൽ മൃതദേഹം കണ്ടെത്തിയത്.