തന്റെ കൈകള് ശുദ്ധം... തനിക്കെതിരെയുള്ള വിശ്വാസ വഞ്ചനക്കേസ് പിന്വലിക്കണമെന്ന ആവശ്യവുമായി ഹൈക്കോടതിയെ സമീപിച്ച് സണ്ണി ലിയോണ്; വാഗ്ദാനം ചെയ്ത പണം നല്കിയില്ല; 2019 ല് നടന്ന സംഭവത്തില് തന്റെ ഭാഗത്ത് നിന്നും തെറ്റ് സംഭവിച്ചിട്ടില്ല എന്ന് ചൂണ്ടിക്കാട്ടി സണ്ണി ലിയോണും ഭര്ത്താവ് ഡാനിയല് വെബറും
പ്രമുഖ ബോളിവുഡ് താരം സണ്ണി ലിയോണിനെ മലയാളികള്ക്ക് ഏറെ ഇഷ്ടമാണ്. കൊച്ചിയില് വന്ന സണ്ണി ലിയോണിനെ കാണാനുള്ള ആള്ക്കൂട്ടം നമ്മള് കണ്ടതാണ്. എന്നാല് ഒരു പരിപാടിയ്ക്ക് സണ്ണി എത്താത്തതാണ് ഇപ്പോള് കേസിന് പുറകേ പോകേണ്ടി വന്നത്.
തനിക്കെതിരെയുള്ള വിശ്വാസ വഞ്ചനക്കേസ് പിന്വലിക്കണമെന്ന ആവശ്യവുമായി ഹൈക്കോടതിയെ സമീപിച്ചിരിക്കുകയാണ് സണ്ണി ലിയോണ്. വാലന്റൈന്സ് ദിനത്തില് കൊച്ചിയില് സംഘടിപ്പിച്ച പരിപാടിയില് പങ്കെടുക്കാനായി പണം വാങ്ങി വഞ്ചിച്ചു എന്ന പേരില് താരത്തിനെതിരെ കേസ് നിലനില്ക്കുന്നുണ്ട്. 2
019 ല് നടന്ന സംഭവത്തില് തന്റെ ഭാഗത്ത് നിന്നും തെറ്റ് സംഭവിച്ചിട്ടില്ല എന്ന് ചൂണ്ടിക്കാട്ടിയാണ് സണ്ണി ലിയോണും ഭര്ത്താവ് ഡാനിയല് വെബറും കേസ് റദ്ദ് ചെയ്യാനായി ഹൈക്കോടതിയില് ഹര്ജി സമര്പ്പിച്ചത്. പരിപാടിയില് പങ്കെടുക്കാനായി താന് കൊച്ചിയിലെത്തിയിരുന്നെങ്കിലും മുന്കൂട്ടി തയ്യാറാക്കിയ കരാര് പ്രകാരമുള്ള 30 ലക്ഷം രൂപ നല്കാതെ സംഘാടകര് പിന്മാറിയെന്നാണ് സണ്ണി ലിയോണിന്റെ വാദം.
അതിനാല് സംഘാടകരാണ് വിശ്വാസ വഞ്ചന നടത്തിയതെന്നും എറണാകുളം ക്രൈം ബ്രാഞ്ച് തനിക്കെതിരെ രജിസ്റ്റര് ചെയ്ത കേസ് പിന്വലിക്കണമെന്നുമാണ് ഹര്ജിയില് താരം ആവശ്യപ്പെടുന്നത്. പെരുമ്പാവൂര് സ്വദേശി ഷിയാസ് കുഞ്ഞുമുഹമ്മദിന്റെ പരാതിയിലാണ് താരത്തിനെതിരെ 2019ല് കേസെടുത്തത്.
30 ലക്ഷം രൂപക്ക് 2018 മേയ് 11ന് കോഴിക്കോട് ഷോ നടത്തണമെന്നാവശ്യപ്പെട്ട് ഒഷ്മ ക്ലബ് 69 ന്റെ പേരില് ദാദു ഓഷ്മയെന്ന വ്യക്തിയാണ് സമീപിച്ചതെന്നും 2018 ഫെബ്രുവരി 14 ന് 15 ലക്ഷം രൂപ മുന്കൂര് തന്നെന്നുമാണ് ഹരജിയില് പറയുന്നത്. പിന്നീട് ഷോ നടത്തുന്നത് ഏപ്രില് 27 ലേക്ക് മാറ്റണമെന്ന് പറഞ്ഞ സംഘാടകര് മഴയുടെ പേരില് മേയ് 26 ലേക്ക് മാറ്റണമെന്ന് വീണ്ടും ആവശ്യപ്പെട്ടു. ഇതും സമ്മതിച്ചു.
ഈ ഘട്ടത്തിലാണ് കേരളത്തിലും ബഹറൈനിലുമായി നടക്കുന്ന സണ്ണി ലിയോണ് ഷോയുടെ ചീഫ് കോ ഓഡിനേറ്ററാണെന്ന് പറഞ്ഞ് ഷിയാസ് കുഞ്ഞുമുഹമ്മദ് രംഗത്തു വന്നത്. പലതവണ ഷോയുടെ തീയതിയും സ്ഥലവും മാറ്റി. കോഴിക്കോട്ട് നിശ്ചയിച്ചിരുന്ന ഷോ കണ്ണൂരിലേക്കും പിന്നീടു തിരുവനന്തപുരത്തേക്കും ചെന്നൈയിലേക്കും മാറ്റി.
ഒടുവില് 2019 ഫെബ്രുവരി 14ന് വാലൈന്റന്സ് ഡേ ഷോയായി കൊച്ചിയില് നടത്താന് തീരുമാനമായി. ജനുവരി 31 നകം പണം മുഴുവന് നല്കണമെന്ന ആവശ്യം സമ്മതിച്ച ശേഷം കൊച്ചിയിലെത്തിയെങ്കിലും ബാക്കി പണം നല്കാന് തയാറായില്ല. ബാക്കി പണം നല്കാതെ സമ്മര്ദത്തിലാക്കി ഷോ നടത്താനുള്ള പരാതിക്കാരന്റെയും സംഘത്തിന്റെയും ശ്രമത്തിന് വഴങ്ങാതിരുന്നതാണ് കേസിനിടയാക്കിയത്. ഈ സാഹചര്യത്തില് തങ്ങള്ക്കെതിരായ കേസ് റദ്ദാക്കണമെന്നാണ് ഹരജിയിലെ ആവശ്യം.
കേസുമായി സണ്ണി നില്ക്കുമ്പോഴും രസകരമായ വാര്ത്തയാണ് കഴിഞ്ഞ ദിവസം വന്നത്. ലോകമെമ്പാടും നിരവധി ആരാധകരുള്ള താരമാണ് സണ്ണി ലിയോണ്. പോണ് താരമായി അറിയപ്പെട്ടതിന് ശേഷം ബോളിവുഡിലേക്ക് എത്തിയ നടി നിരവധി സിനിമകളില് അഭിനയിച്ചിട്ടുണ്ട്. ഒരുപിടി മികച്ച സിനിമകളാണ് നിലവില് താരത്തിന്റേതായി അണിയറയില് ഒരുങ്ങുന്നത്. പലപ്പോഴും പരീക്ഷ പേപ്പറുകളിലും റാങ്ക് ലിസ്റ്റുകളിലും സണ്ണി ലിയോണിന്റെ പേര് വന്നിട്ടുള്ള വാര്ത്തകള് പുറത്തുവന്നിട്ടുണ്ട്. ഇപ്പോഴിതാ അത്തരമൊരു വാര്ത്തയാണ് കര്ണാടകയില് നിന്നും വരുന്നത്.
കര്ണാടകയില് അധ്യാപന നിയമനത്തിനുള്ള പരീക്ഷ ഹാള് ടിക്കറ്റില് ആണ് സണ്ണി ലിയോണിന്റെ ഫോട്ടോ പതിപ്പിച്ചിരിക്കുന്നത്. ഉദ്യോഗാര്ത്ഥിയുടെ ഫോട്ടോയ്ക്ക് പകരമാണ് ബോളിവുഡ് താരത്തിന്റെ ചിത്രം ആലേഖനം ചെയ്തത്. ഹാള് ടിക്കറ്റിന്റെ സ്ക്രീന് ഷോട്ടുകള് സമൂഹമാധ്യമങ്ങളില് പ്രചരിച്ചതിന് പിന്നാലെ സംഭവത്തില് കര്ണാടക വിദ്യാഭ്യാസ വകുപ്പ് അന്വേഷണത്തിന് ഉത്തരവിറക്കി.
അതേസമയം, പരീക്ഷയ്ക്ക് വേണ്ടി അപേക്ഷിക്കുമ്പോള് നിര്ബന്ധമായും ഫോട്ടോ അപ്ലോഡ് ചെയ്യണ്ടതുണ്ട്. ഉദ്യോഗാര്ത്ഥികള് അപ്ലോഡ് ചെയ്യുന്ന ഫോട്ടോ ആയിരിക്കും ഹാള് ടിക്കറ്റില് അച്ചടിക്കുക എന്നാണ് വിദ്യഭ്യാസ വകുപ്പ് പ്രതികരിച്ചിരിക്കുന്നത്. സംഭവത്തില് അന്വേഷണം നടത്തി എഫ്ഐആര് ഫയല് ചെയ്യുമെന്ന് വിദ്യാഭ്യാസ വകുപ്പ് അറിയിച്ചു.
നേരത്തെ സണ്ണി ലിയോണിന്റെ ജന്മദിനമായതില് പരീക്ഷ എഴുതാന് സാധിക്കില്ലെന്ന് ഉത്തരക്കടലാസില് എഴുതിയ വിദ്യാര്ത്ഥിയുടെ വാര്ത്ത ഏറെ ശ്രദ്ധനേടിയിരുന്നു. സണ്ണി ലിയോണ് നായികയായി എത്തുന്ന പുതിയ ചിത്രം ഷീറോ അണിയറയില് ഒരുങ്ങുകയാണ്. മലയാളത്തിന് പുറമേ ഹിന്ദി, തെലുങ്ക്, തമിഴ് ഭാഷകളിലും ചിത്രം റിലീസ് ചെയ്യുന്നുണ്ട്. 'ഒ മൈ ഗോസ്റ്റ്' എന്ന തമിഴ് ചിത്രവും റിലീസിനൊരുങ്ങുകയാണ്.
"
https://www.facebook.com/Malayalivartha